"ލިވަޕޫލް-އެތުލެޓިކޯ މެޗު ކުރިއަށް ދިޔައީ ގޯސް ވަގުތެއްގައި"

ޔުއެފާ ޗެމްޕިއަންސް ލީގުގެ ދެވަނަ ބުރުގެ ދެވަނަ ލެގުގައި ލިވަޕޫލް ދަނޑުގައި އެތުލެޓިކޯ މެޑްރިޑާއި ދެކޮޅަށް ކުޅުނު މެޗު ކުރިއަށްދިޔައީ ގޯސް ވަގުތެއްގައި ކަމަށް މެޑްރިޑްގެ މޭޔަރު ހޯސޭ ލުއިޒް މާޓިނޭޒް-އަލްމެއިޑާ ވިދާޅުވެއްޖެ އެވެ.

އެންފީލްޑް ސްޓޭޑިއަމްގައި ލިވަޕޫލް އާއި އެތުލެޓިކޯ ބައްދަލުކުރި މެޗު ކުޅެފައިވަނީ މިދިޔަ މާޗު މަހުގެ 11 ވަނަ ދުވަހު އެވެ. މި މެޗަށްފަހު ޔުއެފާއިން ވަނީ ޗެމްޕިއަންސް ލީގުގެ މެޗުތައް ފަސްކޮށްފައެވެ. ރިޕޯޓުތައް ބުނާ ގޮތުން 3-2 އިން އެތުލެޓިކޯ މޮޅުވި މެޗު ބަލަން ސްޕެއިނުން 3،000 ސަޕޯޓަރުން ވަނީ އިންގްލެންޑުގެ ލިވަޕޫލަށް ގޮސްފައެވެ.

މެޑްރިޑްގެ މޭޔަރު ހޯސޭ ލުއިޒް މާޓިނޭޒް-އަލްމެއިޑާ ވިދާޅުވީ މި މެޗު ކުޅުނީ ގޯސް ވަގުތެއްގައި ކަމަށާއި، އެގޮތުން މި މެޗު ކުޅުމުގެ ދެ ދުވަހެއް ކުރިން ސްޕެއިންގެ އެކި ސަރަހައްދުތަކުގައި 1،000 މީހުންނަށް ވުރެން ގިނަ މީހުން އެއްވެ އުޅުން މަނާކޮށް، ސްކޫލުތައް ވެސް ބަންދުކޮށްފައިވާ ކަމަށެވެ. އެ ފަދަ ހާލަތެއްގައި ސްޕެއިންގެ ބަޔަކު ވެސް އެހެން ގައުމަކަށް ގޮސް ގިނަ ބަޔަކު އެއްވެ އުޅުން ރަނގަޅު ނޫން ކަމަށް ވިދާޅުވި އެވެ.

ރިޕޯޓުތައް ބުނާ ގޮތުން ލިވަޕޫލާއި އެތުލެޓިކޯ މެޗަށް ފަހު އެ ސަރަހައްދުން ކޮރޯނާވައިރަސް (ކޮވިޑް-19) އަށް ޕޮޒިޓިވްވި މީހުންގެ އަދަދު އިތުރު ވެގެން ދިޔައެވެ. އަދި އެ މެޗަށް ދިޔަ ގިނަ ބަޔަކަށް ވެސް އެ ވައިރަސް ޖެހިފައިވާ ކަމަށް ރިޕޯޓުތައް ބުނެއެވެ.

އިނގިރޭސިވިލާތުން މިހާތަނަށް 120،000 އަށް ވުރެ ގިނަ މީހުންނަށް ކޮވިޑް-19 ޖެހިފައިވާއިރު، ސްޕެއިނުން މި ވައިރަހަށް ޕޮޒިޓިވްވި މީހުންގެ އަދަދު ވަނޫ 200،000 އަށްވުރެ މައްޗަށް އަރާފައެވެ.

ކޮވިޑް-19 އާ ގުޅިގެން މުއްދަތެއް ނެތް ގޮތަށް ޗެމްޕިއަންސް ލީގުގެ ކުޅުން މެދުކަނޑާލާފައިވާއިރު، ޗެމްޕިއަންސް ލީގުގެ ފައިނަލް މެޗު އޮގަސްޓް މަހުގެ 29 އަށް ތާވަލުކުރަން ޔުއެފާއިން މިހާރު އަންނަނީ މަޝްވަރާ ކުރަމުންނެވެ. މީގެ ކުރިން ޗެމްޕިއަންސް ލީގުގެ ފައިނަލް މެޗު ކުޅުމަށް ތާވަލުކޮށްފައި އޮތީ މެއި މަހުގެ 30 ވަނަ ދުވަހު ތުރުކީގެ އިސްތަންބޫލް ގައެވެ.

ޗެމްޕިއަންސް ލީގާ ގުޅޭ ގޮތުން މަޝްވަރާ ކުރަން ޔުއެފާއިން ނިންމާފައިވާއިރު، މި މުބާރާތް އަލުން ފަށާނެ ހާލަތެއް ނުލިބި ގިނަ ދުވަސްތަކެއް ވެއްޖެނަމަ، މުބާރާތް ކެންސަލްކުރަން ޖެހިދާނެ ކަމަށްވެސް ޔުއެފާ އިން މީގެ ކުރިން ވަނީ ބުނެފައެވެ.