އާންމުސިއްޙަތު ރައްކާތެރި ކުރުމުގެ ޤާނޫނުގެ ދަށުން މާލޭ ސަރަޙައްދުގައި އިއުލާނުކޮށްފައިވާ ފުރަބަންދު (ލޮކްޑައުން)އާ ޚިލާފުވެގެން ހުކުރު ދުވަހު 5 މީހަކު ހައްޔަރުކޮށް، 109 މީހުން ޖޫރިމަނާ ކޮށްފައިވާކަމަށް ފުލުހުން ބުނެފިއެވެ.

ހޮނިހިރު ދުވަހު ފުލުހުން ކުރި ޓްވީޓެއްގައި ބުނީ، މާލެ ސަރަޙައްދުގައި އިއުލާނުކޮށްފައިވާ ލޮކްޑައުންގެ ވަގުތުގައި ބޭރުގައި އުޅުމުގެ ސަބަބުން ހުކުރު ދުވަހު 5 މީހަކު ހައްޔަރުކޮށްފައިވާއިރު، މާލެއިން އެކަނިވެސް 101 މީހުން ޖޫރިމަނާ ކޮށްފައިވާ ކަމަށެވެ.

އޭގެ އިތުރުން، ހުޅުމާލެއިން 4 މީހަކު ޖޫރިމަނާ ކޮށްފައިވާއިރު، ވިލިމާލެއިންވެސް 4 މީހުން ޖޫރިމަނާ ކޮށްފައިވާކަމަށް ފުލުހުން ބުނެއެވެ.

އަދި ޑެލިވަރީގެ ޚިދުމަތަށް 60 ހުއްދަ ދޫކޮށްފައިވާއިރު، ލޮކްޑައުންކުރި ފަހުން މިހާތަނަށް 4322 ޑެލިވަރީ ހުއްދަ ދޫކޮށްފައިވާކަން ފުލުހުން ފާހަގަކޮށްފައިވެއެވެ.

އާންމު ސިއްްޙަތު ރައްކާތެރި ކުރުމުގެ ޤާނޫނުގެ ދަށުން މާލެ ސަރަޙައްދު ލޮކްޑައުން ކޮށްފައިވާއިރު، އެކަން ތަންފީޒު ކުރުމުގައި ފުލުހުންނާއި ކަމާބެހޭ ފަރާތްތަކުން ދަނީ މަސައްކަތް ކުރަމުންނެވެ. އެގޮތުން އާބާދީގެ ބޮޑުބައެއް ކަމާބެހޭ ފަރާތްތަކުގެ އިރުޝާދުތަކަށް ބޯލަނބާކަން ފާހަގަކުރައްވައި ހޮނިހިރު ދުވަހު ނޭޝަނަލް އެމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ހެލްތް މިނިސްޓަރ އަބްދުﷲ އަމީންވެސް ވިދާޅުވީ، މަދު ބަޔަކު ކަމާބެހޭ ފަރާތްތަކުގެ އިރުޝާދުތަކަށް ބޯނުލެނބުމުގެ ސަބަބުން އެތައް ބަޔަކު ނުރައްކަލަށް ހުށައެޅިގެންދާ ކަމަށެވެ.