މިހާރު ހަލުވިކަމާއެކު ދުނިޔޭގައި ފެތުރެމުންދާ ކޮވިޑް-19 ފެތުރެން ދިމާވި ސަބަބުތައް އަލުން ދެނެގަތުމަށްޓަކައި ހުށަހަޅާފައިވާ މިނިވަން އިންކިޔުރީގައި ދުނިޔޭގެ ސިއްހަތު ޖަމިއްޔާގެ ހުރިހާ ގައުމުތަކަކުންވެސް އެއްބާރުލުން ދޭންޖެހޭނެ ކަމަށް އޮސްޓްރޭލިއާގެ ބޮޑު ވަޒީރު ސްކޮޓް މޮރިސަން ވިދާޅުވެއްޖެ އެވެ.

މޮރިސަން ވިދާޅުވީ މިކަމާއި ގުޅިގެން ދުނިޔޭގެ ގައުމުތަކުގެ ލީޑަރުންނާ ބުދަ ދުވަހު މަޝްވަރާކުރެއްވި ކަމަށެވެ. އެގޮތުން ކޮވިޑް-19 އުފެދުނު ގޮތާއި އެފެތުރުނުގޮތް ދެނެގަތުމަށް އެމެރިކާގެ އެއްބާރުލުން ބޭނުންވާތީ އެކަމާއި އެމެރިކާގެ ރައީސް ޑޮނަލްޑް ޓްރަމްޕާވެސް މަޝްވަރާ ކުރައްވާފައިވާ ކަމަށް މޮރިސަން ވިދާޅުވި އެވެ.

އެވާހަކަތަކަށް އިޝާރާތްކުރައްވާ މޮރިސަން ވިދާޅުވީ މިކަމުގައި ޑަބްލިޔުއެޗްއޯއިން ކުރިޔަށްގެންދާ އިންކިޔުރީގައި މެމްބަރު ހުރިހާ ގައުމަކުން ބައިވެރިވުމަކީ ކޮންމެހެން ކުރަންޖެހޭ ކަމަކަށް ހަދަންޖެހޭ ކަމަށެވެ.

ނޫސްވެރިންނާ ވާހަކަ ދައްކަވަމުން މޮރިސަން ވިދާޅުވީ ދުނިޔޭގެ ސިއްހަތު ޖަމިއްޔާފަދަ ޖަމިއްޔާގެ މެމްބަރެއް ކަމުގައިވާނަމަ އެ މެމްބަރެއްގެ ޒިންމާތަކެއް ހުންނާނެކަމަށެވެ. އަދި ވަކިކަންތައްތަކެއް ކުރުން މަޖުބޫރު ވާގޮތަށް ހިމަނާފައި ހުންނަންޖެހޭނެ ކަމަށް މޮރިސަން ވިދާޅުވި އެވެ.

"މިފަދަ ވައިރަސްތަކުން ސަލާމަތްވެގެންވާ ދުނިޔެ އަށް ބޭނުންވަނީ. އެހެންކަމުން ކޮންމެ ގައުމެއްވެސް އެއީ ޗައިނާ ކަމުގައި ވީނަމަވެސް އަދި އެހެން ގައުމަކަށްވީ ނަމަވެސް ބޭނުންވާންވާނީ ހަމަ އެއް ކަމެއް." މޮރިސަން ވިދާޅުވި އެވެ.

ކޮވިޑް-19 އުފެދުނު ގޮތާއި ފެތުރެން ދިމާވި ގޮތްތަކާމެދު އެމެރިކާއިން އަންނަނީ ޗައިނާއަށް ބަހުގެ ހަމަލާތަކެއް ދެމުންނެވެ. އެގޮތުން އެވައިރަސް އަކީ ޗައިނާގެ ލެބޯޓްރީއެއްގައި އުފެއްދި ވައިރަސް އެއްކަމަށް އެމެރިކާގެ ރައީސް ތަކުރާރުކޮށް ވިދާޅުވަމުން ގެންދަވާއިރު ޗައިނާ އާއި ޑަބްލިޔުއެޗްއޯއިން އަންނަނީ އެކަން ދޮގުކުރަމުންނެވެ. އަދި މިހާތަނަށް އެފަދަ ހެއްކެތް ލިބިފައިނުވާކަމަށް ޑަބްލިޔުއެޗްއޯއިން ވަނީ ބުނެފަ އެވެ. އަނެއްކޮޅުން އެމެރިކާގެ ރައީސް ޓްރަމްޕް ވަނީ ޑަބްލިޔުއެޗްއޯއަށް އެމެރިކާއިން ދެމުންގެންދާ އެހީތައްވެސް ކަނޑާލާފަ އެވެ. އެކަމާއި ޑަބްލިޔުއެޗްއޯއިން އަންނަނީ ކަންބޮޑުވުން ފާޅުކުރަމުންނެވެ.