ނޭމާ އަލުން ބާސާއަށް ގެންނަށް މެސީ އަދިވެސް ބޭނުންވޭ: ރޮސެލް

ނޭމާ އަލުން ބާސެލޯނާއަށް ގެންނަށް ލިއޮނެލް މެސީ ބޭނުންވާ ކަމަށް އެކްލަބުގެ ކުރީގެ ރައީސް ސެންޑްރޯ ރޮސެލް ވިދާޅުވެއްޖެ އެވެ.

ބާސާ ދޫކޮށް 2017 ވަނަ އަހަރު ނޭމާ ޕީއެސްޖީއަށް ބަދަލުވީ ދުނިޔޭގެ ރެކޯޑް އަގެއް ކަމަށްވާ 222 މިލިއަން ޔޫރޯ އަށެވެ. އެކަމަކު ބާސާއިން ވަނީ އެޓީމުގެ ކުރީގެ ކުޅުންތެރިޔާ އަލުން އަނބުރާ ގެނައުމަށް މިސީޒަން ފެށުމުގެ ކުރިން ވެސް މަސައްކަތް ކޮށްފައެވެ. އަދި ނޭމާ ވެސް ވަނީ އޭނާ އެނބުރި ބާސާއަށް ބަދަލުވާން ބޭނުންވާކަން ހާމަކޮށްފައެވެ.

މީގެ ކުރިން ބާސާގެ ކެޕްޓަން ލިއޮނެލް މެސީ ވެސް ވަނީ ނޭމާ ގެންނަން ބޭނުންވާކަން މީޑިއާގައި ހާމަކޮށްފައެވެ. އެގޮތުން އޭރު މެސީ ބުނީ ނޭމާ ބާސާ ދޫކޮށް ދިޔައީ އެންމެ ރަނގަޅު ގޮތުގައި ނޫން ކަމަށް ވިޔަސް، އޭނާ އަށް ހުރިހާ ދޮރެއް ބަންދުނުކުރާނެ ކަމަށެވެ.

ދާދި ފަހުން ބާސާގެ ކުރީގެ ރައީސް ސެންޑްރޯ ރޮސެލް ވިދާޅުވީ މެސީ އަބަދުވެސް ނޭމާ ގެންނަން ބޭނުންވާ ކަމަށެވެ. އަދި ބާސާގެ ރައީސްގެ މަގާމުގައި އަދިވެސް އޭނާ ހުރިނަމަ، ނޭމާ ގެންނާނެ ކަމަށްވެސް ވަނީ ވިދާޅުވެފައެވެ.

2013 ވަނަ އަހަރު ނޭމާ ބާސާއަށް ބަދަލުވިއިރު، އޭރު ބާސާގެ ރައީސަކީ ރޮސެލް އެވެ.

ރިޕޯޓުތައް ބުނާ ގޮތުން ނޭމާ އަލުން އަނބުރާ ހޯދުމަށް ބާސާއިން އަންނަނީ މަސައްކަތް ކުރަމުންނެވެ. އެގޮތުން ކުރިއަށް އޮތް ޓްރާންސްފާ ބާޒާރުގައި ބާސާއިން އެ ޓީމުގެ ފްރާންސް ފޯވާޑް އެންޓޮއިން ގްރީޒްމަން އާއި ޕީއެސްޖީގެ ނޭމާ ބަދަލުކުރަން ހުށަހަޅަން ތައްޔާރުވަމުން އަންނަ ކަމަށް ރިޕޯޓުތައް ބުނެއެވެ.

ދާދި ފަހުން ފީފާއިން އެކުވާލި އާ ޓްރާންސްފާ ގަވާއިދުގައިވާ ގޮތުން އެއްބަސްވުން އުވާލަން ދައްކަން ޖެހޭ އަދަދު ނުހިމަނައި ހަދާ އެއްބަސްވުންތަކުގެ ފުރަތަމަ ތިން އަހަރު ހަމަވުމާއެކު، ކުޅުންތެރިޔާ ކްލަބު ބަދަލުކުރަން ބޭނުންވެއްޖެނަމަ، އެ ކުޅުންތެރިޔާ ވިއްކާނެ އަގެއް ކަނޑައަޅާނީ ފީފާއިންނެވެ. ސްޕެއިންގެ މީޑިއާ ރިޕޯޓުތައް ކުރިން ބުނި ގޮތުގައި ފީފާ އިން ނޭމާގެ އެއްބަސްވުމަށް ބެލުމަށް ފަހު، އޭނާގެ އަގު ކަނޑަޅާއިރު އެ އުޅޭނީ 180 މިލިއަން ޔޫރޯގަ އެވެ. އެހެންކަމުން ބާސާއިން ނޭމާ ހޯދަން ކުރާ ބިޑުގައި މި ސީޒަނުގައި އެ ޓީމާ ގުޅުނު ގްރީޒްމަން ހިމަނާނެ ކަމަށްވެސް ރިޕޯޓުތައް ބުނެއެވެ.

2017 ވަނަ އަހަރު ޕީއެސްޖީއާ ގުޅުނު ނޭމާއަށް އަދި މިހާތަނަށް އެޓީމުގައި އެންމެ އެދެވޭ ކުޅުމެއް ދެއްކިފައި ނުވި ނަމަވެސް، މިހާތަނަށް އޭނާ ޕީއެސްޖީއަށް ކުޅެދިން 52 މެޗުގައި ވަނީ 47 ލަނޑު ކާމިޔާބުކޮށްފައެވެ.