މިހާތަނަށް 800 އަށްވުރެ ގިނަ މީހުން ކަރަންޓީން ފެސިލިޓީތަކުން ދޫކޮށްލެވިއްޖެ: މަބްރޫކް
12 އެޕްރީލު 2020 | އާދީއްތަ 17:08ރިސޯޓުތަކާއި ސަފާރީތަކުން 9663 މީހުން ދޫކުރެވިފައިވޭ
މީގެ ކުރިން ނެޝެނަލް އެމަޖެންސީ އޮޕަރޭޝަން ސެންޓަރުގައި އޮތް ނޫސްވެރިންގެ ބައްދަލުވުމެއްގައި މަބްރޫކް ވާހަކަ ދައްކަވަނީ
މިހާތަނަށް 800 އަށް ވުރެން ގިނަ މީހުން ކަރަންޓީން ފެސިލިޓީތަކުން ދޫކޮށްފައިވާ ކަމަށް ޓާސްކް ފޯހުގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.
އާދިއްތަ ދުވަހުގެރޭ ނެޝެނަލް އެމަޖެންސީ އޮޕަރޭޝަން ސެންޓަރުގައި އޮތް ނޫސްވެރިންގެ ބައްދަލުވުމުގައި ވާހަކަދައްކަވަމުން މަބްރޫކް ވިދާޅުވީ ކަރަންޓީން ފެސިލިޓީތަކުން ގިނަ އަދަދެއްގެ މީހުން ދޫކޮށްފައިވާއިރު ރިސޯޓުތަކާއި ސަފާރީތަކުން 9663 މީހުން ދޫކުރެވިފައިވާ ކަމަށެވެ.
މަބްރޫކް ވިދާޅުވީ ފެސިލިޓީތަކުން ދޫކޮށްލެވޭ މީހުންނަކީ އެތައް ދުވަހަކު އާއިލާއާ ދުރުގައި ތިބެފައި އެމީހުން ކައިރިއަށް ދެވޭ މީހުން ކަމަށާއި އެމީހުން ވީހާ ވެސް ބޮޑަށް ގައިދުރުކަން ދެމެހެއްޓުމުގެ މަސައްކަތް ކުރަން ޖެހޭނެ ކަމަށެވެ. އަދި މީހުންނާއި ބައްދަލުކުރުން މަދުކުރަން ޖެހޭނެކަން ފާހަގަކުރައްވާ މަބްރޫކް ވިދާޅުވީ އެމީހުން ފެސިލިޓީތަކުން ދޫކޮށްލެވިފައިވަނީ އެހެން މީހުންނަށްވުރެން ބޮޑަށް މި ބަލީގެ ރައްކާތެރިކަން އެ މީހުންނަށް އޮތުމުން ނޫންކަމަށެވެ.
މި ބަލި ޖެހުމުގެ ފުރުސަތު އެމީހުންނަށް ވެސް އެބައޮތް އޮތް ކަމަށާއި އެމީހުން އުޅޭ ގޮތެއްގެ ސަބަބުން ނުރައްކާތެރި ހަލާތަކަށް ހިނގައިދާނެކަމުގެ ބިރު އެބައޮތް ކަމަށް ވެސް މަބްރޫކް ވިދާޅުވިއެވެ. އެހެންކަމުން އެ ފަރާތްތަކުން ވެސް އެޗްޕީއޭ އިން ދޭ އިލްތިމާސްތަކަށް ތަބާވުމަށް މަބްރޫކް އިލްތިމާސްކުރެއްވިއެވެ.
މަބްރޫކް އިތުރަށް ވިދާޅުވީ ބައެއް ފަހަރު ކަރަންޓީން ފެސިލިޓީތަކުން މީހުން ދޫކޮށްލެވޭއިރު އެ މީހުންނަކީ "ބަލި ޖެހިފައިވާ" ބައެއްގެ ގޮތުގައި ބައެއް މީހުން ސިފަކޮށް ވަރަށް އިހާނަތިކޮށް ކަންތައްތައް ކުރާ ކަމަށެވެ. އަދި އެމީހުން ރަށަށް އަނބުރާ ދިޔުމުން ރަށަށް އެމީހުން އަރުވަން ދެކޮޅު ހަދާ، އެމީހުންނަކީ ވަރަށް ދަށު ދަރަޖައިގެ ބައެއްގެ ގޮތުގައި ދެކޭ ކަމަށް ވެސް އޭނާ ވިދާޅުވިއެވެ.
ކަރަންޓީން ފެސިލިޓީން މީހަކު ދޫކޮށްލެވުމަކީ އެހެން މީހެއްގެ ކިބައިގައި ނެތް ނުރައްކަލެއް އޭނަގެ ގައިގައި ހުންނަކަމެއް ނޫންކަން ފާހަގަކުރައްވާ މަބްރޫކް ވަނީ އެމީހުންނާއި ދޭތެރޭގައި ރަނގަޅަށް އަމަލު ކުރުމަށް އިލްތިމާސްކުރައްވާފައެވެ.
މިވަގުތު އައިސޮލޭޝަންގައި ތިބި މީހުންގެ ތަފްސީލު ހާމަކުރައްވަމުން މަބްރޫކް ވިދާޅުވީ 11 މީހަކު އައިސޮލޭޝަންގައި ތިބިއިރު ކަރަންޓީން ފެސިލިޓީތަކުގައި 907 މީހަކު އެބަތިބި ކަމަށެވެ.
