"ކްލަބުތަކުގެ މާލީ ހާލަތު ވެއްޓޭނެ މިންވަރާއި މެދު ބިރުގަނޭ"

އިނގިރޭސި ބައެއް ކްލަބުތަކުގެ ކުޅުންތެރިން މުސާރަ ކުޑަކުރުމަށް އެއްބަސް ނުވުމުން, ބައެއް ކްލަބުތަކަށް މާލީ ގޮތުން ދިމާވާނެ ދަތިތަކާއި މެދު ކަންބޮޑުވާ ކަމަށް ޓޮޓެންހަމް ހޮޓްސްޕާގެ ކުރީގެ ޗެއާމަން އެލަން ޝުގާ ވިދާޅުވެއްޖެއެވެ.

ދުނިޔޭގައި ހަލުވިކަމާއެކު ފެތުރެމުން އަންނަ ކޮރޯނާވައިރަސް (ކޮވިޑް-19) އާ ގުޅިގެން އިނގިރޭސި ޕްރިމިއާ ލީގުން މިހާތަނަށް ކުޅުންތެރިންގެ މުސާރަ ކުޑަކުރުމަށް ނިންމާފައިވަނީ ސައުތެމްޓަނާއި ވެސްޓް ހޭމް ޔުނައިޓެޑުންނެވެ.

ޓޮޓެންހަމްގެ ކުރީގެ ޗެއާމަން އެލަން ވިދާޅުވީ ލީގު މެދު ކެނޑިފައި އޮންނަތާ މަސްދުވަސްވީ ކަމަށާއި، މި ކަމުގެ ސަބަބުން ޕްރިމިއާ ލީގަށާއި ކްލަބުތަކަށް ބޮޑު ގެއްލުމެއްވެގެންދާނެ ކަމަށެވެ. އަދި މިކަމުގެ ގެއްލުން އެންމެ ބޮޑަށް ކުރާނީ ކުދި ކްލަބުތަކަށް ކަމަށާއި، ހާއްސަކޮށް މި އަނދަވަޅުން އަރައިގަތުމަށް ކުދި ކްލަބުތަކަށް އުނދަގޫވާނެ ކަމަށް އެލަން ވިދާޅުވިއެވެ.

އެލަން އިތުރަށް ވިދާޅުވީ މިކަމުގައި އޭނާއަށް ވިސްނޭ އެންމެ ރަނގަޅު ގޮތަކީ ކްލަބުތަކުން ކުޅުންތެރިންގެ މުސާރަ ކުޑަކުރުމަށް މަސައްކަތް ކުރުން ކަމަށެވެ، އަދި ހާއްސަކޮށް ކުދި ކްލަބުތަކުން ކުޅުންތެރިންނާއި ވާހަކަދައްކައިގެން، މުސާރަ ކުޑަކުރުމަށް މަސައްކަތް ކުރުމަށް އެލަން ވަނީ ގޮވާލާފައެވެ.

ޕްރިމިއާ ލީގުގެ ކުޅުންތެރިންގެ މުސާރައިން 30 އިންސައްތަ އުނިކުރަން ގިނަ ކްލަބުތަކުން މަސައްކަތް ކުރަމުން އައި ނަމަވެސް، ގިނަ ބަޔަކު އަންނަނީ އެގޮތަށް އަމަލުނުކުރަން ގޮވާލަމުންނެވެ. އެގޮތުން ފްރޮފެޝަނަލް ފުޓްބޯލާސް އެސޯސިއޭޝަން (ޕީއެފްއޭ) އިންވެސް ވަނީ އެކަމަށް ދެކޮޅު ހަދާފައެވެ.

ކޮވިޑް-19 އާ ގުޅިގެން މުއްދަތެއް ނެތް ގޮތަށް ޕްރިމިއާ ލީގުގެ ކުޅުން މެދުކަނޑާލާފައިވާއިރު، ދިމާވާ މާލީ ގޮންޖެހުންތަކުން އަރައިގަތުމަށް ޕްރިމިއާ ލީގިގެ ބައެއް ކްލަބުތަކުން ވަނީ އެ ކްލަބުގެ މުވައްޒަފުން ނޯޕޭ ލީވްއަށް ފޮނުވާލާފައެވެ. އޭގެ ތެރޭގައި ނިއުކާސަލް ޔުނައިޓެޑް، ޓޮޓެންހަމް ހޮޓްސްޕާ، ބޯންމަތު އަދި ނޯވިޗް ސިޓީ ހިމެނެއެވެ.