މާލެއިން އިތުރު ދިވެއްސަކު ކޮވިޑް-19 އަށް ޕޮޒިޓިވްވެއްޖެއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ކޮށްފައިވާ ޓްވީޓެއްގައި ބުނީ، ކޮވިޑް-19 އަށް ޕޮޒިޓިވްވި މީހާ އަކީ ބުދަ ދުވަހު މާލެއިން ޕޮޒިޓިވްވި މީހާގެ ޑައިރެކްޓް ކޮންޓެކްޓެއް ކަމަށެވެ. އެމީހާ މިހާރު އައިސޮލޭޝަން ފެސިލިޓީ އަށް ގެންގޮސްފައިވާ ކަމަށް އެޗްޕީއޭއިން ބުންޏެވެ. މި މީހާ އަކީ މާލެއިން މި ބައްޔަށް ޕޮޒިޓިވްވި ދެވަނަ މީހާއެވެ.

މާލެއިން ފުރަތަމަ ޕޮޒިޓިވްވި މީހާ އަކީ މ. ޖަރީމާގޭގައި ދިރިއުޅެމުންދާ މީހެކެވެ. އެ މީހާ އަށް ވައިރަސް ޖެހުނު ގޮތް އަދި މިހާތަނަށް އެނގިފައިނުވާއިރު، އޭނާގެ ކޮންޓެކްޓް ޓްރޭސިންގެ ހެދުމުގެ މަސައްކަތް އެޗްޕީއޭއިން ދަނީ ކުރަމުންނެވެ. އެގޮތުން ހަތަރު ގެއެއް މޮނިޓަރިންގެ ހާލަތަށް ވަނީ ގެންގޮސްފައެވެ.

މި ދެ ދިވެހިންނާއެކު ރާއްޖެގައި ކޮވިޑް-19 އަށް ޕޮޒިޓިވްވި މީހުންގެ އަދަދު ވަނީ 22 އަށް އަރާފައެވެ. ބަލި ޖެހުނު މީހުންގެ ތެރެއިން، މިހާތަނަށް 16 މީހަކު ވަނީ ބަލިން ފަސޭހަވެފައެވެ.