ބޭރުން 215 މިލިއަން ޑޮލަރު ހޯދުމުގެ މަޝްވަރާތައް ކުރިއަށް އެބަދޭ: ފިނޭންސް މިނިސްޓްރީ
24 އެޕްރީލު 2020 | ހުކުރު 12:48ބައިލަން އަގްވާމީ މާލީ އިދާރާތަކުން 215.37 މިލިއަން ރުފިޔާ ލިބޭނެ ކަމަށް ލަފާ ކުރެވޭ
މަޖިލީހުގެ ކޮމެޓީއަކަށް ފިނޭންސް މިނިސްޓަރ އަމީރު މައުލޫމާތު ހިއްސާ ކޮށްދެއްވަނީ (ފައިލް ފޮޓޯ)
ބައިނަލްއަގްވާމީ މާލީ އިދާރާތަކުން 215 މިލިއަން ޑޮލަރު ލިބޭނެ ކަމަށާއި އެކަމުގެ މަޝްވަރާތައް ކުރެވެމުންދާ ކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެ އެވެ.
ހުކުރު ދުވަހު ނޭޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި، ފިނޭންސް މިނިސްޓަރު އިބްރާހީމް އަމީރު ވަނީ ކޮވިޑް-19 އާ ގުޅިގެން އަންނަ އިޤްތިޞާދީ އަދި މާލީ ލޮޅުމާއެކު ދައުލަތުގެ ޚަރަދުތަކަށް ބޭނުންވާ ކޭޝްފްލޯ ހޯދުމާއި އަދި އިގްތިޞާދީ މިހާލަތުގައި އަމަލު ކުރައްވާނެ ގޮތުގެ މައްޗަށް ވަރަށް ތަފްސީލީ ގޮތެއްގައި ވާހަކަ ދައްކަވާފަ އެވެ. އެގޮތުން ދައުލަތުގެ މިއަހަރުގެ ބަޖެޓަކީ 37 ބިލިއަން ރުފިޔާކަމަށާއި ނަމަވެސް ކޮވިޑް-19 އާ ގުޅިގެން ޚަރަދު ކުޑަކުރުމުގެ ގޮތުން އަޅާ ފިޔަވަޅުތަކުގެ ނަތީޖާއިން، 7 ބިލިއަން ރުފިޔާ ދައުލަތުގެ ޚަރަދުން ސަލާމަތް ކުރެވޭނެ ކަމަށް އަންދާޒާ ކުރެވޭ ކަމަށެވެ.
މީގެއިތުރުން ބޭރުގެ މާލީ ބައެއް އިދާރާތަކުން ލިބޭނެ ކަމަށް ލަފާ ކުރެވޭ ބައެއް ފައިސާގެ އަދަދުތައް ވެސް އަމީރު ވަނީ ވިދާޅުވެދެއްވާފަ އެވެ. އަދި ކޭޝްފްލޯ އިތުރުކުރުމަށް ރައްޔިތުންގެ މަޖިލީހަށް ފިނޭންސް މިނިސްޓަރ ފޮނުއްވާފައިވާ ލިޔެކިޔުން ތަކުގައި ބޭރުން ލިބެންހުރި ފައިސާގެ ތަފްސީލްތައް ހިމަނާފައި ވެއެވެ.
އެގޮތުން، ވާރލްޑް ބޭންކުން 30.10 މިލިން ޑޮލަރު، ހަމަޖެހިފައިވާއިރު، އޭގެތެރެއިން 10 މިލިއަން ޑޮލަރު ކެޓް-ޑީޑީއޯގެ ތެރެއިން ލިބިފައި ވެއެވެ. އަދި މަޝްރޫއުތަކަށް ލިބިފައިވާ ފައިސާ، ބަޖެޓް ސަޕޯޓަށް ރީއެލޮކޭޓް ކުރެވޭތޯ މަޝްވަރާ ކުރަމުން ދާކަމަށް ފިނޭންސް މިނިސްޓްރީން ބުނެއެވެ.
މީގެއިތުރުން، އޭޝިއަން ޑިވެލޮޕްމަންޓް ބޭންކުން 27.60 މިލިއަން ޑޮލަރާއި، އޭޝިއަން އިންފްރާސްޓްރަކްޗަރ އިންވެސްޓްމަންޓް ބޭންކުން 5 މިލިއަން ޑޮލަރާއި އިސްލާމިކް ޑިވެލޮޕްމަންޓް ބޭންކުން 25.59 މިލިއަން ޑޮލަރު ހޯދުމުގެ މަޝްވަރާ ކުރެވެމުންދާ ކަމަށް ވެސް ފިނޭންސް މިނިސްޓްރީން ބުނެއެވެ. އަދި ޝާކް ޑިވެލޮޕްމަންޓް ފަންޑް 1.5 މިލިއަން ޑޮލަރާއި އެޗްއެސްބީސީ އެސްޓީއޯ ޓްރޭޑް ފައިނޭންސް ފެސިލިޓީން 25 މިލިއަން ޑޮލަރު ހީދުމުގެ މަޝްވަރާ ވެސް ކުރިއަށްދާ ކަމަށް ފިނޭންސް މިނިސްޓްރީން ބުނެއެވެ.
އިންޓަރނޭޝަނަލް މަނިޓަރީ ފަންޑުން 30 މިލިއަން ޑޮލަރު ލިބޭނެ ކަމަށް ލަފާކުރެވޭއިރު، އެކަމުގެ މަޝްވަރާ ނިމި، މިހާރު އޮތީ ބޯޑު އެޕްރޫވަލް މަހުރުހަލާގައި ކަމަށް ފިނޭންސް މިނިސްޓްރީން ބުނެއެވެ. އަދި އޯޕެކް ފަންޑް ފޮރ އިންޓަރނޭޝަނަލް ޑިވެލޮޕްމަންޓް (އޮފިޑް)އިން 20 މިލިއަން ޑޮލަރު ލިބޭނެކަމަށް ލަފާކޮށްފައިވާއިރު، އެފައިސާ ވަނީ ހަމަޖެހިފަ ކަމަށާއި މިހާރު އޮތީ ފައިސާ ދޫކުރުމުގެ މަގުމަތީގައި ކަމަށް ވެސް ފިނޭންސް މިނިސްޓްރީން ބުނެއެވެ.
އެންމެ ބޮޑު އެހީތެރިކަމެއް ވެދެނީ، އިންޓަރނޭޝަނަލް ފައިނޭންސް ކޯޕަރޭޝަނުން ނެވެ. އެފަރާތުން 50 މިލިއަން ޑޮލަރު ލިބޭނެ ކަމަށް ލަފާކޮށްފައިވާއިރު، އެއީ ޕްރައިވެޓް ސެކްޓަރ ފެސިލިޓީ އެއް ކަމަށާއި އެކަމުގެ މަޝްވަރާ ކުރެވެމުންދާ ކަމަށްވެސް ފިނޭންސް މިނިސްޓްރީން ބުނެއެވެ.
މީގެއިތުރުން ވެސް ދުނިޔޭގެ ސިއްހަތު ޖަމިއްޔާއާއި ޔުނިސެފް ފަދަ ޖަމިއްޔާ ޖަމާއަތްތަކުން ވެދޭ ފައިސާގެ އެހީތެރިކަންވެސް ހިމެނެއެވެ.
ކޮވިޑް-19 އާ ގުޅިގެން އަންނަ އިޤްތިޞާދީ އަލީ މާލީ ލޮޅުމާއެކު ދައުލަތުގެ ޚަރަދުތަކަށް ބޭނުންވާ ކޭޝްފްލޯ އިތުރު ކުރުމާ ގުޅޭގޮތުން މިނިސްޓަރު އަމީރު ވިދާޅުވީ އެކަމާގުޅޭ ލިޔެކިޔުންތައް މިހާރު ރައްޔިތުންގެ މަޖިލީހަށް ހުށަހަޅާފައިވާ ކަމަށާއި ދައުލަތުގެ ކޭޝްފްލޯ އަށް 4.2 ބިލިއަން ރުފިޔާ ބޭނުންވާ ކަމަށެވެ.
އެގޮތުން 4.2 ބިލިއަން ރުފިޔާ 1 އަހަރު ދުވަހުގެ މުއްދަތަށް ފައިނޭންސް ކޮސްޓެއް ނުހިމެނޭ ގޮތަށް އޯވަރޑްރޯ ކުރެވޭ ގޮތަށް ހަމަޖެހިގެން ދިއުމަކީ ދައުލަތުގެ ޚަރަދުތައް ހަމަޖައްސައި ޚިދުމަތުގެ ކަށަވަރުކަން ދެވޭނެކަމެއްކަމަށް ފިނޭންސް މިނިސްޓަރ އަމީރު ވިދާޅުވެފައިވެއެވެ.
ދައުލަތުގެ ޚަރަދަށް ޒިންމާވުމުގެ ގާނޫނުގެ 32 ވަނަ މާޢްދާގައި ބުނަނީ، ސަރުކާރުގެ އޯވަރޑްރާފްޓް ލިމިޓްގެ ގޮތުގައި ކަނޑައަޅާފައިވާ މިންވަރަކީ ވޭތުވެދިޔަ 3 އަހަރު ސަރުކާރަށް ލިބުނު ޖުމްލަ އާމްދަނީގެ މައްޗަށް ބިނާކޮށް، އަހަރަކަށްޖެހޭ އެވްރެޖް އާމްދަނީން 1 ޕަސެންޓަށްވުރެ އިތުރު ނުވާނޭގޮތުގެ މަތިން ސަރުކާރަށް އޯވަރޑްރާފްޓް (މަރުކަޒީ ބޭންކުން ދަރަންޏަށް ފައިސާ ނެގުން) ދެވިދާނެ ކަމަށެވެ. އެގޮތުން ބަލާއިރު، ސަރުކާރަށް މަރުކަޒީ ބޭންކުން ލިބެން އޮތް އޯވަރޑްރާފްޓްގެ އަދަދަކީ 219 މިލިއަން ރުފިޔާ އެވެ. އެއީ ވޭތުވެދިޔަ 3 އަހަރުގެ ޖުމްލަ އާމްދަނީގެ އަހަރަކަށް ޖެހޭ އެވްރެޖް އާމްދަނީ 1 ޕަސެންޓް މިންވަރަކީ 219 މިލިއަން ރުފިޔާ ކަމަށްވާތީ އެވެ.
ކޮވިޑް-19 އާ ގުޅިގެން އަންނަ އިޤްތިޞާދީ އަލީ މާލީ ލޮޅުމާއެކު ދައުލަތުގެ ޚަރަދުތަކަށް ބޭނުންވާ ކޭޝްފްލޯ ހޯދުމުގެ މައްސަލަ މިހާރު ވަނީ ރައްޔިތުންގެ މަޖިލީހަށް ހުށަހެޅި ބަހުސް މަރުހަލާގަ އެވެ. މަޖިލީހުގެ ރައީސް، ރައީސް ނަޝީދު ވިދާޅުވީ، މިހަފްތާގެ ހޮނިހިރު އަދި އާދިއްތަ ދުވަހު ވެސް މަޖިލީހުގެ ޖަލްސާ ބާއްވައި، މިމައްސަލައާމެދު ވަރަށް އަވަހަށް ގޮތެއް ނިންމަވާދެއްވާނެ ކަމަށް ވިދާޅުވެފަ އެވެ.
