14 ދުވަސް ތެރޭގައި ވައިރަހުގެ ޕީކަށް ދާނެ!
17 އެޕްރީލު 2020 | ހުކުރު 14:02ކުރިއަށް އޮތް ދުވަސްތަކުގެ ތެރޭގައި ވަރަށް ބޮޑަށް ސަމާލުވެގެން ގުދު ފަތިކުރަން މަސައްކަތްކުރަން ޖެހޭ: ޑރ
ކޮވިޑް-19 އަށް ޓެސްޓު ކުރުމުގެ މަރުހަލާގެ ތެރެއިން
މިހާރު ހެދިފައިވާ އެޕިޑޮމޮލޮޖިކަލް ދިރާސާގައި ވާގޮތުން ނަމަ، 14 ދުވަހުގެ ތެރޭގައި ވައިރަހުގެ ޕީކަށް ދާނެ ކަމަށް ބެލެވޭ ކަމަށް ޑރ. ނަޒްލާ ރަފީގް ވިދާޅުވެއްޖެ އެވެ.
ހުކުރުދުވަހު އޮންލައިންކޮށް ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ ވިދާޅުވީ ކުރިއަށް އޮތް ދުވަސްތަކުގެ ތެރޭގައި ވަރަށް ބޮޑަށް ސަމާލުވެގެން ގުދު ފަތިކުރަން މަސައްކަތްކުރަން ޖެހޭކަމަށެވެ.
ޑރ. އިތުރަށް ވިދާޅުވީ ބަލި ފެނުނު ފަރާތްތަކުގެ ކޮންޓެކްޓް ޓްރޭސިންގެ މަސައްކަތްތައް ކުރެވެމުންދާ ކަމަށާއި ޕޮޒިޓިވްވި މީހެއްގެ ކޮންޓެކްޓެއް ވެއްޖިއްޔާ އަލާމާތެއް ނެތަސް، ހުއްޓަސް ޓެސްޓު ކުރާނެ ކަމަށެވެ.
ރާއްޖޭގައި މުޖުތަމައުގެ ތެރޭގައި ބަލި ފެތުރިއްޖެނަމަ ޖުމުލަކޮށް މާލެ ސަރަޙައްދުން 46،627 އަށްވުރެ ގިނަ މީހުންނަށް ބަލި ޖެހޭނެ ކަމަށް އެޗްޕީއޭއިން ރާއްޖޭގެ ޙާލަތާ ގުޅޭގޮތުން ތައްޔާރުކޮށްފައިވާ ރިޕޯޓުގައި ލަފާކޮށްފައިވެ އެވެ. އަތޮޅުތަކުން 51،874 މީހުން ބައްޔަށް ޕޮޒިޓިވްވާނެކަމަށް ބެލެވޭއިރު، ޖުމްލަ 98،501 މީހުންނަށް ކޮވިޑް-19 ޖެހެނޭކަމަށް ބެލެވެ އެވެ.
އެގޮތުން އެއްވެސް ފިޔަވަޅެއް ނާޅައިފި ނަމަ ގާތްގަނޑަކަށް ދުވާލެއްގެ މައްޗަށް އިތުރަށް އެތައް ބަޔަކު ވައިރަސް އަށް ޕޮޒިޓިވްވާނެ ކަމަށާއި އެހާލަތުގައި 47 ދުވަސް ތެރޭގައި ޕީކް އަށް ދާނެ ކަމަށް ބެލެވެއެވެ.
ނަމަވެސް ދުރާލާ ރައްކާތެރިކަމުގެ ފިޔަވަޅު އަޅައި އެއަށް އަމަލުކޮށްފިނަމަ، މި އަދަދު މަދު ކުރެވޭނެ ކަަމަށާއި، އެންމެ ޕީކަށްދާ ދުވަހުގަގައިވެސް ބަލި ޖެހޭނީ 2000 އެއްހާ މީހުންނަށް ކަމަށް ރިޕޯޓުގައި ލަފާކޮށްފައިވެ އެވެ.
ބަލި ކޮންޓްރޯލް ކުރުމަށް އެކަށީގެންވާ ފިޔަވަޅު ނޭޅިއްޖެނަމަ އެންމެ ޕީކްގައި 13000 މީހުން އެއްދުވަހު ހޮސްޕިޓަލަށް ގެންދެވޭނެ ކަމަަށް ރިޕޯޓުގައި ލަފާކޮށްފައިވީ ނަމަވެސް ހަރުކަށި ފިޔަވަޅު އަޅައިފިނަމަ ބަލި ފެތުރިއްޖެ ޙާލަތެއްގައިވެސް އެންމެ ގިނައިން ފަރުވާދޭން ޖެހޭނީ 300 އެއްހާ މީހުންނަށް ކަމަށް ވެސް ލަފާކޮށްފައިވެ އެވެ.
