8 ފެބްރުއަރީގައި ރޯކޮށްލި ބައެއް ޕޮލިސް ސްޓޭޝަންތައް އަލުން އިމާރާތްކުރަނީ
މި ތަންތަން ހަދަން ނިންމާފައިވަނީ ޑިޒައިން، ބިލްޑް އަދި ޕްރީ-ކާސްޓް އުސޫލުން
8 ފެބްރުއަރީގައި ރޯކޮށްލި ތިނަދޫ ޕޮލިސް ސްޓޭޝަން
2012 ފެބްރުއަރީ 8 ގައި ހިނގައިދިޔަ ހަމަނުޖެހުންތަކުގައި ރޯކޮށްލި 2 ޕޮލިސް ސްޓޭޝަނަކާއި ފުހުންގެ 3 އެކަމަޑޭޝަނެއް ޑިޒައިން، ބިލްޑް އަދި ޕްރީ-ކާސްޓް އުޞޫލުން ހަދަން ނިންމައިފިއެވެ.
ފިނޭންސް މިނިސްޓްރީން ބުނީ ޑިޒައިން، ބިލްޑް އަދި ޕްރީ-ކާސްޓް އުޞޫލުން ޢިމާރާތް ކުރުމަށް ނިންމާފައިވަނީ ގދ. ތިނަދޫ އަދި ސ. ގަމުގައި ޕޮލިސް ސްޓޭޝަން އަދި އެކޮމޮޑޭޝަން ޢިމާރާތުގެ މަސައްކަތް ކަމަށެވެ. މީގެ އިތުރުން ސ. ހިތަދޫގައި ޕޮލިހުންގެ އެކޮމޮޑޭޝަން ޢިމާރާތުގެ މަސައްކަތް ޑިޒައިން، ބިލްޑް އަދި ޕްރީ-ކާސްޓް އުޞޫލުން ކުރުމަށް ވަނީ ނިންމާފައެވެ.
މިއީ މި އަހަރުގެ ތެރޭގައި ފެށުމަށް ހަމެޖެހިފައިވާ 3 މަޝްރޫޢެކެވެ. އެގޮތުން މި ތަންތަނުގައި ޕޮލިސް ސްޓޭޝަން އަދި އެކޮމޮޑޭޝަން ޢިމާރާތުގެ މަސައްކަތް ކުރުމަށް ނިންމާފައިވަނީ 2012 ވަނަ އަހަރު ފެބްރުއަރީ 8 ގައި ހިނގި ހަމަ ނުޖެހުންތަކުގައި އެތަންތަން ރޯކޮށްލާ ބޭނުން ނުކުރެވޭ ވަރަށް ހަލާކުވެފައިވާތީއެވެ.
ފިނޭންސް މިނިސްޓްރީން ބުނީ މި މަޝްރޫޢުތަކުގެ ބީލަންތަކުގައި ބައިވެރި ވެވޭނީ މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރގެ "ޢިމާރާތްކުރުމުގެ ޢަމަލީ މަސައްކަތްކުރާ ފަރާތްތަކުގެ ޤަވާއިދު" ގައިވާ ގޮތުގެމަތީން ރަޖިސްޓަރީ ވެފައިވާ ފަރާތްތަކަށް ކަމަށެވެ. އަދި މި މަސައްކަތަށް ޝަރުޠުހަމަވާ ފަރާތެއް ހޯދުމުގެ ކަންތައް ކުރިޔަށް ގެންދެވޭނީ އިންޓަރނޭޝަނަލް ކޮމްޕެޓިޓިވް ބިޑިންގ (އައިސީބީ) އުޞޫލުގެ މަތިން ކަމަށާއި، މިކަމަށް ކުރިމަތިލާ ފަރާތްތަކުގައި ހުންނަންޖެހޭ ޝަރުޠުތަކާއި އިވެލުއޭޓްކުރެވޭ ކްރައިޓީރިއާ ބީލަން ފޮތުގައި ބަޔާންކުރެވިފައިވާނެ ކަމަށެވެ.
މީގެ އިތުރުން ބީލަމުގައި ބައިވެރިވުމަށް 1500 ރުފިޔާގެ ނޮންރިފަންޑަބަލް ރަޖިސްޓްރޭޝަން ފީއެއް ދައްކަވަންޖެހޭނެ ކަމަށާއި, ބަލައިގަންނާނީ 17 މާރޗް 2020 އިން 05 މޭ 2020 އަށް، ބަންދުނޫން ކޮންމެ ދުވަހަކު ހެނދުނު 08:30 އިން މެންދުރު 12:00 އަށެވެ. އަދި ރަމަޟާން މަހު ހެނދުނު 09:30 އިން 11:30 އަށް، އަދި ޞިއްޙީ ކުއްލި ނުރައްކަލުގެ ޙާލަތު އިޢުލާނުކޮށްފައިވާ މުއްދަތުގެ ތެރޭގައި ސަރުކާރު ބަންދު ދުވަސްތަކުގައި ކޮންމެ ހޯމަ އަދި ބުދަ ދުވަހެއްގެ ހެނދުނު 09:30 އިން 11:30 އަށް މިމިނިސްޓްރީ އިންނެވެ.
