ކޮވިޑް-19 އާ ގުޅިގެން ރާއްޖެއަށް ދިމާވާނެ އިގްތިޞާދީ ދަތިކަން ފޫބެއްދުމަށްޓަކައި ބޭރުގެ އެކި ފަރާތްތަކުން 215.37 މިލިއަން އެމެރިކާ ޑޮލަރު ހޯދުމުގެ މަސައްކަތް ސަރުކާރުން މިހާރުވެސް ކުރައްވަމުން ގެންދަވާކަމަށް ފިނޭންސް މިނިސްޓްރީން ހާމަކުރައްވައިފި އެވެ.

ފިނޭންސް މިނިސްޓްރީން އެކަން ހާމަކޮށްފައިވަނީ ކޮވިޑް-19 އާ ގުޅިގެން އަންނަ އިގްތިޞާދީ އަދި މާލީ ލޮޅުމާއެކު ދައުލަތުގެ ޚަރަދުތަކަށް ބޭނުންވާ ކޭޝް ފްލޯ ހޯދުމަށް މަޖިލީހުން ބޭނުންވާ ހުއްދަތަށް ހޯދުމަށް މަޖިލީހަށް ފޮނުވާފައިވާ ކަރުދާހުގަ އެވެ. މިކަރުދާހުގައި ޖުމްލަ 11 ފަރާތަކުން އެހީތެރިކަން ހޯދުމަށް މަސައްކަތްކުރަމުން ގެންދަވާކަން ވަނީ ހާމަކޮށްފަ އެވެ.

އޭގެތެރޭގައި ވާ ކަންކަމަކީ:

- ވޯލްޑް ބޭންކުން - 30.10 މިލިއަން ޑޮލަރު ( މީގެ ތެރެއިން 10 މިލިއަން އެމެރިކާ ޑޮލަރު ކެޓް -

ޑީޑީއޯ ގެ ތެރެއިން ވަނީ ލިބިފައި، އަދި އެހެން މަޝްރޫޢު ތަކަށް ލިބިފައިވާ ފައިސާ ބަޖެޓް ސަޕޯޓަށް

ރީއެލޮކޭޓް ކުރުމަށް ދަނީ މަޝްވަރާ ކުރަމުން)

- އޭޝިއަން ޑިވެލޮޕްމަންޓް ފަންޑު - 27.60 މިލިއަން ޑޮލަރު (މަޝްވަރާގައި)

- އޭޝިއަން އިންފްރާސްޓްރަކްޗަރ އިންވެސްޓްމަންޓް ބޭންކް- 5 މިލިއަން ޑޮލަރު (މަޝްވަރާގައި)

- އިންޓަރނޭޝަނަލް މަނިޓަރީ ފަންޑު- 30 މިލިއަން ޑޮލަރު (މަޝްވަރާ ނިމި ބޯޑް އެޕްރޫވަލް

މަރުހަލާގައި)

- އިސްލާމިކް ޑިވެލޮޕްމަންޓް ފަންޑް- 25.59 މިލިއަން ޑޮލަރު (މަޝްވަރާގައި)

- އޯޕެކް ފަންޑު ފޮރ އިންޓަރނޭޝަނަލް ޑިވެލޮޕްމަންޓް (އޮފިޑް)- 20 މިލިއަން ޑޮލަރު (ފައިސާ ހަމަޖެހި ދޫކުރުމުގެ މަގުމަތީގައި)

- އިންޓަރނޭޗަނަލް ފައިނޭންސް ކޯޕަރޭޝަން (އައި.އެފް.ސީ)- 50 މިލިއަން ޑޮލަރު (މަޝްވަރާގައި)

- ސާކް ޑިވެލޮޕްމަންޓް ފަންޑު- 1.50 މިލިއަން ޑޮލަރު (މަޝްވަރާގައި)

- ވަރލްޑް ހެލްތު އޯގަނައިޒޭޝަން - 0.40 މިލިއަން ޑޮލަރު

- ޔުނިސެފް- 0.18 މިލިއަން ޑޮލަރު

- އެޗް.އެސް.ބީ.ސީ، އެސްޓީއޯ ޓްރޭޑް ފައިނޭންސް ފެސިލިޓީ- 25 މިލިއަން ޑޮލަރު (މަޝްވަރާގައި)

މީގެތެރެއިން ވޯލްޑް ބޭންކުގެ ފަރާތުން 10 މިލިއަން އެމެރިކާ ޑޮލަރު ލިބިފައިވާއިރު ޝަރުތަކާ ނުލާ އައިއެމްއެފުން ދިނުމަށް ހަމަޖެހިފައިވާ 30 މިލިއަން ޑޮލަރު ވަރަށް އަވަހަށް ލިބޭނެކަމަށް ފިނޭންސް މިނިސްޓަރ ވަނީ ވިދާޅުވެފަ އެވެ.

މީގެއިތުރުން ރަހުމަތްތެރި ޤައުމުތަކާއެކު ބައިލެޓެރަލް ގުޅުންތަކުގެ ތެރެއިން ފައިސާ އާއި ހިލޭ އެހީ ހޯދުމުގެ މަސައްކަތް ކުރަމުން ދާކަމަށް ފިނޭންސް މިނިސްޓްރީން ވަނީ ބުނެފައެވެ.

ކޮވިޑް-19 އާ ގުޅިގެން ސަރުކާރުގެ ޚަރަދުތައް ކުޑަކުރުމަށް މިހާރުވެސް ބަޖެޓުން 1 ބިލިއަން ރުފިޔާ ކުޑަކޮށްފައި ވާއިރު އިތުރަށްވެސް ޚަރަދު ކުޑަކުރުމުގެ މަސައްކަތްތަކެއް ކުރައްވާނޭ ކަމަށް ފިނޭންސް މިނިސްޓަރގެ ހުށަހެޅުއްވުމުގައި ވިދާޅުވެފައިވެއެވެ.