މިހާލަތުގައި މާބަނޑު މީހުންނާމެދު އަމަލުކުރާނެ ޚާއްސަ ޕްލޭނަކާއެކު އައިޖީއެމްއެޗް އޮތީ ތައްޔާރަށް
މާބަނޑު މީހުން ހޮސްޕިޓަލަށް ވަނުމަށް ފަސޭހަ އިންތިޒާމްތަކެއް ހަމަޖައްސަމުން އަންނަ ކަމަށް ޑރ. ވިދާޅުވި
އައިޖީއެމްއެޗް
ކޮވިޑް-19 އަށް މާލޭގައި ދިރިއުޅޭ ރައްޔިތަކު ޕޮޒިޓިވްވުމާއި ގުޅިގެން އައިޖީއެމްއެޗްގެ ބައެއް ޚިދުމަތްތައް ދެ ދުވަހުގެ މުއްދަތަށް މެދުކަނޑާލާފައި ވީނަމަވެސް އެ ހޮސްޕިޓަލުން މާބަނޑު މީހުންނަށް ދެމުންގެންދާ ޚިދުމަތްތަކަށް ބުރު ނާރާ ކުރިޔަށްދާނެކަމަށް އެ ހޮސްޕިޓަލުން ބުނެފިއެވެ.
އައިޖީއެމްއެޗްގެ އަންހެނުންގެ ހާއްސަ ޑޮކްޓަރު ޑރ. އަސީލް ޖަލީލް ކުރެއްވި ޓުވީޓެއްގައި ވިދާޅުވީ މި ހާލަތުގައި މާބަނޑު އަންހެނުންގެ ފަރުވާގެ ކަންކަން ކުރިއަށް ގެންދަން ހާއްސަ ޕްލޭނެއް އެކުލަވާލައި އެ ޕްލޭނާ އެއްގޮތަށް އަމަލުކުރަން ފަށާފައިވާ ކަމަށެވެ. އަދި މާބަނޑު މީހުން ހޮސްޕިޓަލަށް ވަނުމަށް ފަސޭހަ އިންތިޒާމްތަކެއް ހަމަޖައްސަމުން އަންނަ ކަމަށް ޑރ. ވިދާޅުވިއެވެ.
ޑރ. އަސީލް އިތުރަށް ވިދާޅުވީ އޭޕްރީލް މަހުން ފެށިގެން ޖޫން މަހާ ހަމައަށް އައިޖީއެމްއެޗްގައި ވިހަން ނަން ނޯޓު ކޮށްފައިވާ މީހުންގެ މައުލޫމާތު މިހާރު ހޯދާފައިވާ ކަމަށެވެ. މީގެ އިތުރުން އެޕޮއިންޓްމަންޓް ހައްދާފައި ތިބި މާބަނޑު މީހުންނަށް އައިޖީއެމްއެޗުން ފޯނުން ގުޅައިގެން އެޕޮއިންޓްމަންޓްގެ ކަންކަން ކުރިއަށް ގެންދާނެކަމަށްވެސް ޑރ. އަސީލް ވިދާޅުވި އެވެ. އަދި އައިޖީއެމްއެޗުން ދެމުންގެންދާ އިމަރޖެންސީ ޚިދުމަތް މެދުނުކެނޑި ކުރިޔަށްދާނެ ކަމަށްވެސް ޑރ އަސީލް ވިދާޅުވި އެވެ.
އައިޖީއެމްއެޗުން ދެމުން ގެންދިޔަ ބައެއް ޚިދުމަތްތައް ބުރާސްފަތި އަދި ހޮނިހިރު ދުވަހު ނުދޭނެކަަމަށް އައިޖީއެމްއެޗުން ވަނީ ބުނެފައެވެ. އެގޮތުން މި ދެ ދުވަހު ހޮސްޕިޓަލުން ދެމުން ގެންދާ ހޮސްޕިޓަލްގެ ސްޕެޝަލިސްޓް އޯޕީޑީ އަދި އެހެނިހެން ކްލިނިކަލް ޚިދުމަތްތައް ބަންދު ވާނެކަމަށް އައިޖީއެމްއެޗުން ބުނެއެވެ. މިޚިދުމަތްތައް ދިނުމާމެދު އެހޮސްޕިޓަލުން ނިންމާގޮތެއް ހޮނިހިރު ދުވަހު ހާމަކުރާނެ ކަމަށްވެސް އެހޮސްޕިޓަލުން ބުނެއެވެ.
ކޮވިޑް-19 އަށް މާލޭގައި ދިރިއުޅޭ ރައްޔިތަކު ޕޮޒިޓިވްވެފައިވާއިރު މާލެ ވަނީ 24 ގަޑިއިރުގެ މުއްދަތަށް ލޮކްޑައުންކޮށްފައެވެ.
