ކޮރޯނާވައިރަސް ޖެހިގެން ލީޑްސްގެ ލެޖެންޑް ނޯމަން ހަންޓާ މަރުވެއްޖެ

ކޮރޯނާވައިރަސް (ކޮވިޑް-19) ޖެހިގެން އިނގިރޭސި ދެވަނަ ޑިވިޝަނުގައި މިވަގުތު އޮތް ލީޑްސް ޔުނައިޓެޑްގެ ލެޖެންޑް ނޯމަން ހަންޓާ މަރުވެއްޖެ އެވެ.

ރިޕޯޓުތައް ބުނާ ގޮތުން އިންގްލެންޑުގެ ކުރީގެ ޑިފެންޑަރު ހަންޓާ، ކޮވިޑް-19 އަށް ޕޮޒިޓިވްވުމުން ހޮސްޕިޓަލްގައި އެޑްމިޓްކޮށްފައިވަނީ މިމަހުގެ 10 ވަނަ ދުވަހު އެވެ. ހުކުރު ދުވަހުގެ ވަގުތެއްގައި ހަންޓާ މަރުވިއިރު، އޭނާގެ އުމުރަކީ 76 އަހަރެވެ.

1959 ވަނަ އަހަރު ލީޑްސްގެ ޔޫތު ޓީމުން ކެރިއަރު ފެށި ހަންޓާ، އެޓީމުގެ ސީނިއާ ޓީމުން އެންމެ ފުރަތަމަ ޖާގަ ހޯދާފައިވަނީ 1962 ވަނަ އަހަރު އެވެ. އޭގެ ފަހުން 1976 ވަނަ އަހަރު ލީޑްސް ދޫކޮށް ބްރިސްޓޯލް ސިޓީއަށް ބަދަލުވި ހަންޓާ ވަނީ ލީޑްސްއަށް 540 މެޗު ކުޅެދީފައެވެ. އަދި އޭނާ ވަނީ ލީޑްސް އާއެކު އިނގިރޭސި ފުރަތަމަ ޑިވިޝަނުގެ ޗެމްޕިއަންކަން ދެ ފަހަރު ހޯދާފައެވެ. އަދި ވަނީ ލީޑްސް އާއެކު އިނގިޜެސި އެފްއޭ ކަޕް ތިން ފަހަރު ހޯދާފައެވެ.

މީގެ އިތުރުން ހަންޓާ ވަނީ 1996 ވަނަ އަހަރުގެ ފީފާ ވޯލްޑް ކަޕް އިންގްލެންޑުން ކާމިޔާބުކުރި ސްކޮޑުގައިވެސް ހިމެނިފައެވެ. އެކަމަކު އެ ފަހަރު އޭނާ އެއްވެސް މެޗެއް ކުޅެފައެއް ނުވެއެވެ.

ކޮވިޑް-19 ޖެހިގެން ލީޑްސް ޔުނައިޓެޑްގެ ލެޖެންޑް ނޯމަން ހަންޓާ މަރުވިއިރު، އިނގިރޭސިވިލާތުން މިހާތަނަށް މި ވައިރަސް ޖެހިގެން 14،500 އަށްވުރެ ގިނަ މީހުން ވަނީ މަރުވެފައެވެ.

ކޮވިޑް-19 އާ ގުޅިގެން އިނގިރޭސިވިލާތުގައި މުއްދަތެއް ނެތް ގޮތަށް ފުޓްބޯޅައިގެ ހަރަކާތްތައް ހުއްޓާލާފައިވާއިރު، ދިމާވާނެ މާލީ ދަތިތަކުން އަރައިގަތުމަށް ލީޑްސްގެ ކުޅުންތެރިންގެ އިތުރުން އެކްލަބުގެ ކޯޗު މާސެލޯ ބިއެލްސާ އާއި އެހެނިހެން ބައެއް މުވައްޒަފުން ވެސް ވަނީ މި މުއްދަތުގައި މުސާރައިން ދެބައި ކުޅަ އެއް ބައި ކުޑަކޮށްފައެވެ. އަދި މުސާރަ ކުޑަކުރަން އެއްބަސްވި ކުޅުންތެރިންނަށް އަލުން ސީޒަން ފެށުމުން ބޯނަހެއް ދޭން އެ ކްލަބުން ވަނީ ނިންމާފައެވެ.