މާލޭގެ ކޮންމެ ގެއަކަށް ތިން ދުވަހުން އެއް ދުވަހު ކޮންމެވެސް އެކަކަށް ޒަރޫރީ ބޭނުންތަކުގައި ބޭރަށް ނިކުތުމުގެ ހުއްދަދޭން ނިންމައިފި އެވެ.

ހޮނިހިރު ދުވަހުގެރޭ ނެޝަނަލް އެމެޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެސިސްޓެންޓް ކޮމިޝަނަރ އޮފް ޕޮލިސް ޑރ. އަބްދުﷲ ފައިރޫޝް ވިދާޅުވީ، ކޮންމެ ތިން ދުވަހު އެއް ދުވަހު ޒަރޫރީ ބޭނުންތަކުގައި ބޭރަށް ނިކުންނަން ވަގުތީ ހުއްދައެއް ދިނުމަށް ނިންމާފައިވާ ކަމަށެވެ.

އޭނާ ވިދާޅުވީ، ގެއިން ބޭރަށް ނިކުންނަން ހުއްދަ ލިބުމުން، ކިއުއާރް ކޯޑެއް ލިބޭނެ ކަމަށެވެ. އެ ހުއްދައިގެ ދަށުން މަގުމައްޗަށް ނިކުންނަ މީހާގެ ފޯނުގައި ހުންނަ ކިޔުއާރް ކޯޑުން އެ މީހަކު ދާތަނެއް ނުވަތަ ހުއްދަ ދެވިފައިވާ ސަރަހައްދު ފުލުހުންނަށް ބެލޭނެ ކަމަށެވެ. އަދި އެއާއި އެކު ހުއްދަ ނުދޭ ޒޯނަކަށް މީހަކު ދާނަމް އެކަންވެސް އެނގިގެންދާނެ ކަމަށް އޭނާ ވިދާޅުވި އެވެ.

ފައިރޫޝް ވިދާޅުވި ގޮތުގައި، މި ފިޔަވަޅަކީ ލޮކްޑައުން ހާލަތުގައި މީހުން ބޭރަށް ނިކުމެ އުޅޭ މިންވަރު ކޮންޓްރޯލް ކުރުމުގެ ގޮތުން އަޅާ ފިޔަވަޅެކެވެ.

ފައިރޫޝް ވިދާޅުވީ، ޒޯންތައް 26 ބަޔަކަށް ބަހާލެވިފައިވާ ކަމަށާއި، ޒޯންތައް ބަހާލުމުގައި މާލޭގެ އާބާދީއާއި، ފިހާރަތައް ހުރި ސަރަހައްދަށް ބަލާފައިވާނެ ކަމަށެވެ.

އޭސީޕީ ވިދާޅުވީ، މަގުމަތީގައި ނިކުމެ އުޅޭ މީހުންނާ މެދު ފިޔަވަޅު އަޅަން ފެށީ ފުރުސަތު ދިނުމަށް ފަހުވެސް މަގުމަތީގައި އުޅޭ މީހުންގެ އަދަދު ގިނަވުމުން ކަމަށެވެ. އެކަމަކު ގާނޫނީ ގޮތުން ފިޔަވަޅު އަޅަން ޖެހޭ ފަދަ ކަމެއް ދިވެއްސަކު ކޮށްފައިނުވާ ކަމަށް އޭނާ ފާހަގަކުރެއްވި އެވެ.