ބުދަ ދުވަހު މާލެއިން ކޮވިޑް-19 އަށް ޕޮޒިޓިވްވި މީހާއާ ގުޅުންހުރި މީހަކު ހުރެގެން ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ އެންގުމަށް މޯލްޑިވިއަންގެ ފްލައިޓެއް އަނބުރާ ވެލާނާ އިންޓަރނޭޝަނަލް އެއަރޕޯޓް (ވީއައިއޭ) ގައި ޖައްސައިފިއެވެ.

ރާއްޖެ.އެމްވީ އަށް އިތުބާރު ހުރި މަސްދަރަކުން ކަށަވަރު ކޮށްދީފައިވާ ގޮތުގައި އެ ފްލައިޓަކީ މާލެއިން ކާނޑެއްދޫ އަށް ދަތުރުކުރި ފްލައިޓެކެވެ. އެޗްޕީއޭގެ އެންގުމަށް ފްލައިޓް މާލެ ޖައްސާފައިވަނީ މެންދުރު 14:30 ހާއިރު އެވެ. މިކަމާއި ގުޅޭ ގޮތުން އެޗްޕީއޭއިން އަދި މިހާތަނަށް އެއްވެސް އެއްޗެއް ހާމަކޮށްފައެއް ނުވެއެވެ.

މާލެއިން ޕޮޒިޓިވްވި ދިވެހި މީހާއާ ގުޅުންހުރި މީހުން ހޯދުމުގެ މަސައްކަތް އެޗްޕީއޭއިން ވަނީ ފަށާފައެވެ. ދިވެއްސަކު ޕޮޒިޓިވްވުމާއި އެކު މާލެ ސިޓީ ވަނީ 24 ގަޑިއިރަށް ލޮކްޑައުން ކޮށްފައެވެ.