ކޮވިޑް-19 އާ ގުޅިގެން ބްރޯޑްކާސްޓަރުންނާއި ރީބްރޯޑްކާސްޓަރުންނަށް ކުރިމަތިވެފައިވާ ޙާލަތު ދެނެގަންނަނީ
ކޮމިޝަނުން އެދިފައިވާ ފޯމް ފުރިހަމަ ކުރުމަށްފަހު މި މަހުގެ 21 ވަނަ ދުވަހުގެ ކުރިން ފޯމް ލުމަށް އެދިފައިވޭ
ރާއްޖެ ޓީވީގެ އޮންއެއަރ ކޮންޓްރޯލް ރޫމް
ކޮވިޑް-19 އާ ގުޅިގެން ބްރޯޑްކާސްޓަރުންނާއި ރީބްރޯޑްކާސްޓަރުންނަށް ކުރިމަތިވެފައިވާ ޙާލަތު ދެނެގަތުމުގެ މަސައްކަތް މޯލްޑިވްސް ބްރޯޑްކާސްޓިންގ ކޮމިޝަނުން ފަށައިފިއެވެ.
ބްރޯޑްކޮމް އިން ބުނީ ކޮވިޑް-19 އާ ގުޅިގެން މިހާރު ރާއްޖޭގައި އަޅާފައިވާ ޞިއްޙީ ރައްކައުތެރިކަމުގެ ފިޔަވަޅުތަކުގެ ސަބަބުން ރާއްޖޭގައި ބްރޯޑްކާސްޓްކުރާ ފަރާތްތަކަށާއި ރީބްރޯޑްކާސްޓްކުރާ ފަރާތްތަކަށް ދިމާވެދާނޭ ދަތިތަކާއި މާލީ ނުތަނަވަސްކަމަށް ކޮންމެވެސް ލުއިކަމެއް ގެނައުމަށް އެ ކޮމިޝަނުން ކަމާބެހޭ ފަރާތްތަކާ މަޝްވަރާކޮށްގެން ކުރެވިދާނޭ ކަންކަން ބެލުމުގެ ގޮތުން، ބްރޯޑްކާސްޓަރުންނާއި ރީބްރޯޑްކާސްޓަރުންނަށް މިހާރު މެދުވެރިވެފައިވާ ޙާލަތު ދެނެގަތުމަށް ކޮމިޝަނުން ބޭނުންވާ ކަމަށެވެ.
އެގޮތުން މިހާރު ޚިދުމަތް ދެމުންދާ ބްރޯޑްކާސްޓަރުންނާއި ރީބްރޯޑްކާސްޓަރުންގެ ތެރެއިން، އެއްވެސް ފަރާތަކަށް އެ ފަރާތަކުން ފޯރުވައިދޭ ޚިދުމަތް ދިނުމުގައި ކޮވިޑް-19 އާ ގުޅިގެން ދިމާވެފައި މިވާ ޙާލަތުގެ ސަބަބުން އެއްވެސް ދައްޗެއް ނުވަތަ މާލީ ނުތަވަސްކަމެއް ދިމާވެފައިވާނަމަ، “ކޮވިޑް-19 އާ ގުޅިގެން ޙާލަތު ދެނެގަތުމަށް ބޭނުންވާ މަޢުލޫމާތު ފޯމު” ފުރިހަމަކުރެއްވުމަށްފަހު ކޮމިޝަނުގެ އީ-މެއިލް info@broadcom.org.mv އަށް، 21 އޭޕްރިލް 2020 ގެ ކުރިން ފޮނުއްވުން އެދިފައިވެއެވެ.
މި ފޯމުގައި ބްރޯޑްކާސްޓަރުންގެ މާލީ މައުލޫމާތު ހިމެނުމަށް ވަނީ އެދިފައެވެ. އެގޮތުން ބްރޯޑްކާސްޓް އަދި ރިބްރޯޑްކާސްޓް ކުރުމަށް ކޮށްފައިވާ އިންވެސްޓްމަންޓާއި، 2020 ވަނަ އަހަރަށް އަންދާޒާކުރި ފައިދާ އަދި ގެއްލުމާއި، އާމްދަނީ ހޯދާ ވަސީލަތްތައް، މުވައްޒަފުންގެ އަދަދާއި، މުވައްޒަފުންނަށް މަހަކަށް ޖެހޭ އެވްރެޖް މުސާރަ އަދި ޖުމްލަ މުސާރަ ހިމެނެއެވެ.
މީގެ އިތުރުން މުވައްޒަފުންގެ މުސާރަ ނުލާ ރިކަރަންޓް ހަރަދާއި، ލޯނުގެ ތަފްސީލުތަކާއި، އިންޝިއަރުރަންސްގެ މައުލޫމާތާއި، ކޮވިޑް-19 އާއި ގުޅިގެން ލިބިފައިވާ ގެއްލުމާއި، ލިބެމުންދާ ގެއްލުމާއި، ގެއްލުން ފޫބައްދަން ކުރެވިދާނެކަމަށް ބްރޯޑްކާސްޓަރުންނަށް ފެންނަން ކަންކަން ހިމެނުމަށް ވަނީ މި ފޯމުގައި ބުނެފައެވެ.
