ބީއެޗްއެމްގެ ހުރިހާ ހިދުމަތެއް މެދުކަނޑާލައިފި
ހުރިހާ މުވައްޒަފުން ވަނީ އެކަހެރިވެފައި
ބީއެޗްއެމް ޓްރޭޑާސްގެ ލޯގޯ
މާލެގައި ހިންގަމުން އަންނަ ބީއެޗްއެމް މުވައްޒަފަކު ކޮވިޑް-19 އަށް ޕޮޒިޓިވްވުމާއި ގުޅިގެން އެކުންފުނީގެ ފިހާރަތައް ބަންދުކޮށް, ދެމުންއައި ހިދުމަތްތައް މެދުކަނޑާލައިފިއެވެ.
ބީއެޗްއެމުން ބުނީ، އެ ކުންފުނީގެ ފިހާރާގައި މަސައްކަތްކުރާ މުވައްޒަފަކު ކޮވިޑް-19 އަށް ޕޮޒިޓިވްވެފައިވާކަން ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އެންގުމާއި ގުޅިގެން ހުރިހާ ހިދުމަތްތަކެއް މެދުކަނޑާލައި، ޓެސްޓުތަކާއި ކޮންޓެކްޓް ޓްރޭސިން ހެދުމުގެ މަގުފަހިކުރުމުގެ ގޮތުން ހުރިހާ މުވައްޒަފުން ގޭގައި އެކަހެރިވެފައިވާ ކަަމަށެވެ.
ފިހާރަ ބަންދުކުރުމުގެ ސަބަބުން ދިމާވާނެ ދަތިތަކަށް ބީއެޗްއެމްއިން ވަނީ މާފަށް އެދިފައެވެ. އަދި ކަމާއިބެހޭ ފަރާތްތަކުގެ އިޒުނަ ލިބޭހާ އަވަހަކަށް ހިދުމަށް ފެށުމަށް އެ ކުންފުނިން ތައްޔާރަށް އޮތް ކަމަށް ބީއެޗްއެމް ޓްރޭޑަސް އިން ނެރެފައިވާ ބަޔާނެއްގައި ބުންޏެވެ.
ރާއްޖެއިން ޕޮޒިޓިވްވި މީހުންގެ ތެރެއިން 53 ވަނަ މީހާ އަކީ ބީއެޗްއެމް ޓްރޭޑާސްގައި ޑެލިވަރީގައި މަސައްކަތް ކުރާ ފަރާތެކެވެ.
މާލެއިން ޕޮޒިޓިވްވި މީިހުންގެ ތެރޭގައި އިހުސާން ފިހާރާއިގެ އިތުރުން ބާޒާރު މަތީގައި ހުންނަ ލިލީ ސްޓޯރްގެ މުވައްޒަފަކު ހިމެނެއެވެ. އެ މީހުންނާ ގުޅުން ހުރި މީހުންގެ ކޮންޓެކްޓް ޓްރޭސިންގެ މަސައްކަތް އެޗްޕީއޭއިން ދަނީ ކުރަމުންނެވެ.
