ކޮވިޑް-19 އިން ރަނގަޅުވި ދިވެހި ޑޮކްޓަރުގެ އިލްތިމާސް: ސޯޝަލް ޑިސްޓެންސް ގެންގުޅޭ އަތްދޮވުން މުހިންމު
ކަރަންޓީނު ނިންމާ މުޖުތަމަޢުއަށް ނިކުންނަ ފަރާތްތަކުން ވީހާވެސް ބޮޑަށް ސެލްފް އައިސޮލޭޝަންގައި ތިބުމަކީ މުހިންމު ކަމެއްކަމަށް ޑޮކްޓަރ ވިދާޅުވި
ޑރ. ޝައްފާނާ ހަމީދު - ރާއްޖެއެމްވީ
އިނގިރޭސިވިލާތުގައި ޑޮކްޓަރެއްގެ ގޮތުގައި މަސައްކަތްކުރައްވަމުން އަންނަނިކޮށް އެވައިރަސްއަށް ޕޮޒިޓިވްވެ އަދި މިހާރު ރަނގަޅުވެފައިވާ ޑރ ޝައްފާނާ ހަމީދު ދިވެހި ރައްޔިތުންނަށް ދެއްވަން ބޭނުންވާ މެސެޖަކީ ވީހާވެސް ބޮޑަށް ސޯޝަލް ޑިސްޓޭންސް ގެންގުޅެ ގިނަގިނަ އިން އަތްދޮވުމެވެ.
ރާއްޖެޓީވީގެ "ފަށާއިރު" ޕްރޮގުރާމަށް ދެއްވި ޚާއްޞަ އިންޓަވިއުގައި ދިވެހިންނަށް ދެއްވަން ބޭނުންފުޅުވާ މެސެޖަކީ ކޮބައިތޯ ދެންނެވުމުން ޑރ ޝައްފާނާ ވިދާޅުވީ ކޮވިޑް-19 އާ ގުޅިގެން ސަރުކާރުން މިހާރުވެސް ކުރަމުން ގެންދާކަންކަމެއް ކުރުން މުހިންމު ކަމަށެވެ. ރާއްޖެއިން ބޭރުން އަންނަ ހުރިހާ އެންމެން ކަރަންޓީނު ކުރުމާއި، ކަރަންޓީނުގައި ތިބޭ މީހުން ދޫކޮށްލުމުގެ ކުރިން ވައިރަސް ހުރޭތޯ ޓެސްޓުކުރުމަކީ ކުރުން މުހިންމު ކަންތައްތައްކަަމަށް ޑޮކްޓަރ ވިދާޅުވި އެވެ. ޢާންމު ރައްޔިތުންނަށް، ވަކިން ޚާއްޞަކޮށް ދެއްވަން ބޭނުންފުޅުވާ މެސެޖަކީ އަދި ވަކިން ޚާއްސަކޮށް ކަރަންޓީނު ނިންމާ މުޖުތަމަޢުއަށް ނިކުންނަ ފަރާތްތަކުން ވީހާވެސް ބޮޑަށް ސެލްފް އައިސޮލޭޝަންގައި ތިބުމަކީ މުހިންމު ކަމެއްކަމަށް ޑޮކްޓަރ ވިދާޅުވި އެވެ.
އިނގިރޭސިވިލާތުގައި ޑރ ޝައްފާނާ މަސައްކަތްކުރައްވާތާ 7 އަހަރު ވެފައިވާއިރު ޑޮކްޓަރ މިހާރު މަސައްކަތްކުރައްވަމުން ގެންދަވާ ހޮސްޕިޓަލުގައިވެސް ކޮވިޑް-19 ޖެހިގެން ބަލި މީހުންނަށް އަންނަނީ ފަރުވާދެމުންނެވެ. އެތާންގެ ތަޖުރިބާއަށް ބައްލަވާ ދިވެހި މުޖުތަމަޢުގެ ތެރެއަށް ވައިރަސް ފެތުރިއްޖެނަމަ ކޮންޓްރޯލްކުރަން އުނދަގޫވާނެތީ އެކަމާއި ހާސްވެވަޑައިގަންނަވާ ކަމަށް ޑރ ޝައްފާނާ ވިދާޅުވިއެވެ. ވަކިން ޚާއްޞަކޮށް މާލެފަދަ ތޮއްޖެހިފައިވާ ތަނެއްގައި ކޮންޓްރޯލްކުރަން އުނދަގޫވާނެކަމަށާއި ވައިރަސް ފެތުރިއްޖެނަމަ ހުރި ހޮސްޕިޓަލްތައްވެސް މިވައިރަސްގެ ބަލި މީހުންނާއިގެން ފުރޭނެކަމަށް ޑޮކްޓަރ ވިދާޅުވިއެވެ.
އެހެންކަމުން އެކަމަށް ދުރާލާ ތައްޔާރަށް ތިބެންޖެހޭނެކަމަށް ޑޮކްޓަރ ވިދާޅުވިއެވެ.
ޑޮކްޓަރ ވިދާޅުވީ އިނގިރޭސިވިލާތުގައި މިވައިރަސް ޖެހިގެން އަންނަ މީހުންނަށް ދެނީ ސަޕޯޓިވް ޓްރީޓްމެންޓެއްކަމަށެވެ. އެގޮތުން ޕެރެސެޓްމޯލާއި އޮކްސިޖަން އާއި ވެންޓިލޭޓަރގެ ބޭނުންކުރާ ކަމަށް ޑޮކްޓަރ ވިދާޅުވިއެވެ. ވައިރަސް އިން ރަނގަޅުކުުރުމަށް ވަކިން ޚާއްޞަ ބޭހެއް އަދި ނެތުމުން ވަކިވައްތަރެއްގެ ބޭހެއް ބޭނުންނުކުރާކަމަށް ޑޮކްޓަރ ވިދާޅުވިއެވެ.
ޑޮކްޓަރ ވިދާޅުވީ މިވައިރަސް އަށް ވެކްސިނެއް ހޯދުމަށް އަދިވެސް ވަރަށް ގިނަ ދުވަސްތަކެއް ނަގާނެކަމަށެވެ. އެހެންކަމުން އެންމެ ރަނގަޅުގޮތަކީ ސޯޝަލް ޑިސްޓޭންސް ގެންގުޅޭ ބަލިން ރައްކާތެރިވެވޭނެ ގޮތްތަކަށް ދިރިއުޅުންކަމަށް ޑޮކްޓަރ ޝައްފާނާ ވިދާޅުވިއެވެ.
