ކޮވިޑް-19 އާގުޅިގެން މިމަހުގެ ދެ ވަނަ ދުވަހުގެ ނިޔަލަށް 280 މިލިއަނަށްވުރެ ގިނަ ރުފިޔާ ޚަރަދުކޮށްފައިވާ ކަމަށް ފިނޭންސް މިނިސްޓަރ އިބްރާހީމް އަމީރު ވިދަޅުވެއްޖެއެވެ.

ރައްޔިތުންގެ މަޖިލީހުގެ އިގްތިޞާދީ ކޮމެޓީއަށް މަޢުލޫމާތު ދެއްވަމުން ފިނޭންސް މިނިސްޓަރު އަމީރު ވިދާޅުވީ، ކޮވިޑް-19 އާގުޅިގެން ޞިއްޙީ ދާއިރާއަށް 2 އޭޕްރީލްއާ ހަމައަށް ޖުމުލަ 280.5 މިލިއަން ރުފިޔާ ހަމަޖައްސާދެއްވާފައިވާ ކަމަށެވެ.

މިނިސްޓަރު އަމީރު ވިދާޅުވީ، މިއަހަރަށް ސަރުކާރުގެ އާމްދަނީ އަންދާޒާ ކުރިވަރާ ގާތަށްވެސް ނުލިބޭނެތީ، ޚަރަދުކުޑަކުރުމުގެ މަސައްކަތްތަށް ކުރިއަށްދާ ކަމަށެވެ. އެގޮތުން އޮފީސްތަކުގެ ބަޖެޓުން 825 މިލިއަން ރުފިޔާ އުނިކުރެވި، މުވައްޒަފުން ނެގުން މަޑުޖައްސާލާފައިވާތީ 1 ބިލިއަން ރުފިޔާ އަށްވުރެ އިތުރަށް ޚަރަދު، މަދުކުރެވޭނެ ކަމަށް ފިނޭންސް މިނިސްޓަރު އަމީރު ވިދާޅުވި އެވެ.

މިނިސްޓަރު އަމީރު ވިދާޅުވީ، ކޮވިޑް-19އާ ގުޅިގެން ރާއްޖޭގެ އިޤްތިޞާދަށް ސީދާ ގޮތުން ކުރިމަތިވާ ގެއްލުމުން އަރައިގަތުމަށް ސަރުކާރުން ގިނަ މަސައްކަތްތަކެއް ކުރައްވަމުން އަންނަކަމަށެވެ.

އެހެންނަމަވެސް މިވަގުތު ސަރުކާރުގެ އެންމެ ބޮޑު އަމާޒަކީ ކޮވިޑް-19ގެ ނުރައްކަލުން ދިވެހިރައްޔިތުން ސަލާމަތް ކުރުމަށް ކުރެވެންހުރިކަންކަން ކުރުން ކަމަށެވެ. އެގޮތުން މިޙާލަތުގައި ރާއްޖޭގެ ޞިއްޙީ ދާއިރާއަށް ކުރަންޖެހޭ ޚަރަދުތައް ކުރުމާއި ރައްޔިތުންގެ ރައްކާތެރިކަމަށް އަޅަންޖެހޭ ކޮންމެ ފިޔަވަޅެއް އަޅަމުންދާނެ ކަމަށް ވެސް މިނިސްޓަރު އަމީރު ވިދާޅުވި އެވެ.