ކުޑަކުދިންނާއި މެދު އިހުމާލުވެފައިވާ މައްސަލަތައް ދަނީ ބަލަމުން: ކޮމިޝަން
ކުދަކުދިން ބައިތިއްބާ މަރުކަޒްތަކުގެ ތެރެއިން ހަތަރު ތަނަކަށް ޒިޔާރަތްކޮށްފައިވާ ކަން ފާހަގަކޮށްފައިވޭ
ކުޑަކުދިންނަށް ކުރާ އަނިޔާއާއި ދެކޮޅަށް އަޑުއުފުލަނީ
ކުޑަކުދިންގެ ހައްޤުތަކަށް އިހުމާލުވެފައިވާ ވަކިވަކި މައްސަލަތައް ބަލައި ދިރާސާ ކުރުމުގެ މަސައްކަތް ކުރަމުންދާ ކަމަށް ކުޑަކުދިންނަށް ކުރާ އަނިޔާތަކުގެ މައްސަލަތައް ބަލާ ކޮމިޝަނުން ބުނެފިއެވެ.
ހޯމަދުވަހު އެ ކޮމިޝަނުން ނެރެފައިވާ ބަޔާނެއްގައި ވަނީ 20 ފެބްރުއަރީގައި ރައީސުލްޖުމްހޫރިއްޔާ އެ ކޮމިޝަން އުފެއްދެވުމަށްފަހު ކޮމިޝަނުން މިހާތަނަށް ކުރެވިފައިވާ މަސައްކަތަތަކުގެ ތެރޭގައި ކޮމިޝަންގެ މަސައްކަތްތައް ރާވާ ކުރިއަށް ގެންދާނެ ގޮތުގެ ވަރކް ޕްލޭނެއް އެކުލަވައިލާފައިވާ ކަމަށެވެ.
މި ވަރކް ޕްލޭނާއި އެއްގޮތްވާގޮތުގެ މަތިން ކުޑަކުދިންގެ ރައްކާތެރިކަން ކަށަވަރު ކުރުމުގެ ޒިންމާ އަދާކުރާ ދައުލަތުގެ 7 އިދާރާއަކާއި ކޮމިޝަންގެ ފަރާތުން ބައްދަލުކޮށް، އެ އިދާރާތަކުގެ މަސައްކަތް ކުރިއަށްދާ ގޮތާއި ކުޑަކުދިންގެ ޙައްޤުތައް ރައްކައުތެރިކުރުމުގައި ނިޒާމީ ސިފައެއްގައި އެ އިދާރާތަކަށް ދިމާވާ ގޮންޖެހުންތަކާއި މެދު މަޝްވްރާކުރެވިފައިވާ ކަމަށެވެ.
ހަމައެއާއި އެކު ދައުލަތުގެ ބެލުމުގެ ދަށުގައި ކުދަކުދިން ބައިތިއްބާ މަރުކަޒުތަކުގެ ތެރެއިން ހަތަރު ތަނަކަށް އެ ކޮމިޝަނުން ޒިޔާރަތްކޮށް އެތަންތަނުގެ ޙާލަތު ވަޒަން ކުރުމުގެ މަސައްކަތް ކުރެވިފައިވާ ކމަށެވެ.
އެގޮތުން މިދިޔަ މަރޗްމަހުގެ 10 އަދި 11 ގައި ކުޑަކުދިންގެ ހިޔާއަށް ކުރި ޒިޔާރަތުގައި އެތަނުގެ ޢާންމު ސާފުތާހިރުކަމާއި، ތަނުގެ ސެކިއުރިޓީއާއި، ތަނުގެ ހިންގުމާއި، އަދި ކުދިންނަށް ލިބޭ ޚިދުމަތްތަކާއި ގުޅިގެން އެ މަރުކަޒުގައި މިހާރުން މިހާރަށް ރަނގަޅު ކުރަންޖެހޭ ގިނަ ކަންތައްތަކެއް ހުރިކަން ކޮމިޝަނަށް ފާހަގަކުރެވިފައިވާ ކަމަށެވެ.
ވުމާއި އެކު އެކަންކަން އިޞްލާޙުި ކުރުމަކީ ކުޑަކުދިންގެ ހިޔާގައި މިހާރު ތިބި ކުދިންގެ ސަލާމަތާއި ރައްކާތެރިކަމާއި ގުޅިފައިވާ ކަމެއް ކަމުގައިވާތީ އެކަންކަން ކަމާއި ބެހޭ މުއައްސަސާތަކުގެ ސަމާލުކަމަށް ގެނައުމަށްޓަކައި ކުޑަކުދިންގެ ހިޔާ އާއި ގުޅޭ ރިޕޯޓެއް އެ ކޮމިޝަނުން އެކުލަވާލާފައިވާނެ ކަމަށާއި މި ރިޕޯޓުގައި ކުޑަކުދިންގެ ހިޔާގައި މިހާރު ތިބި ކުދިންނާއި ގުޅޭގޮތުންނާއި، ތަނުގެ ހިންގުމާއި، ޢާންމު ސާފުތާހިރުކަމާއި، ތަނުގެ ސެކިއުރިޓީއާއި، ދައުލަތުގެ ބެލުމުގެ ދަށުގައި އެތަނުގައި ތިބި ކުދިންގެ ރައްކާތެރިކަން ކަށަވަރު ކުރުމަށްޓަކައި އިޞްލާޙުކޮށް ވަގުތުން ފިޔަވަޅު އަޅަންޖެހޭކަމަށް އެ ކޮމިޝަނަށް ފެންނަ 34 ކަމެއް ބަޔާންކޮށްފައިވާނެ ކަމަށެވެ.
ކުޑަކުދިންގެ ހިޔާއާއި ގުޅޭ ޕްރިލިމިނަރީ ރިޕޯޓް ރައީސުލްޖުމްހޫރިއްޔާ އާ ހިއްސާކުރެވިފައިވާއިރު، ކުޑަކުދިންގެ ހިޔާގައި އިޞްލާޙު ކުރަންޖެހޭކަމަށް ކޮމިޝަނުން ފާހަގަ ކޮށްފައިވާ ކަންކަން ސަރުކާރުގެ ފަރާތުން ތަންފީޒް ކުރައްވާނެ ކަމުގެ ޔަޤީންކަން ރައީސް ކޮމިޝަނަށް ދެއްވާފައިވާކަން ކޮމިޝަނުން ވަނީ ފާހަގަ ކޮށްފައެވެ.
މީގެ އިތުރުން ކުޑަކުދިން ޝާމިލުވާ މައްސަލަތަކުގައި ކަމާއިބެހޭ އިދާރާތަކުން ޢަމަލުކުރުމަށް އެކުލަވާލާފައިވާ ޤަވާއިދުތަކާއި، އުޞޫލްތަކާއި، ސްޓެންޑަރޑް އޮޕަރޭޓިން ޕްރޮސީޖަރސްތައް ރިވިއުކުރުމާއި، ކުޑަކުދިންގެ ޙައްޤުތަކަށް އިހުމާލްވެފައިވާ ވަކިވަކި މައްސަލަތައް ބަލައި ދިރާސާކުރުމުގެ މަސައްކަތް ކޮމިޝަނުން ކުރަމުންދާ ކަމަށެވެ.
އަދި ކޮމިޝަނުގެ މަސައްކަތަށް ހުރިހާ މުއައްސަސާއަކުން ދެއްވާ އެއްބާރުލުމަށް ވަނީ ޝުކުރުއަދާކޮށްފައެވެ. ކޮމިޝަންގެ މަސައްކަތްތައް ކުރިއަށްދާ މިންވަރަކުން ހާމަކުރެވެން ހުރި މަޢުލޫމާތު ހިއްސާކުރަމުންގެންދާނެ ކަމަށް ކޮމިޝަނުން ވަނީ ބުނެފައެވެ.
