ކޮވުޑް-19 އާއި ގުޅިގެން ވަޒީފާއާއި ބެހޭ ޓްރިބިއުނަލްއަށް ހުށަހަޅާ މައްސަލަތަކުގެ އަަޑުއެހުން ވީޑިއޯ އަދި އޯޑިއޯ ކޮންފަރެންސް މެދުވެރިކޮށް ކުރިޔަށް ގެންދިޔުމަށް ނިންމައިފިއެވެ.

ރާއްޖެއެމްވީއަށް މައުލޫމާތު ދެއްވަމުން ވަޒީފާއާއި ބެހޭ ޓްރިބިއުނަލްގެ ރައީސް އަމްޖަދު މުސްތަފާ ވިދާޅުވީ، ދުނިޔޭގައި ހަލުވިކަމާއެކު ފެތުރުމުންދާ ކޮވިޑް-19 ރާއްޖެއިން ފެނުމާއި ގުޅިގެން އިގްތިސާދަށް އައިސްފައިވާަ ހީނަރުކަމުގެ ސަބަބުން ގިނަ އަދަދެއްގެ ބަޔަކު ވަޒީފާއިން ވަކި ކުރާކަމުގެ ޝަކުވާ ލިބެމުންއަންނަކަމަށެބެ. އޭނާ ވިދާޅުވީ، އެ އިދާރާއިން ބާއްވާާ އަޑުއެހުންތަކަށް އެކި ފަރާތްތަށް ހާޒިރުކުރުމަށް ފޮނުވޭ އަމުރު ދެން ފޮނުވާނީ އީމެއިލް ނުވަތަ އެނޫންވެސް އިލެކްޓްރޯނިކް ވަސީލަތެއް މެދުވެރިކޮށްކަމަށެވެ.

އަމްޖަދު ވިދާޅުވީ ކުރިން ރިސެޕްޝަނުން ދެމުން އައި ހިދުމަތްތަށް، ރާއްޖޭގައި އިއުލާންކޮށްފައިވާ ސިއްހީކުއްލި ނުރައްކަލުގެ ހާލަތާއި ގުޅިގެން މެދުކަނޑާލިނަމަވެސް، ހަފްތާ ބަންދުނޫން ކޮންމެ ދުވަހެއްގެ ހެނދުނު 9:00 އިން މެންދުރު 13:30 އަށް އެ އިދާރާގެ ރަސްމީ ފޯނު ނަމްބަރަށް ގުޅައި ހުށަހެޅޭނެކަމަށެވެ. އަދި އެ އިދާރާއަށް މައްސަލަ ހުށަހަޅާނީ ކުރިންވެސް ގަވާއިދުގައިވާ ގޮތަށް އީމެއިލް މެދުވެރިކޮށްކަމަށެވެ. އަދި ހުށަހަލޭުމާއެކު މައްސަލަ ރަޖިސްޓްރީކުރުމުންވެސް ނުވަތަ ބެލެން ނެތް މައްސަލައެއްކަން އީމެއިލް މެދުވެރިކޮށް އަންގާނެކަމަށް އަމްޖަދު ވަނީ ވިދާޅުވެފައެވެ.

އަދި މި ހާލަތާއި ގުޅިގެން މައްސަލައިގެ އަޑުއެހުންތައް ބޭއްވުމަށް ހަމަޖެހިފައިވަނީ އޯޑިއޯ ނުވަތަ ވީޑިއޯ ލިންކްގެ އެހީގައެވެ. އަމްޖަދު އިތުރަށް ވިދާޅުވީ، މި ގޮތަށް ނިންމި މައިގަނޑު ސަބަބަކީ މި ދަނޑިވަޅުގައި ވަރަށް ގިނަ ފަރާތްތަކަށް ވަޒީފާ ގެއްލެމުން ދިޔުމާއި ގުޅިގެން، އޮފީސް ބަންދުކޮށްފައި ހުންނަ ގަޑިތަކުގައިވެސް މައްސަލަ ހުށަހެޅުމަށް ފުރުސަތު ހުޅުވުމުގެ ގޮތުން ކަމަށެވެ.