ހައިރިސްކް 82 މީހަކު ފަހަގަކޮށް އެކަހެރި ކޮށްފި
މި ފަރާތްތަކާ ކޮންޓެކްޓްވި 242 މީހަކު މިހާތަނަށް ދެނެގަނެވިފައިވޭ
މާލެއިން ކޮވިޑް-19 އަށް ޕޮޒިޓިވްވީ ފަރާތް ދިރިއުޅޭ ސަރަހައްދުގައި ފުލުހުން ހަރަކާތްތެރިވަނީ
ބުދަ ދުވަހު މާލެ އިން ކޮވިޑް-19 އަށް ޕޮޒިޓިވްވި ތިން މީހުންނާއި ޑައިރެކްޓް ކޮންޓެކްޓްވި މީހުންގެ ތެރެއިން ހައިރިސްކް 82 މީހަކު ފާހަގަކުރެވި، އެކަހެރިކޮށްފި އެވެ.
ބުރާސްފަތި ދުވަހުގެ ހަވީރު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެންއީއޯސީގެ ތަރުޖަމާނު މަބްރޫކް އަޒީޒު ވިދާޅުވީ މާލެއިން ޕޮޒިޓިވްވި މީހުންނާއި އެކި ގޮތްގޮތުން ކޮންޓެކްޓްވި 242 މީހަކު މިހާތަނަށް ދެނެގަނެވިފައިވާ ކަމަށެވެ.
އެގޮތުން ކޮވިޑް-19 އަށް މާލެއިން ފުރަތަމަ ޕޮޒިޓިވްވި މީހާ (ކޭސް 21) އަދި ދެވަނައަށް ޕޮޒިޓިވްވި ކުޑަކުއްޖާ (ކޭސް 22) އާއި ދިމާވި މީހުންގެ ތެރެއިން 75 މީހުންނަކީ ހައިރިސްކް މީހުންގެ ގޮތުގައި ބެލެވޭ މީހުން ކަމަށެވެ. އަދި މީޑިއަމް ރިސްކް މީހުންގެ ގޮތުގައި 43 މީހަކު އަދި ލޯ ރިސްގެ މީހުންގެ ގޮތުގައި 89 މީހަކު ފާހަގަކުރެވިފައިވާ ކަމަށެވެ.
މީގެ އިތުރުން ބުދަ ދުވަހުގެރޭ ދަންވަރު ޕޮޒިޓިވްވި މީހާ (ކޭސް 23) އާއި ކޮންޓެކްޓްވި މީހުންގެ ތެރެއިން ހައިރިސްކް މީހުންގެ ގޮތުގައި 7 މީހެއް ފާހަގަ ކުރެވުނު އިރު 28 މީހަކު މީޑިއަމް ރިސްކް މީހުންގެ ގޮތުގައި ހިމެނޭ ކަމަށެވެ.
މަބްރޫކް ވިދާޅުވީ މާލެއިން ޕޮޒިޓިވްވި 3 މީހުންނާއި ކޮންޓެކްޓްވި ހައިރިސްކް އަދި މީޑިއަމް ރިސްކް މީހުން ކަރަންޓީން ކުރަން ފަށާފައިވާ ކަމަށެވެ. އަދި ބެލި ޖެހުނު 3 މީހުންނަށް ފަރުކޮޅުފުށީގައި ފަރުވާދެމުން އަންނަ ކަމަށް މަބްރޫކް ވިދާޅުވި އެވެ.
މަބްރޫކް ވިދާޅުވީ ކޭސް 21، 22 އަދި 23 މީހުންނާއި ގިނަ އަދަދެއްގެ ބަޔަކު ދިމާވެފައިވަނީ އެ މީހުން ޕާޓީ ބޭއްވުމާއި، މަސްދަތުރު ދިއުމާއި، ގޭގެއަށް ޒިޔާރަތްކުރުން އަދި ބުރުޖެހުން ފަދަ ކަންކަމުގެ ތެރެއިން ކަމަށެވެ.
މާލެ އިން ކޮވިޑް-19 ފެނުމާއެކު، ބުދަ ދުވަހުން ފެށިގެން މާލެ ވަނީ ލޮކްޑައުން ކޮށްފަ އެވެ. މާލެ 24 ގަޑި އިރަށް ލޮކްޑައުން ކޮށްފައިވީ ނަމަވެސް، ގިނަ އަދަދެއްގެ ބަޔަކު މަގުމަތީގައި އުޅޭ މަންޒަރު ވަނީ ފެނިފަ އެވެ. އަދި ބޭނުންވާ ބައެއް ހިދުމަތްތައް ނުލިބިގެން އެކި މަންސަތަކުގައި ރައްޔިތުން ކަންބޮޑުވުން ފާޅުކުރާ ކަމުގެ މައުލޫމާތު ވެސް ވަނީ ލިބިފަ އެވެ.
