ރާއްޖޭގައި ފުޅާދާއިރާއެއް ސައިކަލްގެ ވިޔަފާރި ކުރަމުން އަންނަ ޝީޝާ ޕްރައިވެޓް ލިމިޓެޑުން މުވައްޒަފުންނަށް ރޯދަ މަހުގެ އިނާޔަތް ނުދޭން ނިންމި ނިންމުން މުރާޖައުކޮށް ހުރިހާ މުވައްޒަފުންނަށް ރޯދަމަހުގެ އިނާޔަތުގެ ގޮތުގައި 3000 ރުފިޔާ ދިނުމަށް ނިންމައިފިއެވެ.

ޝީޝާއިން ނެރެފައިވާ ބަޔާނެއްގައި ބުނީ، ކުރިން ނިންމި ނިންމުމަކީ އެންމެރަނގަޅު ނިންމުމެއް ނޫން ކަމަށް ގަބޫލްކުރާ ކަމަށެވެ. އެހެން ކަމުން މުވައްޒަފުންނާއި އާންމުންގެ ކިބައިން ޝީޝާއިން ވަނީ މާފަށް އެދިފައެވެ.

ނަމަވެސް ކޮވިޑް-19 ގެ ސަބަބުން ވިޔަފާރިއަށް ކޮށްފައިވާ ނޭދެވޭ އަސަރުތަކާއެކު މުވައްޒަފުންގެ މަސައްކަތުގެ ގަޑިތަކަށާއި އުޖޫރައަށް ބަދަލު ގެންނަށް މަޖުބޫރުވެފައިވާ ކަމަށް ޝީޝާގެ މެނޭޖިން ޑިރެކްޓަރ އަހްމަދު ހަސަން މަނިކް ނެރުއްވާފައިވާ ބަޔާނެއްގައި ވެއެވެ.

އެ ކުންފުނިން ބުނީ, ރޯދަ އިނާޔަތް އުނިކުރަން ކުރިން ނިންމާފައި އޮތް އިރުވެސް، ކޮވިޑް-19 ގެ ސަބަބުން ވޭތުވެ ދިޔަ މަހުގެ މަސައްކަތުގެ ގަޑިތައް ވަރަށް ބޮޑަށް މަދުވެފައިވާތީ އެ މަހުގެ މުސާރަ ހުރިހާ މުވައްޒަފުންނަށް އެއްކޮށް ލިބޭނެ ކަމަށް ކޮންމެ މުވައްޒަފަކަށް ވަކިވަކިން ފޮނުވާފައިވާ ސިޓީގައި އަންގާފައިވާނެ ކަމަށެވެ.

އަދި ކުންފުނީގައި މަސައްކަތް ކުރާ ބިދޭސީ މުވައްޒަފުން މަގުމަތިވިޔަ ނުދިނުމަށްޓަކައި އާންމު ހާލަތަށް ރުޖޫއަ ވަންދެން ނުވަތަ އެފަރާތްތަކަށް ހުރުމާއި، ކެއުމާއި ކަރަންޓާއި ފެނުގެ ހަރަދުދޭންވެސް ހަމަޖައްސާފައިވާނެ ކަމަށެވެ.

21 މާރޗް 2020 އިން ފެށިގެން ޝީޝާގެ މަސައްކަތުގެ ގަޑިތައް ވަނީ ވަރަށް ބޮޑުތަނުން ކުޑަ ކޮށްފައެވެ.

މުވައްޒަފުން އެދޭނަމަ އާންމު ހާލަތަށް އައުމާއެކު މަސައްކަތުގެ އުޖޫރަ ލިބޭގޮތަށް ކުރީގެ މަގާމަށް ރުޖޫއަވުމުގެ އިހްތިޔާރު ޝީޝާއިން ވަނީ މުވައްޒަފުންނަށް އަރުވާފައެވެ. އަދި ކޮންމެ މުވައްޒަފެއްގެ ޙިދުމަތުގެ މުއްދަތާއި ގުޅުވައިގެން، ކޮމްޕެންސޭޝަން ޕެކޭޖްއެއްވެސް ދީފައިވާނެ ކަމަށް އެ ކުންފުނިން ބުންޏެވެ.