ވަޒީފާއާ ގުޅޭ 1218 މައްސަލަ މިހާތަނަށް ޖޮބް ސެންޓަރަށް ހުށަހަޅާފައިވާކަން ސަރުކާރުން ހާމަކޮށްފި އެވެ.

ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ، މިހާތަނަށް 1218 ފަރާތަކުން ޖޮބް ސެންޓަރަށް މައްސަލަ ރިޕޯޓުކޮށްފައިވާއިރު، ވަޒީފާ އިން ވަކިކޮށްގެން 276 މީހަކު ރިޕޯޓުކޮށްފައިވާ ކަމަށެވެ.

މަބްރޫކް ވިދާޅުވީ، މީގެތެރޭގައި ނޯޕޭ ލީވްގައި ތިބި ކަމަށް ބުނާ 382 މީހަކާއި، ވަޒީފާއިން ވަކިކޮށްފައިވާ ކަމަށް ބުނާ 276 މީހަކާއި، މުސާރަ ކުޑަކުރި ކަމަށް 169 މީހުން، ބައި މުސާރައަށް މުސާރަ ކުޑަކުރި ކަމަށް ބުނާ 116 މީހުން، ވަޒީފާ އިން ސަސްޕެންޑު ކުރެވުނު ކަމަށް ބުނާ 83 މީހުން އަދި ބޭސިކް މުސާރަ އެކަނި ލިބޭ ގޮތަށް ހަދާފައިވާ ކަމަށް ބުނެ 55 މީހަކު ޖޮބް ސެންޓަރަށް ރިޕޯޓްކޮށްފައިވާ ކަމަށެވެ.

މީގެއިތުރުން އަމިއްލަ މަސައްކަތް ކުރާ 134 މީހަކު ވެސް ޖޮބް ސެންޓަރަށް މައްސަލަ ހުށަހަޅާފައިވާ ކަމަށް މަބްރޫކް ވިދާޅުވި އެވެ.

ކޮވިޑް-19 އާގުޅިގެން ވަޒީފާއިން މީހުން ނުކެނޑުމަށާއި މުސާރަ ނުހިނގާގޮތަށް މުވައްޒަފުންނަށް މަޖުބޫރުކޮށްގެން ޗުއްޓީ ނެގުވުންފަދަ ކަންކަން ނުކުރުމަށް ސަރުކާރުން ވަނީ ރާއްޖޭގެ ވިޔަފާރިވެރިންނަށް އިލްތިމާސްކޮށްފަ އެވެ.

އެގޮތުން، އިކޮނޮމިކް މިނިސްޓްރީން ވަނީ ކޮވިޑް-19 ގެ ސަބަބުން ވަޒީފާއިން ވަކިކުރެވިފައިވާނަމަ، ނުވަތަ މުސާރައާއި އެލަވަންސްތަކަށް އެއްވެސް ބަދަލެއް ގެނެވިފައިވާނަމަ، ނުވަތަ ވަޒީފާގެ ހާލަތަށް އެފަދަ އެހެން ބަދަލެއް އައިސްފައިވާނަމަ، މިނިސްޓްރީން ގާއިމުކޮށްފައިވާ ޖޮބް ސެންޓަރުގައި ރިޕޯޓުކުރުމަށް އެދިފައެވެ.

ރާއްޖޭގައި ރިސޯޓުތަކުގައި ވަޒީފާ އަދާކުރާ 11،000 އަށްވުރެ ގިނަ މުވައްޒަފުންނަށް ވަޒީފާއިން ކެނޑުމާއި، މުސާރަ ކުޑަކުރުމާއި މުސާރަ ނުހިނގާގޮތަށް ޗުއްޓީ ނެގުމަށް މަޖުބޫރު ކުރަމުންދާ މައްސަލަތައް ވަނީ ފެންމަތިވެފަ އެވެ.