މާލެ އިން އިތުރު ދެ މީހަކު ކޮވިޑް-19 އަށް ޕޮޒިޓިވްވެއްޖެ
16 އެޕްރީލު 2020 | ބުރާސްފަތި 22:01މާލެ ވަނީ 24 ގަޑިއިރަށް ލޮކްޑައުންވެސް ކޮށްފައި
މާލެއިން ކޭސްއެއް ފެނުމާއެކު މާލެ ވަނީ 24 ގަޑިއިރަށް ލޮކްޑައުން ކޮށްފައި
މާލެ އިން އިތުރު ދެ މީހަކު ކޮވިޑް-19 އަށް ޕޮޒިޓިވްވެއްޖެ އެވެ.
އެކަމާ ގުޅޭގޮތުން އެޗްޕީއޭއިން ކުރި ޓްވީޓެއްގައި ބުނީ، ޕޮޒިޓިވްވެފައިވަނީ އެންމެ ފަހުން މާލެއިން ޕޮޒިޓިވްވި ކޭސް (ކޭސް 23) ގެ ކްލޯސް ކޮންޓެކްޓްގެ ގޮތުގައި ފާހަގަވި ދެ މީހުން ކަމަށެވެ. މިއާއެކު މާލެ އިން ފެނުނު ޖުމްލަ ކޭސްގެ އަދަދު މިވަނީ 5 އަށް އަރާފަ އެވެ.
މާލެއިން އެންމެ ފުރަތަމަ ޕޮޒިޓިވްވެފައިވަނީ އަންގާރަ ދުވަހުގެރޭ ބަލީގެ އަލާމަތްތަކެއް ހުރެގެން ފްލޫ ކްލިނިކަށް ޑޮކްޓަރަށް ދައްކަން ދިޔަ މީހެކެވެ. އޭނާގެ ކޮންޓެކްޓް ޓްރޭސިންގ ގެ ތެރެއިން އޭނާގެ ދަރިފުޅު (ކޭސް 22) އަދި ޑައިރެކްޓް ކޮންޓެކްޓް އެއް (ކޭސް 23) ޕޮޒިޓިވް ކަމަށް ޓެސްޓުގެ ނަތީޖާތަކުން ދައްކަ އެވެ.
މި އެންމެންގެ ކޮންޓެކްޓް ޓްރޭސިންގ މަސައްކަތުގެ ތެރެއިން ހައި ރިސްކް 82 މީހަކު ފާހަގަކުރެވިފައިވާ ކަމަށް އެންއީއޯސީ އިން ވަނީ ހާމަކޮށްފަ އެވެ. މީގެ ތެރެއިން 14 މީހަކު އައިސޮލޭޝަން ފެސިލިޓީތަކަށް ވަނީ ގެންގޮސްފަ އެވެ.
އަލަށް ފެނުނު ދެ މީހުންނާއެކު ރާއްޖެއިން ފެނުނު ޖުމްލަ ކޭސްގެ އަދަދު މިވަނީ 25 އަށް އަރާފަ އެވެ. މި ވަގުތު ރާއްޖޭގައި ވައިރަސް އަށް ފަރުވާ ހޯދަމުން އަންނަ މީހުންގެ އަދަދު ވަނީ 7 އަށް އަރާފަ އެވެ.
