އެޗްސީކިއުގެ 50،000 ގުޅަ އިންޑިއާ ސަރުކާރުން ރާއްޖެއަށް ހަދިޔާކޮށްފި
23 އެޕްރީލު 2020 | ބުރާސްފަތި 06:36މިއީ ކޮވިޑް-19 ޖެހޭ މީހުންނަށް ފަރުވާ ދިނުމަށް ބޭނުން ކުރާ ބޭހެއް
ރާއްޖެއަށް އެތެރެ ކުރި އެޗްސީކިއުގެ ބޭސް ފޮށިތަކެއް
ހައިޑްރޮކްސީކްލޮރޯކްއީން (އެޗްސީކިއު) ގެ 50،000 ގުޅަ އިންޑިއާ ސަރުކާރުން ރާއްޖެއަށް ހަދިޔާކޮށްފިއެވެ.
ކޮވިޑް-19 ހަލުހިކަމާއެކު ފެތުރެމުންދާއިރު، މިބޭހަކީ ކޮވިޑް-19 ޖެހޭ މީހުންނަށް ފަރުވާ ދިނުމަށް ބައެއް ގައުމުތަކުގައި ބޭނުންކުރާ ބޭހެކެވެ. މި ބޭސް ރާއްޖެއަށް ގެނެސްފައިވަނީ ބުދަ ދުވަހުގެ ރޭގެ ވަގުތެއްގައެވެ.
އިންޑިއާގެ ޗެންނާއީ އިން އައި ޤައުމީ އެއަރލައިން މޯލްޑިވިއަންގެ ފްލައިޓްގައި އެޗްސީކިއުގެ 50،000 ގުޅަ ގެނެސްފައިވާއިރު، މިއީ ދިވެހި ސަރުކާރުން އެދިގެން ފޯރުކޮށްދިން އެހީއެއް ކަމަށް ފޮރިން މިނިސްޓްރީން ބުނެއެވެ.
މިބޭހުގެ ޝިޕްމެންޓް ރާއްޖެއަށް އައިސްފައިމިވަނީ އިންޑިއާގެ ބޮޑުވަޒީރު ނަރެންދުރަ މޯދީ އާއި ރައީސް އިބްރާހިމް މުހައްމަދު ސޯލިހު މީގެ ދެ ދުވަސް ކުރިން ފޯނުން ގުޅުއްވައި މަޝްވަރާކުރައްވައިފައިވަނިކޮށެވެ.
ކޮވިޑް-19ގެ އިތުރުން އާތުރައިޓިސް އަދި ލޫޕަސް ފަދަ ބަލިތަކަށް ވެސް އެޗްސީކިއު ބޭނުންކޮށްގެން ފަރުވާ ދެ އެވެ. އެޗްސީކިއުގެ ސަޕްލައިގެ 70 އިންސައްތަ އުފައްދަނީ އިންޑިއާއިން ނެވެ.
