ރަށްރަށަށް ދިޔަ ފަރާތްތައް އައިސޮލޭޓް ވާން އަންގައިފި!
18 އެޕްރީލު 2020 | ހޮނިހިރު 17:53ރަށްރަށަށް ދިޔަ ފަރާތްތައް އަމިއްލައަށް ކަރަންޓިން ވާންޖެހޭ
މާލެއިން މީހުން ފުރުން
މާލެ، ހުޅުމާލެ، ވިލިމާލެ، ގުޅިފަޅު، ތިލަފުށިން ދިވެހިރާއްޖޭގެ އެހެން ރަށްރަށަށް ދަތުރުކޮށްފައިވާ ފަރާތްތައް އެކަހެރިވުމަށް އެޗްޕީއޭއިން އަންގައިފި އެވެ.
އެގޮތުން ހޮނިހިރު ދުވަހުގެ އެޗްޕީއޭއިން ނެރެފައިވާ އިއުލާނުގައި ބުނެފައިވަނީ 15 އެޕްރީލް 2020 އިން ފެށިގެން މާލެއިން، ނުވަތަ ހުޅުމާލެއިން ނުވަތަ ވިލިމާލެއިން ނުވަތަ ގުޅިފަޅުން، ނުވަތަ ތިލަފުށިން ދިވެހިރާއްޖޭގެ އެހެން ރަށަކަށް ދަތުރުކޮށްފައިވާ މީހެއް، އެރަށަކަށް ދާ ދުވަހުން ފެށިގެން، 14 (ސާދަ) ދުވަހުގެ މުއްދަތަށް، އެފަދަ މީހަކު ދިރިއުޅޭ ތަނުގައި ނުވަތަ އެނޫންވެސް ތަނެއްގައި އެކަހެރިވުމަށް އަންގާކަމަށެވެ.
އަދި 15 އޭޕްރީލް އިން ފެށިގެން މާލެއަށް ނުވަތު ހުޅުމާލެއަށް، ނުވަތަ ވިލިމާލެއަށް، ނުވަތަ ގުޅިފަޅަށް، ނުވަތަ ތިލަފުށްޓަށް ވައިގެ މަގުން، ނުވަތަ ކަނޑުގެ މަގުން އުޅަނދުފަހަރުގައި މުދާ ބޭލުމަށް ނުވަތަ މުދާ އެރުވުމަށް ދަތުރުކުރާ އުޅަނދެއްގައިވާ މީހަކު މާލެއަށް، ނުވަތަ ހުޅުމާލެއަށް، ނުވަތަ ވިލިމާލެއަށް، ނުވަތަ ގުޅިފަޅަށް، ނުވަތަ ތިލަފުށްޓަށް ފައިބައިފި ނަމަ، އެފަދަ މީހަކު ދިރިއުޅޭ ރަށަށް ދާ ދުވަހުން ފެށިގެން 14 (ސާދަ) ދުވަހުގެ މުއްދަތަށް އެފަދަ މީހަކު ދިރިއުޅޭ ތަނުގައި ނުވަތަ އެނޫންވެސް ތަނެއްގައިއެކަހެރިވުމަށް އެޗްޕީއޭއިން ވަނީ އަންގާފަ އެވެ.
ރާއްޖޭގައި އިއުލާންކޮށްފައިވާ ސިއްހީ ކުއްލި ނުރައްކަލުގެ ހާލަތުގެ ދަށުން ޑިރެކްޓަރ ޖެނެރަލް އޮފް ޕަބްލިކް ހެލްތަށް ލިބިގެންވާ ބާރުގެ ދަށުން އެ އަމުރުތައް އަންގާފައިވާއިރު، އެ ފަދަ ފަރާތްތަކުން އެޗްޕީއޭއިން އަންގާފައިވާ ގޮތަށް އަމަލުކުރޭތޯ މޮނިޓަރ ކުރުމަށްވެސް ވަނީ އަންގާފަ އެވެ. އަދި ވަކި ހާއްސަ ހާލަތެއްގައި، އެޗްޕީއޭއިން އެންގުމުން ނޫނީ އިތުރު ގޮތަކަށް އަމަލު ނުކުރުމަށް ވަނީ އިލްތިމާސްކޮށްފަ އެވެ.
