މާލެ ސަރަޙައްދުން އިތުރު 13 މީހަކު ކޮވިޑް-19 އަށް ޕޮޒިޓިވްވެއްޖެ
ކޮމިއުނިޓީ ސްޕްރެޑެއް ފުރަތަމަ ފެނިފައިވަނީ އޭޕްރީލް 15 ގައި
އައިޖީއެމްއެޗް ލެބް- ކޮވިޑް19 ގެ ސާމްޕަލްތައް ޓެސްޓު ކުރަނީ މި ލެބްގައި
މާލެ ސަރަޙައްދުން އިތުރު 13 މީހަކު ޕޮޒިޓިވް ވެފައިވާކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ)އިން ބުނެފިއެވެ.
އަންގާރަ ދުވަހު އެޗްޕީއޭއިން ކުރި ޓްވީޓެއްގައި ބުނީ، ކޮވިޑް-19 އަށް ޓެސްޓް ކުރި 8 ދިވެހިންނާއި، 5 ބަނގްލަދޭޝް ރައްޔިތުން ކޮވިޑް-19 އަށް ޕޮޒިޓިވް ވެފައިވާ ކަމަށާއި، އެ ފަރާތްތައް އައިސޮލޭޓް ކުރުމުގެ މަސައްކަތް ކުރަމުންދާ ކަމަށެވެ.
އެއާއެކު މާލެ ސަރަޙައްދުން ފެނުނު ޖުމުލަ ކޭސްތަކުގެ އަދަދު 62 އަށް ވަނީ އަރާފައެވެ.
ރާއްޖެއިން ކޮމިއުނިޓީ ސްޕްރެޑް ކޭސްއެއް އެންމެ ފުރަތަމަ ފެނިފައިވަނީ މިހިނގާ އޭޕްރީލް މަހުގެ 15 ވަނަ ދުވަހުއެވެ. އޭގެ ފަހުން މިހާތަނަށް އައިއިރު ދުވާލެއްގެ މައްޗަށް ގިނަ ޕޮޒިޓިވް ކޭސްތަކެއް ދަނީ ފެންނަމުންނެވެ. އަދި އެ ކޭސްތަކާއި ގުޅިގެން ކޮންޓެކްޓް ޓްރޭސިންގއާ ސާމްޕަލް ނެގުމުގެ މަސައްކަތް މިހާރުވެސް ކުރިއަށްދާއިރު، މާލެ ސަރަޙައްދު ވަނީ ލޮކްޑައުންވެސް ކޮށްފައެވެ.
އޭގެ އިތުރުން، އަންގާރަ ދުވަހު މި ފެނުނު 13 ކޭސްއާއެކު، އޭޕްރީލް މަހުގެ 21 ވަނަ ދުވަހު ކޮވިޑް-19 އަށް ޕޮޒިޓިވްވި މީހުންގެ އަދަދު އަންގާރަ ދުވަހުގެ މެންދުރު 12:00 ގެ ނިޔަލަށް ވަނީ 15 އަށް އަރާފައެވެ.
އަދި ރާއްޖެއިން ކޮވިޑް-19 އަށް ޕޮޒިޓިވްވި ޖުމުލަ މީހުންގެ އަދަދު 82 އަށް ވަނީ އަރާފައެވެ.
