ކޮވިޑް-19އާއި ހެދި ޣައްޒާގެ މުސްލިމުން ބިކަ ޙާލުގައި
25 އެޕްރީލު 2020 | ހޮނިހިރު 12:57ޣައްޒާގެ މިސްކިތްތައް ބަންދުކޮށް ޖަމާޢަތުގައި ނަމާދުކުރުން ވަނީ މަނާކޮށްފައި
ޣައްޒާގެ ކުދިންތަކެއް މިދިޔަ އަޟްޙާ ޢީދުގައި ނަލަހެދިލައިގެން | -
ކޮވިޑް-19އާއި ގުޅިގެން އަޅާފައިވާ ފިޔަވަޅުތަކުގެ ސަބަބުން ފަލަޞްޠީނުގެ ޣައްޒާގެ މުސްލިމުން ބިކަޙާލުގައި ޖެހިއްޖެއެވެ.
ބަރަކާތްތެރި ރަމަޟާންމަހުގައި އާންމުގޮތެއްގައި މިސްކިތްތަކުގައި ބާއްވާ ރޯދަވީއްލުމާއި މިސްކިތްތަކަށް އަަންނަ މީހުން ޞަދަޤާތުގެ ގޮތުގައިދޭ ފައިސާފޮތިން ދިރިއުޅުމުގެ ކަންކަން ހަމަޖައްސައިގެން ތިބޭ މީހުންގެ އަދަދު ޣައްޒާގައި ގިނައެވެ. ނަމަވެސް ކޮވިޑް-19 އާއި ގުޅިގެން އެޤަައުމުން އަޅަމުންދާ ފިޔަވަޅުތަކުގެ ތެރެއިން މިސްކިތްތައް ބަންދުކުރުން އެއީ ޣައްޒާ ބައެއް މުސްލިމުން މި ރަމަޟާންމަހު ކުރިމަތިލާންޖެހިފައި މިވަނީ ވަރަށް ދަތި އުނދަގޫ ދުވަސްތަކެކެވެ. ގިނަ ބަޔަކު މިހާރު ތިބީ ރަމަޟާންމަހު ދިރިއުޅުމުގެ ކަންކަން ހަމަޖައްސާނެ ގޮތަކާއި މެދު މާޔޫސްވެފައެވެ.
ވަޒީފާއެއްނެތި އަންހެނުންނާއި 6 ކުދިން ގޮވައިގެން ޣައްޒާގެ ރަށްފުށު ޞަރަހައްދެއްގައި އުޅޭ އުމުރުން 47 އަހަރުގެ ޖިބްރީލް ބުނީ، ރަމަޟާންމަހު އެކި ގޮތްގޮތުން ލިބޭ ފައިސާއިން މުޅި އަހަރު ދިރިއުޅުމުގެ އެކި ބޭނުންތައް ފުއްދަމުން އަންނަ ކަމަށެވެ. މިއަހަރު މިވީ ގޮތުން ކުރިޔަށް އޮތް އަހަރު ދިރިއުޅެން ޖެހޭނެ ގޮތް ވަޒަންކުރަން ދަތިކަމަށް އޭނާ ބުންޏެވެ.
ދެމިލިޔަނާއި ގާތްކުރާ ޢަދަދަކަށް މީހުން ދިރިއުޅެމުން އަންނަ ޣައްޒާއިން މިހާތަނަށް ރިކޯޑުކުރެވިފައިވަނީ ކޮވިޑް-19 ގެ 17 ކޭސްއެވެ. އެހެންނަމަވެސް ވައިރަސް ފެތުރިދާނެކަމުގެ ބިރު ހީވެ ޣައްޒާގައި ވެރިކަންކުރާ ޙަމާސް ޖަމާޢަތުންވަނީ ރަމަޟާންމަސް ނިމެންދެންވެސް މިސްކިތްތައް ބަންދުކުރަން ނިންމާފައެވެ. އަދި ގިނަ މީހުންއެއްވެގެން ބާއްވާ ދީނީ ނަޞޭޙަތްދިނުންވެސް މަނާކޮށް، ގޭގައި ނަމާދުކުރުމަށް ވަނީ އިލްތިމާސްކޮށްފައެވެ.
ޣައްޒާގައި އާދައިގެ މަތިން ރޯދަވީއްލާ އުޅެނީ ޢާއިލާތައް އެކީގައެވެ. އަދި ގިނަ މީހުން އިޚުތިޔާރުކުރަނީ މިސްކިތްތަކުގައި ރޯދަވީއްލުމަށެވެ. ރަމަޟާންމަހު އެހީދޭ ޖަމާއަތްތަކުން އެތައްހާސްމީހުންނަށް މިސްކިތްތައް މެދުވެރިކޮށް ރޯދަވީއްލުމުގެ ކަންކަން ހަމަޖައްސައިދެއެވެ. އަދި ޒަކާތުގެ ފައިސާގެ އިތުރުން ޞަދަޤާތުގެ ގޮތުގައިވެސް ފަޤީރުންނަށް ފައިސާލިބެއެވެ. ކޮވިޑް-19 އާއި ގުޅިގެން މިހުރިހައި ދޮރެއް މިވަނީ ބަންދުވަފައެވެ.
ވެރިކަންކުރާ ޙަމާސް ޖަމާއަތުން ވަނީ ރަމަޟާންމަހުގެ އިނާޔަތުގެ ގޮތުގައި 5000 އާއިލާއަކަށް 100 ޑޮލަރުދިނުމަށް ނިންމާފައެވެ. އެހެންނަމަވެސް މި ފައިސާ ޣައްޒާގެ މުސްލިމުންނަށް ލިބުނުކަން އެއްވެސް ޞައްޙަ މަސްދަރަކުން ކަށަވަރެއް ނުވެއެވެ.
ޞަލާޙު ޖިބްރީލަކީވެސް ހަމާސްއިން ފައިސާދޭން ބުނާ ފަޤީރުންގެ ލިސްޓުގައި ހިމެނޭ މީހެކެވެ. އޭނާއަށް ރަމަޟާންމަސް ނޫނަސް، ކޮންމެ ހަތަރު މަހުން އެއްމަހު ގައްޒާގެ މިނިސްޓްރީ އޮފް ސޯޝަލް އެފެއަރޒުން 500 ޑޮލަރުދެއެވެ. ޖިބްރީލު ބުނީ 8 މީހުންގެ ޢާއިލާއެއްގެ ދިރިއުޅުމުގެ ޒަރުރީ ބޭނުން އެއިން ނުފުދޭ ކަމަށެވެ. އަދި އަބަދުވެސް ބަރޯސާވަނީ ރަމަޟާންމަހު ލިބޭ އެއްޗަކަށް ކަމަށެވެ.
ޖިބްރީލު ފަދަ އެތައް މިލިޔަން މީހުން މިއަދު ޣައްޒާގައި ބަނޑަށް ޖެހި ފުރާނަ މުއްތު ކުރާނެ ގޮތެއް ނެތިފައި އެބަތިއްބެވެ. ދިރިއުޅުމުގެ އުފާތަކުން މަޙްރޫމުގެ ބައެއް މީހުންނަކީ ބޯހިޔާވަހިކަންވެސް ނެތް މީހުންނެވެ. ހަނގުރާމައިގެ ސަބަބުން ސުންނާފަތިވެފައިވާ ޣައްޒާގެ މުސްލިމުންގެ ދުޢާއަކީ ކޮވިޑް-19 އާއި ގުޅިގެން މި ކުރިމަތިވި ދަތި އުދަނގޫ ދުވަސްތަކުން ސަލާމަތްވުމެވެ. ކޮވިޑް-19 ގެ ކުރިންވެސް ޣައްޒާގެ ރައްޔިތުން އައީ އިސްރާއީލުގެ ދުއްތުރާތަައް ތަޙައްމަލުކުރަމުންނެވެ. އަމިއްލަ ވަޒަނުގެ ހިމާޔަތުގައި ފިކުރީ ހަނގުރާމައެއް ކުރަމުންދާ ޣައްޒާގެ ރައްޔިތުންނަކީ ކެތްގަދަ ބައެކެވެ. ހުރިހައި ޙާލަތެއް މެދުވާއިރުވެސް އަމިއްލަ ވަޒަނުގެ ހިމާޔަތުގައި ޖިހާދުކޮށްލަން ޣައްޒާގެ އެއްވެސް މުސްލިމަކު ފަސްނުޖެހޭނެއެވެ. ހިތްދަތިކަމާއި ވޭނުގައި މުޅި އުމުރު ދުއްވާލަން ޖެހުނަސް ފަރުވާލެއް ނެތެވެ.
އދ ގެ ރެފިއުޖީންނާއި ބެހޭ މައި އިދާރާގެ ދިރާސާތަކުން ދައްކާގޮތުގައި ޣައްޒާގެ %80 މީހުންގެ ދިރިއުޅުން ބަރޯސާވެފައިވަނި ލިބެ އެހީގެ މައްޗަށެވެ.
