ރައްޔިތުންގެ ކިބައިން މި އެދެނީ ކެތްތެރިކަމާއެކު އެއްބާރުލުން ދެއްވުމަށް: ރައީސް ސޯލިހު

މާލެއިން ކޮވިޑް-19 އަށް ޕޮޒިޓިވް ކޭސްއެއް ފެނިގެން މިކަން ތަންފީޒު ކުރުމުގެ މަސައްކަތް، ދައުލަތުގެ މުއައްސަސާތަކުން ކުރިއަށް ގެންދާއިރު، ދިވެހި ރައްޔިތުންގެ ކިބައިން އެދިވަޑައިގަންނަވަނީ ކެތްތެރިކަމާއެކު މިކަމަށް އެއްބާރުލުން ދެއްވުމަށް ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.

ރައީސް ގައުމާ މުހާތަބު ކުރައްވާ ދެއްކެވި ވާހަކަފުޅުގައި ވިދާޅުވީ މިކަމާ ގުޅިގެން ޢާންމު ދިރިއުޅުމުގެ ކަންކަމުގައި ދަތިތަކާ ކުރިމަތިވާނެކަން އެނގިވަޑައިގަންނަވާ ކަމަށެވެ. އެހެން ނަމަވެސް، މުޅި މުޖުތަމަޢުގެ ރައްކާތެރިކަމަށް އެންމެން އެކުގައި މަސައްކަތް ކުރުމަކީ ވަރަށް މުހިއްމު ކަމެއް ކަމަށާއި، ކެތްތެރިކަމާއި ޙިކުމަތްތެރިކަމާއެކު، އެކުގައި މަސައްކަތް ކުރުމުން، އިރާދަކުރެއްވިއްޔާ މިކަމުން އަރައިގަނެވޭނެ ކަމަށެވެ.

ރައީސް ވަނީ ކާބޯތަކެއްޗާއި ޒަރޫރީ ކަންކަމަށް ބޭނުންވާ ތަކެތި އަދި ބޭހާއި އެނޫންވެސް ތަނެތި ރަނގަޅު މިންވަރަކަށް ރައްކާކުރެވިފައި ހުރިކަމުގެ ޔަގީންކަން ދިވެހި ރައްޔިތުންނަށް ދެއްވާފައެވެ.

ރައީސްގެ ވާހަކަފުޅު ނިންމަވާލައްވަމުން ވަނީ އެކަކު އަނެކަކާމެދު އޯގާތެރިކަމާއި އެކުވެރިކަމާއެކު މުޢާމަލާތް ކުރުމަށް އެދިވަދައިގެންފައެވެ. އަދި ކެތްތެރިކަން އިސްކުރައްވައި، އިސްލާމްދީނުގެ މަތިވެރި އުޞޫލުތަކުގެ ތެރެއިން، އެކަކު އަނެކަކަށް އެހީތެރިވުމަށް ވެސް ރައީސް ވަނީ އެދިވަޑައިގެންފައެވެ.

ރައީސް ވިދާޅުވީ މިހާތަނަށް އެއްވެސް ބޭހެއް އަދި ވެކްސިނެއް ހޯދިފައި ނެތް މި ބަލިން ރައްކާތެރިވުމަށް، އެޅެން އޮތް އެންމެ މުހިންމު ފިޔަވަޅަކީ، ބޭރުތެރެއަށް ނުނިކުންނަވައި، ގޭގައި މަޑުކުރެއްވުން ކަމަށެވެ.

ރައީސް ވަނީ މި ބަލިން ރައްޔިތުން ރައްކާތެރިކުރުމުގައި، އެއްވެސް ވަރުބަލިކަމެއްނެތި، އެންމެ ފުރަތަމަ ދުވަހުން ފެށިގެން، ކުރީ ސަފުގައި މަސައްކަތް ކުރައްވަމުން ގެންދަވާ ހުރިހާ ޞިއްޙީ ޚިދުމަތްތެރިންނަށާއި، މަސައްކަތް ކުރައްވާ ހުރިހާ ބޭފުޅުންނަށް، ވަރަށް އިޚްލާޞްތެރިކަމާއެކު ޝުކުރު ދަންނަވާފައެވެ.