ކޮވިޑް-19 އަށް ޝައްކުކުރެވޭ އަލާމަތްތަކެއް ހުރި 14 މީހުން އައިސޮލޭޓްކޮށްފި އެވެ.

އެކަމާ ގުޅޭގޮތުން ބުދަ ދުވަހުގެރޭ އެޗްޕީއޭއިން ކުރި ޓްވީޓެއްގައި ބުނީ، ކޮވިޑް-19 އަށް ޝައްކު ކުރެވޭ އަލާމާތްތަކެއް ހުރި 14 މީހަކު ހުޅުލޭ އައިސޮލޭޝަން ފެސިލިޓީއަށް ބަދަލުކުރުމުގެ މަސައްކަތް ކުރެވެމުންދާ ކަމަށެވެ. އަދި މި 14 މީހުންނަކީ މިއަދު މާލެއިން ޕޮޒިޓިވްވި މީހާގެ ކޮންޓެކްޓުންކަމަށް ބުނެފައިވެއެވެ.

މާލެއިން 2 ދިވެއްސަކު ޕޮޒިޓިވްވެފައިވާއިރު، އެޗްޕީއޭ އިން ބުނީ މާލެއިން ދެވަނަ އަށް ކޮވިޑް-19 އަށް ޕޮޒިޓިވް ވެފައިވަނީ ކުޑަކުއްޖެއް ކަމަށެވެ. އަދި ފުރަތަމަ ކޭސްއާއި ޑައިރެކްޓް ކޮންޓެކްޓްވި 11 މީހުންގެ ތެރެއިން 10 މީހުންގެ ނަތީޖާ ނެގެޓިވް ކަމަށް އެޗްޕީއޭއިން ބުންޏެވެ.

މާލެއިން ޕޮޒިޓިވްވި މީހާއާއި ގުޅިގެން އެޗްޕީއޭއިން ގިނަ ފިޔަވަޅުތަކެއް އަޅަމުންދާއިރު، ބުދަ ދުވަހު އެ ކޭސްއާ ގުޅިގެން އިތުރު ގެތަކެއް ވަނީ މޮނިޓަރިންގ ހާލަތަށްވެސް ގެނެވިފައެވެ.

އެގޮތުން އެޗްޕީއޭ އިން ބުނީ މިއަދު މާލޭސިޓީއިން ކޮވިޑް-19 އަށް ޕޮޒިޓިވްވި މީހާގެ ކޮންޓެކްޓް ޓްރޭސިންގ މަސައްކަތުގެ ތެރެއިން ފާހަގަކުރެވިގެން ހ. ރަތްކުރެދި އިމާރާތުގެ 4 ވަނަ ފަނގިފިލާ އަދި ނޫމަސްވާދީ، ސ. ހިތަދޫ މިހާރު ވަނީ މޮނިޓަރިންގެ ހާލަތަށް ގެނެވިފައިވާކަމަށެވެ. އަދި މާލެއިން ކޮވިޑް-19 އަށް ޕޮޒިޓިވްވި މީހާގެ ކޮންޓެކްޓް ޓްރޭސިންގ މަސައްކަތުގެ ތެރެއިން ފާހަގަކުރެވިގެން މ. ޖަރީމާގެ ވެސް ވަނީ މޮނީޓަރިންގެ ހާލަތަށް ގެނެވިފައެވެ.