ޔާމީން ރަޝީދުގެ މަރުގެ މައްސަލަ ކުރިޔަށް ނުދާކަން ގަބޫލުކުރަން: މަރު ކޮމިޝަން
ޔާމީންގެ މައްސަލަ ވަނީ ހުއްޓިފައި
މަރު ކޮމިޝަނުގެ މެމްބަރު ފަރީޝާ އަބްދުﷲ
އަނިޔާވެރި ރަހުމުކުޑަގޮތަކަށް މަރާލަފައިވާ ސޯޝަލް މީޑިއާ އެކުޓިވިސްޓު އަދި ބްލޮގަރ ޔާމީން ރަޝީދު މަރާލި މައްސަލަ ކުރިޔަށް ނުދާކަމަށް މަރު ކޮމިޝަނުން ބުނެފިއެވެ.
މަރު ކޮމިޝަނުގެ މެމްބަރު ފަރީޝާ އަބްދުﷲ ރާއްޖެއެމްވީއަށް ދެއްވި ހާއްސަ ބަސްދީގަތުމެއްގައި ވިދާޅުވީ، އޭޕްރީލް މަަހުގެ 10 ވަނަ ދުވަހަކީ ޔާމީން އުފަން ދުވަހަށް ވުމާއެކު އަދިވެސް މި މައްސަލައިގައި އާއިލާއަށް އިންސާފު ލިބިފައިނުވާތީ ވަރަށް ގިނަ ބައެއް ފާޑުކިޔުން އަމާޒުވިކަމަށެވެ. ފަރީޝާ ވިދާޅުވީ، ޔާމީން ރަޝީދުގެ މައްސަލައިގެ ތަހުގީގު މަރުކޮމިޝަނުން ކުރިޔަށް ގެންދިޔުމުގައި ދަތިތަކެއް އެބަހުރިކަމަށާއި މައްސަލަ މިހާރު ހުއްޓުމަކަށް އައިސްފައިވަނީ، މައްސަލައިގެ ޝަރީއަތް ކޯޓުގައި ކުރިޔަށްދާތީކަމަށެވެ. އަދި ސަރުކާރު ބަންދުވުމާއެކު މަސައްކަތްތައް މަޑުޖެހިފައިވާކަން އޭނާ ވަނީ ފާހަގަކުރައްވާފައެވެ.
ފަރީޝާ ވިދާޅުވީ، އާއިލާއިން ތަހައްމަލު ކުރަންޖެހޭ ވޭން އިހްސާސުކުރަން ދަތިކަމަށާއި އެ މައްސަލައިގައި އެދެވޭ ހައްލެއް ނުލިބޭތީ ހިތާމަކުރާކަމަށެވެ. އަދި އެ މައްސަލައަކީ ވަރަށް ރާވައިގެން ކުރިޔަށް ގެންގޮސްފައިވާކަމަކަށްވުމުން ވަރަށް ބޮޑަށް ބަލަންޖެހޭ ކަންތައްތަކެއް އެބަހުރިކަމަށް ފަރީޝާ ވިދާޅުވިއެވެ.
މި މައްސަލައިގައި މިހާތަނަށް ލިބިފައި ހުރި މައުލޫމާތަކީ ކުރިންވެސް ތަހުގީގީ އިދާރާތަކުން ކޮށްފައިވާ މަސައްކަތުން ހޯދާފައިވާ މައުލޫމާތުކަމަށާއި ޝަރީއަތް ނިމުނުހާއަވަހަށް މަރު ކޮމިޝަނުން ޔާމީންގެ މަރުގެ މައްސަލައިގެ މަސައްކަތް ފަށާނެކަމަށް ފަރީޝާ ވިދާޅުވިއެވެ. އަދި މައްސަލައިގެ އެންމެ ފަހުގެ މައުލޫމާތު އާއިލާއަށް ހިއްސާ ކުރަން ތައްޔާރަށް ހުންނެވިކަމަށްވެސް އޭނާ ވަނީ ފާހަގަކުރައްވާފައެވެ.
ޔާމީން މަރާލި މައްސަލައިގައި، ތޫނު އެއްޗެއް ބޭނުންކޮށްގެން ޤަސްދުގައި މީހަކު މެރުމުގެ ކުށުގެ ދަޢުވާ އުފުލާފައި ވަނީ މ. އަންނާރުމާގޭ އިސްމާއިލް ހައިޝަމް ރަޝީދާއި، މ. ކޮޅުފުށީ އީސްޓް ހުސައިން ޒިޔާދާއި، މ. ތާއިފް އިސްމާއިލް ރަޝީދާއި، މ. ކުދެހިގެ ހަސަން ޝިފާޒާއި، ގދ. ގައްދޫ ސިންދުބާދުގޭ މުހައްމަދު ދިފްރާނުގެ އިތުރުން މ. އިރާސްމިކުގެ އަހުމަދު ޒިހާން އިސްމާއިލްގެ މައްޗަށެވެ.
ޔާމީން މަރާލާފައިވަނީ، 2017 ވަނަ އަހަރުގެ 23 އޭޕްރީލްވީ ހޮނިހިރު ދުވަހުގެ ރޭ މެންދަމުގެ ވަގުތެއްގައެވެ.
