ފަޅުގައި އޮތް ދޯންޏެއް ވަގަށް ނަގައިގެން މާކުރަތަށް ދިޔަ ބަޔަކު ހައްޔަރުކޮށްފި

ރ އުނގޫފާރު ފަޅުގައި އޮތް ދޯންޏެއް ވެރިފަރާތަށް ނޭނގި އެ އަތޮޅު މާކުރަތަށް ގެންދިޔަ މައްސަލައެއް ފުލުހުން ބަލަން ފަށައިފިއެވެ.

އެކަމާ ގުޅޭގޮތުން ފުލުހުން ބުނީ، ރ އަތޮޅު އުނގޫފާރު ފަޅުގައި އޮތް ދޯންޏެއް ވެރިފަރާތަށް ނޭނގި ވަގަށް ނަގައިގެން ރ.މާކުރަތަށް ގެންގޮސްފައިވާ މައްސަލައެއް މިހިނގާ އޭޕްރީލް މަހުގެ 23 ވަނަ ދުވަހުގެ 00:15 ހާއިރު ފުލުހުންނަށް ހުށައެޅިފައިވާ ކަމަށެވެ.

އެގޮތުން މި މައްސަލައާ ގުޅިގެން 18 އަހަރުގެ 2 މީހުންނާއި، 28 އަހަރުގެ މީހަކާއި، 29 އަހަރުގެ މީހަކު ބުދަ ދުވަހުގެރޭ 00:50 ހާއިރު ހައްޔަރު ކޮށްފައިވާ ކަމަށް ފުލުހުން ބުނެއެވެ.

މި މައްސަލަ ފުލުހުން ދަނީ ތަހުޤީޤު ކުރަމުންނެވެ.

ކޮވިޑް-19 އާ ގުޅިގެން ރާއްޖޭގައި ސިއްޙީ ކުއްލި ނުރައްކަލުގެ ޙާލަތު އިއުލާނު ކޮށްފައި ވާއިރު، ރާއްޖެއިން ވައިރަސްގެ ކޮމިއުނިޓީ ސްޕްރެޑެއް ފެނުމާއެކު އެއް ރަށުން އަނެއް ރަށަށް ދަތުރު ކުރުމާ މެދު ހަރުކަށި އުސޫލުތަކެއް ވަނީ ކަނޑައެޅިފައެވެ. އަދި އެކަން ފުލުހުންވެސް ގާތުން ބަލައި ތަންފީޒު ކުރަމުންދެއެވެ.