މާލެ ލޮކްޑައުން: ހަތް މިނިޓް ތެރޭގައި 74 މީހަކު ފުލުހުންގެ ބެލުމުގެ ދަށަށް
ހައްޔަރުކުރި މީހުންގެ ތެރޭގައި ބިދޭސީންވެސް ހިމެނޭ
މާލޭގެ މަގުމަތީގައި ފުލުހުން ހަރަކާތްތެރިވަނީ
ލޮކްޑައުން ވަގުތުގައި މާލޭ މަގުމަތީގައި އުޅުނު 74 މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.
ހުކުރު ދުވަހުގެރޭ 20:30 ފެށިގެން މާލޭގެ މަގުމަތީގައި އުޅޭ ފަރާތްތަކާއި މެދު ފިޔަވަޅުއަޅަން ފުލުހުން ވަނީ ފަށާފައެވެ.
ނެޝަނަލް އެމެޖެންސީ އޮޕަރޭޝަން ސެންޓަރުގައި ވާހަކަދައްކަވަމުން އެ ސެންޓަރުގެ ތަރުޖަމާނު ވިދާޅުވީ، 20:30 އާ 20:37 ދެމެދު 74 މީހަކު ފުލުހުންގެ ބެލުމުގެ ދަށަށް ގެންދެވިފައިވާ ކަމަށެވެ. އޭގެ ތެރޭގައި ބިދޭސީންތަކެއް ހިމެނޭ ކަމަށް މަބްރޫކް ވިދާޅުވިއެވެ.
ފުލުހުންގެ ފިޔަވަޅުތައް ހަރުކަށި ކޮށްފައިވާއިރު، ކޮމިޝަނަރ އޮފް ޕޮލިސް މުހައްމަދު ހަމީދު ކުރެއްވި ޓްވީޓެއްގައި ވިދާޅުވީ، އެޗްޕީއޭގެ އެންގުމާ ހިލާފުވާ ފަރާތްތަކާއި މެދު 1000 ރުފިޔާއިން ޖޫރިމަނާ ކުރެވޭނެ ކަމަށެވެ. ހަފްތާއެއްގެ މުއްދަތަށް މާލެ ލޮކްޑައުން ކޮށްފައިވާއިރު، މީގެ ކުރިން ފުލުހުން ބުނެފައިވާ ގޮތުން ލޮކްޑައުންއާ ހިލާފުވާ ފަރާތްތައް 14 ދުވަހުގެ މުއްދަތަށް ކަރަންޓީނު ކުރެވޭނެ ކަމަށެވެ.
