ކައުންސިލްތަކުގެ އިންތިހާބު: ސަސްޕެންޑް ކުރެވިފައިވާ ކެންޑިޑޭޓުންގެ މައްސަލާގައި ސީއެސްސީން ކޯޓަށް!

ލޯކަލް ކައުންސިލްތަކުގެ އިންތިހާބުގައި ވާދަ ކުރާ ކެންޑިޑޭޓުން، އެ ކެންޑިޑޭޓުން އަދާކުރަމުންދިޔަ ސިވިސް ސަރވިސް ވަޒީފާއިން ސަސްޕެންޑް ކުރެވިފައިވާ މައްސަލައަށް ހައްލެއް ހޯދުމަށް ކޯޓަށް ހުށަހެޅުމަށް ސިވިލް ސަރވިސް ކޮމިޝަން (ސީއެސްސީ) އިން ނިންމައިފިއެވެ.

ސީއެސްސީން ނެރެފައިވާ ނޫސްބަޔާނެއްގައި ބުނެފައިވަނީ، ލޯކަލް ކައުންސިލްތަކުގެ އިންތިހާބުގެ ގާނޫނުގެ ދަށުން ލޯކަލް ކައުންސިލެއްގެ މެމްބަރުން ހޮވުމަށް ބާއްވާ އިންތިހާބަކަށް، ސިވިލް ސަރވިސްގައި ހިމެނޭ މީހަކު ކައުންސިލެއްގެ މެމްބަރުކަމަށް ކުރިމަތިލައިފިނަމަ، އެމީހަކު އެ އިންތިހާބަކަށް ކުރިމަތިލާ ތާރީޚުން ފެށިގެން އެމީހަކު ހުރި ސިވިލް ސަރވިސްގެ ވަޒީފާއިން ސަސްޕެންޑްވާނެ ކަމަށެވެ. އަދި އެ މީހަކަށް ސިވިލް ސަވިސް ވަޒީފާއިން ލިބެމުންދިޔަ މުސާރައާއި އަދި އެއްވެސް އިނާޔަތެއް ނުލިބޭނެ ކަމަށް ގާނޫނުގައި ބުނާ ކަމަށެވެ.

އެގޮތުން ލޯކަލް ކައުންސިލްތަކުގެ އިންތިހާބު ފަސްކުރުމުގެ ސަބަބުން، އިންތިހާބަށް ކުރިމަތިލެއްވި ފަރާތްތަކުގެ ތެރެއިން ސަސްޕެންޑް ކުރެވިފައިވާ ސިވިލް ސަރވިސްގެ މުވައްޒަފުންގެ ސަސްޕެންޝަންގެ މުއްދަތު އިތުރުވެގެންދާ ދިއުމަށް ހައްލެއް ގެނެވޭނެ ގޮތްތަކެއް ހޯދުމަށްޓަކައި އިލެކްޝަންސް ކޮމިޝަނާ މަޝްވަރާ ކުރުމަށް ނިންމާފައިވާ ކަމަށްވެސް ސީއެސްސީގެ ބަޔާނުގައި ވެއެވެ. އަދި ލޯކަލް ކައުންސިލްތަކުގެ އިންތިހާބު ފަސްކުރުމުގެ ސަބަބުން އިންތިހާބަށް ކުރިމަތިލެއްވި ފަރާތްތަކުގެ ތެރެއިން ސަސްޕެންޑް ކުރެވިފައިވާ ސިވިލް ސަރވިސްގެ މުވައްޒަފުންނަށް ލިބެމުންދާ ގެއްލުންތަކަށް ގާނޫނީ ހައްލެއް ހޯދުމަށްޓަކައި މިމައްސަލަ ޝަރުއީ މަރުހަލާއަށް ހުށަހެޅުމަށް ވެސް ނިންމާފައިވާ ކަމަށް ސީއެސްސީގެ ބަޔާނުގައި ވެއެވެ.

މީގެއިތުރުން ސީއެސްސީން ބުނެފައިވާ ގޮތުގައި، އެ މުވައްޒަފުން ސަސްޕެންޝަނުގައި ތިބި މުވައްޒަފުން ވަޒީފާއިން އެކަހެރި ކުރެވިފައިވާތީއާއި، ވަޒީފާތަކަށް އެހެން މުވައްޒަފުން ނެގެން ނެތުމުން ބައެއް ސިވިލް ސަރވިސްގެ އިދާރާތައް ހިންގުމުގައި ވެސް ދަތިތަކެއް ދިމާވެފައިވާ ކަމަށެވެ.

ސީއެސްސީ މިހެން ބުނިއިރު، ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 އާ ގުޅިގެން އަދި ރާއްޖޭގައިވެސް މިބަލި ފެތުރެމުންދާތީ، ރާއްޖޭގައި އާންމު ސިއްހަތުގެ ކުއްލި ނުރައްކަލުގެ ހާލަތު ހިންގައި، މިދިއަ މާރޗު މަހުގެ 19 ވަނަ ދުވަހުން ފެށިގެން ސަރުކާރުގެ އޮފީސްތައް ވަނީ ބަންދުކޮށްފަ އެވެ. އަދި ގިނަ އޮފީސްތަކުގެ މަސައްކަތްތައް މިދަނޑިވަޅުގައި ގޭގައި ތިބެގެން ކުރުމަށް ބާރުއަޅާފައިވާއިރު، މިހާރު މާލެ ސަރަހައްދު ލޮކްޑައުންކޮށް، އަދި އެއްރަށުން އަނެއް ރަށަށް ނުދެވޭގޮތަށް ރަށްތައްވެސް މިވަނީ ލޮކްޑައުންކޮށްފަ އެވެ.

މީގެއިތުރުން، ސަރުކާރުން ޚަރަދުތައް ކުޑަކުރަން ހިފާފައިވާ މިދަނޑިވަޅުގައި އަދި ވަޒީފާތަކަށް މީހުން ނެގުން ވެސް ވަނީ މަޑުޖައްސާލާފައެވެ.

ކޮވިޑް-19 ރާއްޖެއިން ފެނުމާއެކު، ލޯކަލް ކައުންސިލްތަކުގެ އިންތިހާބު ވަކި މުއްދަތެއް ނެތްގޮތަށް ފަސްކޮށްފައިވާއިރު، ސަރުކާރުގެ ފަރާތުން ވަނީ، "ލޯކަލް ކައުންސިލްތަކުގެ އިންތިހާބުގެ ޚާއްސަ ބިލް 2020"ގެ ނަމުގައި ރައްޔިތުންގެ މަޖިލީހަށް ބިލެއް ހުށަހަޅާފަ އެވެ. އެބިލްގެ މަސައްކަތް ރައްޔިތުންގެ މަޖިލީހުން ކުރަމުންދާއިރު، އެބިލްގައި ބުނެފައިވާ ގޮތުން، އެންމެ ލަސްވެގެންވެސް އަންނަ ޖެނުއަރީ 6 ގެ ކުރިން ލޯކަލް ކައުންސިލްތަކުގެ އިންތިހާބު ބާއްވަންޖެހެއެވެ.