މިއަދުން ފެށިގެން ދެ ހަފްތާގެ މުއްދަތަށް މާލެ ސިޓީ ލޮކްޑައުން ކޮށްފި
17 އެޕްރީލު 2020 | ހުކުރު 08:22ދެ ހަފްތާގެ މުއްދަތަށް މާލެ ސިޓީ ލޮކްޑައުންކުރުން
މާލެ ސިޓީ
ކޮވިޑް-19 ފެތުރުން ކޮންޓްރޯލް ކުރުމަށްޓަކައި މިއަދުން ފެށިގެން މާލެ ސިޓީ ދެ ހަފްތާގެ މުއްދަތަށް ލޮކްޑައުންކޮށްފި އެވެ.
މާލެ ސިޓީގައި ދިރިއުޅޭ މީހަކު ކޮވިޑް-19 އަށް ޕޮޒިޓިވްވުމާއި ގުޅިގެން ބުދަ ދުވަހުން ފެށިގެން މާލެ ސިޓީ ވަނީ ލޮކްޑައުންކޮށްފައެވެ. ލޮކްޑައުންގެ މުއްދަތު ދެ ހަފްތާގެ މުއްދަތަށް އިތުރުކުރިކަން އިއުލާންކޮށް އެޗްޕީއޭއިން ނެރެފައިވާ ބަޔާނުގައި ބުނެފައިވަނީ މާލެ ، ވިލިމާލެ އަދި ހުޅުމާލޭގައި އެއްގަމު އުޅަނދުފަހަރު ދުއްވުމާއި މަގުމައްޗާ އާންމު ތަންތަނަށް އެއްވެ އުޅުން މަނާކަމުގަ އެވެ. އަދި މާލެ ، ވިލިމާލެ އަދި ހުޅުމާލޭގައި ޕަބްލިކް ޓްރާންސްޕޯޓް އެއީ ބަހުގެ ޚިދުމަތާއި ފެރީގެ ޚިދުމަތް ދިނުން ހުއްޓާލަންޖެހޭނެ ކަމަށެވެ. މީގެއިތުރުން މިމުއްދަތުގެ ތެރޭގައި މާލެ ، ވިލިމާލެ އަދި ހުޅުމާލެ އާއި ތިލަފުށި އަދި ގުޅީ ފަޅަށް މީހުން އަރާފޭބުން މަނާކަމަށް އެޗްޕީއޭއިން ބުނެއެވެ.
މިކަންކަމުން އިސްތިސްނާވާ ފަރާތްތަކުގެ ގޮތުގައި އެޗްޕީއޭއިން ބުނެފައިވަނީ ފުލުހުންނާއި ސިފައިންނާއި، ސިއްހީ ޚިދުމަތްދޭ ތަންތަނުގެ މުވައްޒަފުންނާއި އެ މުވައްޒަފުން ދުއްވާ އުޅަނދުފަހަރު އަދި އެމްބިޔުލެންސެވެ. މީގެއިތުރުން ނޭޝަނަލް އެމަރޖެންސީ އޮޕަރޭޝަން ސެންޓަރ (އެންއީއޯސީ) ގެ ފާސް ލިބިފައިވާ ފަރާތްތަކާއި އެންއޯއީސީގެ ފާސް ލިބިފައިވާ މީޑިޔާގެ ފަރާތްތަކެވެ. މީގެއިތުރުން ފުލުހުން ހުއްދަ ދޭ ފަރާތްތަކެވެ. މިފަރާތްތައް ނޫން ފަރާތްތައް ބޭރުގައި އުޅުން މަނާވާނެކަމަށް އެޗްޕީއޭއިން ވަނީ ބުނެފައެވެ.
މިހާތަނަށް މާލެއިން އެކަނިވެސް ކޮވިޑް-19 އަށް 7 މީހަކު ވަނީ ޕޮޒިޓިވްވެފަ އެވެ. އަދި ޖުމްލަ ރާއްޖެއިން ޕޮޒިޓިވްވި މީހުންގެ އަދަދު ވަނީ 27 ށް އަރާފަ އެވެ. ފުރަތަމަ މާލެއިން ކޮވިޑް-19 އަށް ޕޮޒިޓިވްވި މީހާ އާއި ޑައިރެކްޓް ކޮންޓެކްޓްވި މީހުންގެ އަދަދު 200 ށް ވުރެ މަތިއިރު މުޅި ރާއްޖެއިން 22 ތަނެއް މިވަގުތުވެސް އޮތީ މޮނިޓަރިންގެ ހާލަތުގަ އެވެ. މީގެއިތުރުން ހުކުރު ދުވަހުގެ އިރުއޮއްސި ހައަކުން ފެށިގެން ރަށްރަށަށް އަރާ ފޭބުން ވަނީ މަނާކޮށްފައެވެ.
