ބޭރުގެ ހަތަރު ޖަމީއްޔާއަކުން ރާއްޖެއަށް ވެންޓިލޭޓަރު ހަދިޔާކުރަނީ
14 އެޕްރީލު 2020 | އަންގާރަ 19:48ރާއްޖޭގެ އެއްވެސް ކުންފުންޏަކަށް އަދި ފައިސާ ނުދައްކާ
އެންއީއޯސީގެ ތަރުޖަމާނު މަބްރޫކް އަޒީޒް ނޫސްވެރިންގެ ބައްދަލުވުމުގައި ވާހަކަ ދައްކަވަނީ
ބައިނަލްއަގްވާމީ ހަތަރު ޖަމިއްޔާއަކުން ރާއްޖެއަށް ވެންޓިލޭޓަރު ހަދިޔާކުރަން ނިންމާފައިވާކަަމަށް ސަރުކާރުން ބުނެފި އެވެ.
އަންގާރަ ދުވަހުގެރޭ ދަރުބާރުގޭގައި ބޭއްވި ނޫސްކޮންފަރެންސްގައި ވާހަކަދައްކަވަމުން ނެޝަނަލް އެމެޖެންސީ އޮޕަރޭޝަން ސެންޓަރ (އެންއީއޯސީ) ގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ، ޔުނައިޓެޑް ނޭޝަން ޗިލްޑްރެން އެމެޖެންސީ ފަންޑު (ޔުނިސެފް) ގެ ފަރާތުން ދެ ޓްރާންސްޕޯޑަބަލް ވެންޓިލޭޓަރާއި، ވޯލްޑް ބޭންކުގެ ފަރާތުން 18 ވެންޓިލޭޓަރަކާއި، އޭޝިއަން ޑިވޮލޮޕްމެންޓް ބޭންކް (އޭޑީބީ) އިން ހަތަރު ވެންޓިލޭޓަރެއްގެ އިތުރުން އިސްލާމިކް ޑިވޮލޮޕްމެންޓް ބޭންކު (އައިޑީބީ) އިން ތިން ވެންޓިލޭޓަރެއް ރާއްޖެއަށް ހަދިޔާ ކުރަން ނިންމާފައިވާ ކަމަށެވެ.
މަބްރޫކް ވަނީ ސަރުކާރުން ގެންނަން ހަމަޖެހިފައިވާ 151 ވެންޓިލޭޓަރުގެ ތަފްސީލުވެސް ޕްރެސް ބްރީފިން ގައި ހާމަކުރައްވާފައެވެ. އެގޮތުން 26 ވެންޓިލޭޓަރު ގެނައުމަށް 8.3 މިލިއަން ރުފިޔާ ދައްކާގޮތަށް ނާޑް ނަމަކަށް ކިޔާ ކުންފުންޏަކާއި އެކު ވަނީ އެގްރީމެންޓް ހަދާފައެވެ. އަދި އިތުރު 50 ވެންޓިލޭޓަރު ގެންނަން 14.4 މިލިއަން ރުފިޔާ ހޭދަކުރުމަށް މެޑްޓެކް ކުންފުންޏާއެކު އެގްރީމެންޓް ކުރެވިފައިވާކަމަށް ވިދާޅުވިއެވެ. މިއިން އެއްވެސް ކުންފުންޏަކަށް އަދި މިހާތަނަށް ފައިސާ ދައްކާފައިނުވާ ކަމަށް މަބްރޫކް ވިދާޅުވިއެވެ.
34 މިލިއަން ރުފިޔާ ހޭދަކޮށްގެން ދުނިޔޭގެ ސިއްހަތު ޖަމިއްޔާ މެދުވެރިކޮށް ވެންޓިލޭޓަރުތަކެއް ގެނައުމަށް ވަނީ ހަމަޖެހިފައެވެ. އެގޭ ތެރޭގައި ހިމެނެނީ އައިސީޔޫގައި ބަހައްޓާ 65 ސްޓޭޝަނަރީ ވެންޓިލޭޓަރު އަދި ދަތުރުމަތީގައި ބޭނުންކުރާ 10 ވެންޓިލޭޓަރެވެ. އެ ވެންޓިލޭޓަރުތަކަށް ގެނައުމަށް އެގްރީމެންޓް ކުރެވިފައިވަނީ ދުބާއީގެ އެކްޒިކިއުޓާސް ޖެނެރަލް ޓްރޭޑިން ކުންފުންޏާއެވެ.
އޭނާ ވިދާޅުވީ، ވެންޓިލޭޓަރު ނުގެނެވިގެން އުޅެނީ، ދުނިޔޭގެ ގައުމުތަކުގައި ދަތުރުފަތުރު ކުރުމުގައި ދިމާވެގެން އުޅޭ ދަތިތަކުގެ ސަބަބުން ކަމަށެވެ. އެކަމަކު އެތަކެތި ގެނައުމަށް މަސައްކަތް ކުރެވެމުންދާ ކަމަށް ވިދާޅުވިއެވެ.
ކޮވިޑް-19 ބަލިޖެހޭ މީހުންގެ ތެރެއިން ވެންޓިލޭޓަރުގައި ބައެއް މީހުންނަށް ފަރުވާދޭން ޖެހެއެވެ. ދުނިޔޭގެ ގައުމުތަކުގައި ހަލުވިކަމާއި އެކު ކޮވިޑް-19 ފެތުރެމުންދާ މި ދަނޑިވަޅުގައި އެތައް ގައުމެއްގައި ބަލި ޖެހިގެން ފަރުވާދޭން ޖެހޭ މީހުންގެ އަދަދު ގިނަވެފައިވާއިރު، ވެންޓިލޭޓަރުތައް މަދުވުމުގެ މައްސަަލަ ގިނަ ގައުމުތަކަކަށް ވަނީ ކުރިމަތިވެފައެވެ
