ހއ. އުލިގަމުން ކޮވިޑް-19 އަށް މީހަކު ޕޮޒިޓިވް ވެއްޖެ، އުލިގަމު މޮނީޓަރިން ހާލަތަށް

ރާއްޖޭގެ އެންމެ އުތުރުގައި އޮންނަ ހއ. އުލިގަމުން ކޮވިޑް-19 އަށް މީހަކު ޕޮޒިޓިވް ވެއްޖެ އެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ، ކޮވިޑް-19އަށް ޝަކުކުރެވޭ ހއ. އުލިގަމު މީހަކު ޕޮޒިޓިވްވެފައިވާ ކަމަށެވެ.

އުލިގަމުން މީހަކު ޕްޒިޓިވް ވެފައިވާތީ، ރަށް ވަނީ މޮނީޓަރިންގގެ ހާލަތަށް ގެނެސްފަ އެވެ. މީގެއިތުރުން އިހަވަންދޫ، އަދި ވައިކަރަދޫ ވެސް ވަނީ މޮނީޓަރިންގ ހާލަތަށް ގެނެސްފަ އެވެ.

އެނގިފައިވާ ގޮތުގައި، މިމީހާއަކީ މާލެގައި "ގާކޮށި ފްލެޓް"ގައި އުޅުމަށްފަހު އުލިގަމަށް ކަނޑު ބޯޓަކުން މީގެ ހަތަރު ދުވަސްކުރިން އުލިގަމަށް ދިޔަ މީހެއް ކަމަށް ވެއެވެ. ގާކޮށީގައި އުޅުނު މީހަކު މީގެކުރިން ޕްޒިޓިވްވެފައިވާތީ، އޭނާއާ ކޮންޓެކްޓްވި މީހެއް ކަމަށް ބެލެވެއެވެ. އެމީހާ އުލިގަމަށް ފުރިއިރު، ގާކޮށި މީހާ ކޮވިޑް-19އަށް ޕޮޒިޓިވްވިކަން ހާމައެއް ނުވެއެވެ.

އެނގިފައިވާ ގޮތުގައި އެބޯޓަކީ އިހަވައްދޫ ބޯޓެކެވެ. އެބޯޓު، އިހަވަންދޫ، ތަކަންދޫ އަދި އުލިގަމަށް ދަތުރުކުރި ކަމަށް ވެއެވެ.

އުލިގަމު މިމީހާއެކު ރާއްޖޭގައި ކޮވިޑް-19 އަށް ޕޮޒިޓިވް މީހުންގެ އަދަދު 51 އަަށް އެރީ އެވެ. މިއީ މާލެ ސަރަހައްދު ވިފަވައި މީހުން ދިރިއުޅޭ ރަށަކުން މީހަކު ޕޮޒިޓިވްވި ފުރަތަމަ ކޭސް އެވެ.

މިބަލިން 16 މީހަކު ރަނގަޅު ވެފައިވާއިރު، ރާއްޖޭގައި މިހާތަނަށް މިބަލީ ގައި މީހަކު މަރުވެފައެއް ނުވެއެވެ.

މާލޭގައި މިހާތަނަށް 14 މީހަކު ޕްޒިޓިވްވެފައިވާއިރު، މާލެ ސަރަހައްދުވަނީ ކޮލްޑައުންކޮށްފަ އެވެ.