ޕޮޒިޓިވްވި މީހުންގެ ތެރޭގައި ނެގެޓިވްވެގެން ކަރަންޓީނުން ދޫކުރި މީހަކު ހިމެނޭ
23 އެޕްރީލު 2020 | ބުރާސްފަތި 16:49ރާއްޖެ އައިސްފައިވަނީ އިނގިރޭސިވިލާތުން
ޑރ. ނަޒްލާ ރަފީގް
މާލެއިން ކޮވިޑް-19 އަށް ޕޮޒިޓިވްވި މީހުންގެ ތެރޭގައި މީގެކުރިން އެ ބައްޔަށް ނެގެޓިވްވެގެން ކަރަންޓީނުން ދޫކުރި މީހަކު ހިމެނޭ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
ބުރާސްފަތި ދުވަހު ނެޝަނަލް އެމެޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން އެޗްޕީއޭގެ މެޑިކަލް އޮފިސަރު ޑރ. ނަޒްލާ ރަފީގް ވިދާޅުވީ، ކޮންޓެކްޓް ޓްރޭސިންގެ ތެރެއިން މީގެ ކުރިން 14 ދުވަހުގެ ކަރަންޓީނުގެ މުއްދަތު ފުރިހަމަ ކުރުމަށް ފަހު ދޫކުރި މީހަކު ފާހަގަކުރެވިފައިވާ ކަމަށެވެ. އެމީހާގެ ގައިން ކޮވިޑް-19 ގެ އަލާމާތްތައް ފެނުނީ ފަހުން ޕޮޒިޓިވްވި މީހަކާއި ޑައިރެކްޓް ކޮންޓެކްޓް ވެގެން އެ މީހާ ކަރަންޓީނަށް ގެންގޮސް ޓެސްޓު ހެދުމުގެ ތެރެއިން ކަމަށް ޑރ. ނަޒްލާ ވިދާޅުވިއެވެ.
އޭނާ ވިދާޅުވީ، އެމީހާ އަކީ މީގެ ކުރިން ދެ ފަހަރެއްގެ މަތިން ކޮވިޑް-19 އަށް ޓެސްޓުކޮށް ޑަބަލް ނެގެޓިވްވެފައިވާކަން ރިކޯޑްތަކުން ދައްކާ ކަމަށެވެ.
ޑރ. ނަޒްލާ ވިދާޅުވީ، އެމީހާ ރާއްޖެ އައިސްފައިވަނީ މާޗް މަހުގެ 23 ވަނަ ދުވަހު އިނގިރޭސިވިލާތުން ކަމަށާއި، އޭނާގެ ފުރަތަމަ ޓެސްޓް ހަދާފައިވަނީ މާޗް މަހުގެ 28 ވަނަ ދުވަހުއެވެ. އޭގެ ފަހުން ކަރަންޓީނުގެ މުއްދަތު ހަމަ ކުރުމަށް ފަހު އޭޕްރީލް މަހުގެ ހަވަނަ ދުވަހު ޓެސްޓު ކުރުމަށް ފަހު ހަތްވަނަ ދުވަހު އޭނާ ދޫކޮށްލާފައިވާ ކަމަށެވެ. އެ ދެ ޓެސްޓްވެސް ނެގެޓިވް ކަމަށް އޭނާ ވިދާޅުވިއެވެ.
