އިތުރު 8 ދިވެހިން ކޮވިޑް-19 އަށް ޕޮޒިޓިވްވެފައިވާކަަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭއިން) ބުނެފިއެވެ.

ހޮނިހިރު ދުވަހު އެޗްޕީއޭއިން ކުރި ޓްވީޓެއްގައި ބުނީ، ރާއްޖެއިން އިތުރު 8 ދިވެއްސަކު ކޮވިޑް-19 އަށް ޕޮޒިޓިވްވެފައިވާ ކަމަށާއި، އެއާއެކު ޕޮޒިޓިވްވި މީހުންގެ ޖުމުލަ އަދަދު 137ށް އަރާފައިވާ ކަމަށެވެ.

ނަމަވެސް ކޭސްތަކާ ގުޅޭ އިތުރު ތަފްސީލެއް އެޗްޕީއޭއިން ހާމަކޮށްފައެއް ނުވެއެވެ.

އެޗްޕީއޭއިން އެހެން ބުނެފައިވާއިރު، ހޮނިހިރު ދުވަހު ށ ނަރުދޫއިން ދިވެއްސަކު ޕޮޒިޓިވްވެފައިވާކަން އެޗްޕީއޭއިން އެރަށުގެ ކަމާބެހޭ ފަރާތްތަކަށް އަންގާފައިވާކަން ރާއްޖެއެމްވީއަށް ވަނީ ކަށަވަރުވެފައެވެ. ނަމަވެސް އެކަން އެޗްޕީއޭއިން މިހާތަނަށް ކަށަވަރުކޮށްދީފައެއް ނުވެއެވެ.

ކޮވިޑް-19 އާ ގުޅިގެން ރައްކާތެރިކަމުގެ ފިޔަވަޅުތައް ވަރުގަދަ ކުރަމުންދާއިރު، ޓެސްޓު ކުރުމުގެ ކަންކަން އިތުރަށް ހަރުދަނާ ކުރުމަށްވެސް ދަނީ މަސައްކަތްތަކެއް ކުރަމުންނެވެ. އޭގެ އިތުރުން ޕޮޒިޓިވް ކޭސްތަކާ ގުޅުންހުރި މީހުން ފިޔަވައި އެކި ސަރަޙައްދުތަކުގައި "ކޮމިއުނިޓީ ސަރވައިލެންސް" ކުރިއަށް ގެންގޮސް، މާލެއާއި އަތޮޅު ތެރޭގައިވެސް ރިސްކް ބޮޑު ކަމަށް ފާހަގަވާ މީހުން ޓެސްޓް ކުރެވޭނެކަމަށް ހެލްތް މިނިސްޓްރީންވެސް ބުނެފައިވެއެވެ.