ކޮވިޑް-19އާ ގުޅިގެން އިގްތިސާދަށް ބޮޑު ލޮޅުމެއް އައިސް ވެންޓިލޭޓަރުގެ އެހީ ބޭނުންވެފައިވާ ކަމަށް ފިނޭންސް މިނިސްޓަރު އިބްރާޙިމް އަމީރު ވިދާޅުވެއްޖެއެވެ.
ހުކުރު ދުވަހު ނޭޝަނަލް އެމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަމީރު ވިދާޅުވީ މި ހާލަތުގައި އިގުތިސާދަށް ބޭނުންވާ ބޭސް ދޭން ޖެހޭ ކަމަށެވެ.
ކޮންމެ ބޭހެއްގައި ވެސް ސައިޑް-އިފެކްޓްސް ހުންނާނެ ކަމަށާއި، ސައިޑް އިފެކްޓާ ހުރެ ބޭސް ބޭނުން ނުކުރާނަމަ ލިބޭ ގެއްލުން މާ ބޮޑުވާނެކަން މިނިސްޓަރު އަމީރު ފާހަގަ ކުރެއްވިއެވެ.
ސައިޑް-އިފެކްޓްސް އަށް ފިޔަވަޅު އެޅުމަކީ އެންމެ ފުރަތަމަ ދޭން ޖެހޭ ފަރުވާ ދިނުމަށްފަހު ކުރާނެ ކަމެއް. އިޤްތިސާދުގެ މުހިންމު ބަހާތައް (މީހުން، ރައުސުލްމާލު، އެސެޓްސް) ދެމެހެއްޓުމަށް އަޅަންޖެހޭ ފިޔަވަޅުތައް އެޅުމަށް ފަސްޖެހުމަކީ އިޤްތިސާދީ މުސްތަޤްބަލަށް ދެވޭނެ ގެއްލުމެއް.ފިނޭންސް މިނިސްޓަރު އިބްރާޙިމް އަމީރު
ރިސެޝަންގެ ގުދު ފަތިކުރުމަށް ގިނަ މަސައްކަތްތައް ކުރަން ޖެހޭކަން ފާހަގަ ކުރައްވައި މިނިސްޓަރު އަމީރު ވިދާޅުވީ ދައުލަތުން ފިޔަވަޅު ނާޅައިފިނަމަ، އިޤްތިސާދީ ރިސެޝަން ވަރަށް ބޮޑުވާނެ ކަމަށެވެ.
ރިސެޝަންގެ ގުދު ފަތިކުރުމަށް ކުރަންޖެހޭ މަސައްކަތްތައް ގޮތުގައި މިނިސްޓަރު އަމީރު ފާހަގަކުރެއްވި ކަންތައްތައް:
- ރިސެޝަންއެއްގައި ފިސްކަލް ޕޮލިސީ ހިންގަން ޖެހެނީ ''ކައުންޓަރ-ސިކްނިކަލް"ކޮށް، މިކަމަށް ބަޖެޓުން ޖާގަ ހޯދަން ޖެހޭ. އަދި ކޭޝް ފްލޯ ހަމަޖައްސަންޖެހޭ.
- ދައުލަތުގެ ކޭޝްފްލޯ ހަމަޖައްސައި، ދައުލަތުގެ ޚަރަދުތައް ހިފަހައްޓައި، އިޤްތިސާދީ ރިލީފް އަދި ސްޓިމިއުލަސް ޕެކޭޖް ފޯރުކޮށް ދީގެން ރިސެޝަން ކަރވް ފަތި ކުރެވިދާނެ.
- މިކަމަށް، މުހިއްމު ފިޔަވަޅުތައް މުހިއްމު ވަގުތުތަކުގައި އަޅަންޖެހޭ.
މިނިސްޓަރު އަމީރު ވިދާޅުވީ އިގްތިސާދު ދެމެހެއްޓުމަށް އަޅަން ޖެހޭ ފިޔަވަޅުތައް ނޭޅުމަކީ މުސްތަގުބަލަށް ދެވޭނެ ވަރަށް ބޮޑު ގެއްލުމެއް ކަމަށެވެ.
