ކޮވިޑް-19 އާ ގުޅިގެން ރާއްޖެއިން ބޭރުގައި ތިބި ދިވެހި ރައްޔިތުންނަށް ބޭނުންވާ އެހީ ސަރުކާރުން ފޯރުކޮށްދޭނެކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެ އެވެ.

‎ފޮރިން މިނިސްޓްރީގެ ހުރިހާ މުވައްޒަފުންނާ ވީޑިއޯ ކޮންފަރެންސް މެދުވެރިކޮށް މިނިސްޓަރ އޮފް ފޮރިން އެފެއަރޒް ޢަބްދުﷲ ޝާހިދު ބައްދަލުކުރައްވައި ދެއްކެވި ވާހަކަފުޅުގައި، ކޮވިޑް-19 އާއި ގުޅިގެން ރާއްޖެއިން ބޭރުގައި ތިބި ދިވެހި ރައްޔިތުންނަށް ބޭނުންވާ އެހީ ސަރުކާރުން ފޯރުކޮށްދޭނެކަމަށާއި، ރާއްޖޭގެ އިޤްތިޞާދު އަލުން ނަގާ ކޮޅަށް ޖަހާނެކަމަށެވެ. އަދި އެ މަސައްކަތުގައި އެންމެ ފުރަތަމަ ސަފުގައި ޚާރިޖީ ޓީމް އޮންނާނެކަން ޔަޤީންކުރައްވާކަމަށް މިނިސްޓަރ ވިދާޅުވި އެވެ.

‎މި ބައްދަލުވުމުގައި ޖަޕާނުގެ ވެރިރަށް ޓޯކިޔާ އިން ފެށިގެން އެމެރިކާގެ ނިއުޔޯކާ ދެމެދު ޤާއިމްކޮށްފައިވާ ރާއްޖޭގެ 17 ޑިޕްލޮމެޓިކް މިޝަންގެ މުވައްޒަފުންވެސް ބައިވެރިވެފައިވާއިރު މިއީ ދިވެހި ޚާރިޖިއްޔާގެ ތާރީޚުގައި ފޮރިން މިނިސްޓްރީގެ ހުރިހާ މުވައްޒަފުން ބައިވެރިވެގެން ބޭއްވި ފުރަތަމަ ބައްދަލުވުންކަމަށް މިނިސްޓްރީން މައުލޫމާތުދެ އެވެ.

މި ބައްދަލުވުމުގައި ބަރަކާތްތެރި ރަމަޟާން މަހުގެ ހެޔޮއެދުންތައް މިނިސްޓަރ ވަނީ ހުރިހާ މުވައްޒަފުންނަށް ފޮނުއްވާފަ އެވެ. އަދި މިއަހަރުގެ ރަމަޟާން މަސް ކުރިމަތިލަނީ ކޮވިޑް-19 ގެ ބިރުވެރިކަމާ މުޅި ދުނިޔެ ކުރިމަތިލާފައިވާ ދަނޑިވަޅެއްގައިކަން ފާހަގަކުރައްވައި، މި ދަނޑިވަޅުގައި މުވައްޒަފުން ކުރައްވަމުން ގެންދަވާ ބުރަ މަސައްކަތް ފާހަގަކުރެއްވި އެވެ.

‎އަދި ހަމައެއާއެކު މިފަދަ ޙާލަތެއްގައި ހުރިހާ މުވައްޒަފުންވެސް އިޙްސާންތެރިކަމާ އަޅާލުން އިސްކުރުމަށާއި، އެކަކު އަނެކަކުގެ ޙާލު ބަލައި، އެހީތެރިކަން ފޯރުކޮށްދެވެން އޮތް މިންވަރަކުން އެހީވެދެމުން ގެންދިޔުމަށް މިނިސްޓަރ ވަނީ ނަސޭހަތްތެރިވެވަޑައިގެންނެވި އެވެ.

‎ކޮވިޑް-19 އާއި ގުޅިގެން މިނިސްޓްރީގެ މުވައްޒަފުން ކުރަމުންދާ މަސައްކަތަށް ޝުކުރު އަދާކުރައްވައި، އެމަނިކުފާނު ޚާރިޖީ ވަޒީރަކަށް ހުންނަވާ ކުރައްވާ މަސައްކަތް ކާމިޔާބުވަނީ މުވައްޒަފުން ކުރައްވާ ބުރަ މަސައްކަތުންކަމަށް ވިދާޅުވި އެވެ. އަދި ހަމައެއާއެކު ގޮންޖެހުންތައް ބޮޑު މިފަދަ ދަނޑިވަޅެއްގައި ޤައުމަށް ބޭނުންވި ޚާރިޖީ ޓީމް އެމަނިކުފާނާއެކު އޮތްކަމީ ދިވެހިންނަށް ލިބުނު ވަރަށް ބޮޑު ނަސީބެއްކަމަށްވެސް މިނިސްޓަރ ޝާހިދު ވިދާޅުވި އެވެ.

‎ކޮވިޑް-19ގެ ޙާލަތާއި ބެހޭ ގޮތުން މުވައްޒަފުންނާ އިތުރަށް ވާހަކަފުޅު ދައްކަވަމުން މިނިސްޓަރ ޝާހިދު ވިދާޅުވީ މި ބަލިމަޑުކަމާއި ގުޅިގެން ރާއްޖެއަށް ދިމާވާ ނުރައްކާ އިތުރަށް ބޮޑުކަމަށެވެ. އެހެނީ ރާއްޖެއަކީ އާންމު ދިރިއުޅުމަށް ބޭނުންވާ ހުރިހާ ތަކެތި އިމްޕޯޓްކޮށް، ޤައުއުމުގެ އިޤްތިސާދު ޓޫރިޒަމަށް ބަރޯސާ ވެފައިވާ ޤައުމެއް ކަމަށް ވިދާޅުވި އެވެ.