އަންގާރަ ދުވަހު މާލެއިން ކޯވިޑު19އަށް، ފައްސިވި މީހުންގެ ތެރޭގައި ހިމެނޭ، 80 އަހަރުގެ ދިވެއްސަކީ ސްޓްރޯކެއް ޖެހިފައިވާ އަދި މީގެ އިތުރުން، ބައެއް ބަލިތަކަށް ފަރުވާ ހޯދަމުން އަންނަ މީހެއް ކަމަށް ނެޝަނަލް އެމަރޖެންސީ އޮޕަރޭޝަން ސެންޓަރ (އެންއީއޯސީ) ން ހާމަކޮށްފިއެވެ.

އަންގާރަ ދުވަހު އެންއީއޯސީން ބޭއްވި ނޫސްވެރިންގެ ބައްދަލުވުމުގައި އައިޖީއެމްއެޗްގެ ޑރ. މޫސާ ހުސައިން ވިދާޅުވީ، 80 އަހަރުގެ މީހާއަކީ ސްޓްރޯކެއް ޖެހުމުގެ ސަބަބުން 2 އަހަރު ވަންދެން އެދުމަތިވެފައިވާ މީހެއް ކަމަށެވެ. އޭނާއަކީ ހަކުރު ބައްޔާއި، ކްލޮސްޓްރޯލް އަދި ލޭމައްޗަށް ދިއުންފަދަ ބަލިތަކަށް ފަރުވާ ހޯދަމުން އަންނަ މީހެއް ކަމަށާއި، މީގެ އިތުރުން ނިއުމޯނިއާ ޖެހިފައިވާ މީހެއް ކަމަށް ވެސް ޑރ. މޫސާ ވިދާޅުވިއެވެ.

ޑރ. މޫސާ ވިދާޅުވީ މިފަދަ ބަލި މީހަކަށް ކޮވިޑް-19 ޖެހިއްޖެ ނަމަ، އެމީހެއްގެ ހާލު ވަރަށް ބޮޑަށް ދަށްވެގެން ހިނގައިދާނެއެވެ. ޑރ. މޫސާ އަންވަރު ވިދާޅުވި ގޮތުންނަމަ، މީހެއްގެ ހަށިގަނޑުގައި އޮކްސިޖަން ލެވެލް ހުންނަން ޖެހޭނީ 98 އިންސައްތައިގައެވެ.، ނަމަވެސް 80 އަހަރުގެ މީހާގެ ހަށިގަނޑުގައި އޮކްސިޖަން ލެވެލް ހުރީ 94 އިންސައްތައިގައެވެ. އެހެންކަމުން މިއީ އިންޒާރުގެ މެސެޖެއް ކަމަށް އޭނާ ވިދާޅުވިއެވެ.

ޑރ. މޫސާ ވިދާޅުވީ 80 އަހަރުގެ މީހާ ބައްޔަށް ހުށަހެޅިގެން ދިއުމަކީ މި ބަލި ފެތުރިގެން ގޮސްފައިވާ މިންވަރު ދައްކުވައިދޭ ކަމަށެވެ.

80 އަހަރުގެ މީހާ އަށް މިވަގުތު ދަނީ ދަރުމަވަންތަ ހޮސްޕިޓަލުގެ 11 ވަނަ ފަންގިފިލާގައި ފަރުވާ ދެމުންނެވެ. 11 ވަނަ ފަންގިފިލާއަކީ ކޮވިޑް-19 އާއި ގުޅިގެން ހާލުބޮޑުވާ ބަލި މީހުންނަށް ފަރުވާ ދިނުމަށް ހާއްސަކޮށްފައިވާ ތަނެކެވެ.