ކޮވިޑް-19 ޖެހިގެން ޕާކިސްތާނުގައި މިހާތަނަށް އެންމެ ގިނަ އަދަދެއްގެ ބަޔަކު މަރުވީ އިއްޔެ
21 އެޕްރީލު 2020 | އަންގާރަ 14:49ހޯމަ ދުވަހު އެކަނި 17 މީހުން ވައިރަސް ޖެހިގެން މަރުވެފައިވޭ
ޕާކިސްތާނުގައި ވައިރަސް ޖެހޭ މީހުންގެ އަދަދު އަންނަނީ އިތުރުވަމުން
ކޮވިޑް-19 ޖެހިގެން މިހާތަނަށް އެންމެ ގިނަ އަދަދެއްގެ ބަޔަކު އެއްދުވަހާއި މަރުވެފައިވަނީ ހޯމަ ދުވަހު ކަމަށް އެގައުމުގެ ސަރުކާރުން ހާމަކޮށްފި އެވެ.
އެގޮތުން ހޯމަ ދުވަހު އެކަނި 17 މީހުން ވައިރަސް ޖެހިގެން މަރުވެފައިވާއިރު އިއްޔެ އެކަނި އަލަށް އެގައުމުގެ 705 މީހަކަށް ވަނީ ވައިރަސް ޖެހިފަ އެވެ. އެއާއެކު އެގައުމުގައި ވައިރަސް ޖެހުނު މީހުންގެ އަދަދުވަނީ 9214 ށް އަރާފަ އެވެ. އަދި މަރުވި މީހުންގެ އަދަދު ވަނީ 192 ށް އަރާފަ އެވެ.
ޕާކިސްތާނުން އަންނަނީ ލޮކްޑައުންގައި އޮތުމުގެ ސަބަބުން އެގައުމުގެ އިގްތިޞާދަށް އަސަރު ކުރަމުންދާތީ އެކަމުން އަރައިގަތުމަށް ލޮކްޑައުންގައި އަޅާފައިވާ ފިޔަވަޅުތައް ނިމުމަކަށް ގެނައުމަށް މަސައްކަތްކުރަމުންނެވެ. މިހާތަނަށް ކޮވިޑް-19 ޖެހިގެން އެގައުމުގެ 2053 މީހުން ވަނީ ރަނގަޅުވެފަ އެވެ. މިހާރު އެގައުމުގައި ވައިރަސް ޖެހިފައިވާ އެކްޓިވް މީހުންގެ އަދަދު އުޅެނީ 6969 ގައެވެ.
ޕާކިސްތާނުގައި ޕޮޒިޓިވްވާ މީހުންގެ އަދަދު އިތުރުވެފައިވަނީ އެގައުމުގައި މިވައިރަސް އަށް ޓެސްޓް ކުރާ މީހުންގެ އަދަދު އިތުރުވަމުންދިޔުމާ ގުޅިގެންނެވެ. އެގޮތުން ދުވާލެއްގެ މައްޗަށް އެގައުމުގައި 25،000 ޓެސްޓް ހަދަމުންދާއިރު މިހާތަނަށް އާއިރު ޕާކިސްތާނުގައި ވަނީ 111،806 ޓެސްޓް މިވައިރަސް ހުރިތޯ ބެލުމަށް ހަދާފަ އެވެ. އެއީ އެގައުމުގެ ކޮންމެ އެއްހާސް މީހަކަށް 0.53 ޓެސްޓެވެ. އެގައުމުގައި ހޯމަ ދުވަހު އެކަނިވެސް 5347 މީހުން ވަނީ ވައިރަސް ހުރިތޯ ބެލުމަށް ޓެސްޓް ކޮށްފަ އެވެ.
ޕާކިސްތާނުގައި އެންމެ ފުރަތަމަ ކޮވިޑް-19 ޖެހެންފެށީ އިރާނުންނާއި އެހެން ގައުމުތަކުން އެގައުމަށް އެތެރެވި މީހުންގެ ފުށުންނެވެ. އެއާއެކު އެގައުމުގެ ތެރޭގައި އާންމުންގެ މެދުގައި ވައިރަސް ފެތުރެންފެށި އެވެ. ޕާކިސްތާނުގެ ހެލްތު މިނިސްޓަރ ޒަފަރް މިރްޒާ ނޫސްވެރިންނާ ބައްދަލުކުރައްވާ ވާހަކަ ދައްކަވަމުން ވިދާޅުވީ މިހަފްތާގައި ވައިރަސް ޖެހިފައިވާ މީހުންގެ ތެރެއިން 65 އިންސައްތައަކީ އެގައުމުގެ އާންމުންގެ މެދުގައި މިވައިރަސް ފެތުރިގެން ރިކޯޑްކުރެވިފައިވާ އަދަދުތައް ކަމަށެވެ.
އަނެއްކޮޅުން ޕާކިސްތާނުގެ އެކި ސަރަހައްދުތަކުގައި މަސައްކަތްކުރަމުންދާ ޑޮކްޓަރުން ވަނީ އާދިއްތަ ދުވަހު ގްރޭންޑް ނޭޝަނަލް ހެލްތު އެލިއަންސް އެއް އުފައްދާ އެމީހުންގެ ސަލާމަތާއި ރައްކާތެރިކަމަށް އެކަށީގެންވާ މިންވަރަށް ތަކެތި ނެތުމުގެ ސަބަބުން އެކަމާދެކޮޅަށް އަޑުއުފުލާފަ އެވެ. މިއަޑުއުފުންލުންތައް މިއައީ އެގައުމުގައި މަސައްކަތްކުރާ ޒުވާން ޑޮކްޓަރުން އެމީހުންނަށް ބޭނުންވާ ޕީޕީއީ ކިޓްސްތައް ނެތުމުގެ ސަބަބުން އެކަމާ ދެކޮޅަށް މުޒާހަރާ ކޮށްފައިވަނިކޮށެވެ. ލާހޫރްގައި މުޒާހަރާކުރި މިމީހުން ބުނަމުންދިޔައީ ސިއްހީ މަސައްކަތްތެރިންނަށް ވައިރަސް އިން ރައްކާތެރިވުމަށް އެކަށީގެންވާ އިންތިޒާމުތަކެއް ހަމަޖެއްސުމަށެވެ.
މީގެއިތުރުން ކުރިޔަށް އޮތް ރަމަޟާން މަހު އެގައުމުގެ މިސްކިތްތައް ހުޅުވުމާމެދު ބޮޑު ވަޒީރު އިމްރާން ޚާން ވަނީ އެގައުމުގެ އިސް ދީނީ ލީޑަރުންނާއި މަޝްވަރާކުރައްވާފައެވެ. އެގޮތުން ރަމަޟާން މަހު މިސްކިތައް ހުޅުވުމަށް އެގައުމުގެ ސަރުކާރުން ކުރިން ނިންމާފައިވާ ނިންމުން ތަންފީޒުކުރުމަށް އިޖުތިމާޢީ ގައިދުރުކަން ހުރިކަން ޔަގީންކުރުމަށް 20 ކަމެއް ހިމެނޭ ގައިޑްލައިނެއް ވަނީ އެކުލަވާލާފަ އެވެ.
މިހާތަނަށް އާއިރު އެގައުމުގެ ސަރުކާރުން މިކަމާއި ގުޅޭގޮތުން އެކުލަވާލާފައިވާ ޕްލޭނުގައި ވަކި މިންވަރަކަށް މީހުންނަށް މިސްކިތްތަކުގައި ތަރާވީޚު ނަމާދު ކުރުމަށް ހުއްދަ ދިނުމަށެވެ. އެހެންނަމަވެސް ރޯދަ ވީއްލުމާއި ހާރުކެއުމުގެ ކަންކަން މިސްކިތްތަކުގައި ކުރިޔަށް ނުގެންދެވޭނެކަމަށް އެގައުމުގެ ސަރުކާރުން ބުނެއެވެ.
