ކްލަބު ބަދަލުކުރަން އޮބާމަޔަންއަށް ގޮބެނީސް ފުޓްބޯލް ފެޑެރޭޝަނުގެ ރައީސް ގޮވާލައްވައިފި

އާސެނަލްގައި ފެއިލްވަމުންދާތީ ކްލަބު ބަދަލުކުރަން އެޓީމުގެ ކެޕްޓަން ޕިއޭ-އެމެރިކް އޮބާމަޔަންއަށް ގޮބެނީސް ފުޓްބޯލް ފެޑެރޭޝަނުގެ ރައީސް ޕިއޭ އެލައިން މޯންގުއެންގިއު ގޮވާލައްވައިފި އެވެ.

ގެބޮން އަށް އުފަން އުމުރުން 30 އަހަރުގެ އޮބާމަޔަން ހޯދުމަށް ޗެލްސީ އާއި ބާސެލޯނާއިންވެސް އަންނަނީ މަސައްކަތް ކުރަމުންނެވެ.

އޮބާމަޔަން މި ވަގުތު އާސެނަލްގެ އެއްބަސްވުމުގައި ހުރީ 2021 ވަނަ އަހަރުގެ ހޫނު މޫސުމުގެ ނިޔަލަށެވެ. އާސެނަލުން އޮބާމަޔަން އަށް އައު އެއްބަސްވުމެއް ދޭން މިހާތަނަށް ކުރި މަސައްކަތް ކާމިޔާބެއްނުވި އެވެ. އެހެންކަމުން މި ސީޒަނަށްފަހު އޮބާމަޔަން ވިއްކާލަން އާސެނަލުން މިހާރު މަސައްކަތް ކުރަމުން އަންނަ ކަމަށް ރިޕޯޓުތައް ބުނެއެވެ.

ދާދި ފަހުން ގޮބެނީސް ފުޓްބޯލް ފެޑެރޭޝަނުގެ ރައީސް ވިދާޅުވީ އާސެނަލާއެކު އޮބާމަޔަންއަށް އެއްވެސް ކާމިޔާބީއެއް ހޯދިފައިނުވާ ކަމަށާއި، އާސެނަލުން މިހާރު ގެންގުޅޭ ޓާގެޓަކީ ޔޫރަޕްގެ އެހެން ކްލަބުތަކާ އަޅާ ބަލާއިރު، ކުޑަ ޓާގެޓެއް ކަމަށެވެ. އަދި ވިދާޅުވީ އޮބާމަޔަންއަކީ ޔޫރަޕްގެ އެންމެ މަތީ ފަންތީގެ ކްލަބެއްގައި ހުންނަން ޖެހޭނެ ކުޅުންތެރިއެއް ކަމަށާއި، މުޅި ގޮބެންގެ ހުރިހާ ރައްޔިތުންވެސް އޭނާއާ ދޭތެރޭ ދެކެނީ އެފަދަ ހުވަފެންތަކެއް ކަމަށެވެ. އަދި ހާއްސަކޮށް ވަރުގަދަ ކްލަބެއްގައި ކާމިޔާބު ކެރިއަރެއް ނިންމާލުމަކީ އޮބާމަޔަންއަށް މުހިއްމު ކަމެއް ކަމަށްވެސް ވިދާޅުވި އެވެ.

އޮބާމަޔަން ހޯދަން ޗެލްސީ އާއި ބާސާއިންވެސް މަސައްކަތް ކުރަމުން އަނަނއިރު، މިފަހަރުގެ ފިނި މޫސުމުގެ ޓްރާންސްފާ ބާޒާރުގައި އޮބާމަޔަން ހޯދަން ބާސާއިން ކުރި މަސައްކަތް ވަނީ ނާކާމިޔާބުވެފައެވެ. އެކަމަކު އޮބާމަޔަންއަށް ބާސާއިން އަދިވެސް ޝައުގުވެރިވާ ކަމަށާއި، މި ސީޒަން ނިމުމުން އޮބާމަޔަން ހޯދަން 50 މިލިއަން ޔޫރޯގެ ބިޑެއް ކުރަން ބާސާ އޮތީ ތައްޔާރަށް ކަމަށް ރިޕޯޓުތައް ބުނެއެވެ.

މީގެ ދެ އަހަރު ކުރިން ބޮރޫޝިއާ ޑޯޓްމުންޑް ދޫކޮށް 63 މިލިއަން ޔޫރޯ އަށް އާސެނަލަށް ސޮއިކުރި އޮބާމަޔަން ވަނީ މިހާތަނަށް އެޓީމަށް ކުޅެދިން 96 މެޗުގައި 61 ލަނޑު ޖަހާފައެވެ.