ކޮވިޑް-19 އެންމެ ހަލުވި މިނުގައި ފެތުރެމުންދާ އެމެރިކާ ގައި ވައިރަސް ޖެހުނު މީހުންގެ އަދަދު ބައި މިލިއަނަށް ވުރެ މައްޗަށް އަރައިފި އެވެ.

މުޅި ދުނިޔޭ ގައި ވައިރަސް ޖެހުނު މީހުންގެ އަދަދު 1.7 މިލިއަނަށް އަރާއިރު އެމެރިކާގައި 500،399 ( ފަސް ލައްކަ ތިންސަތޭކަ ނުވަދިހަ ނުވަ) މީހުންނަށް ވައިރަސް ޖެހިފައިވާކަމަށް ޖޯންސް ހޮޕްކިންސް ޔުނިވަރސިޓީ އިން ބުނެ އެވެ. އަދި 18,693 މީހުން މިވައިރަސް ޖެހިގެން މަރުވެފައިވާ ކަމަށް ވަނީ ހާމަކޮށްފަ އެވެ.

މީގެ އިތުރުން ހުކުރު ދުވަހަކީ މިހާތަނަށް އެމެރިކާ ގައި އެންމެ ގިނަ އަދަދެއްގެ މީހުން ވައިރަސް ޖެހިގެން މަރުވި ދުވަހެވެ. އެއީ 1,953 މީހުންނެވެ. ވައިރަސް ޖެހުނު މީހުންގެ ތެރެއިން ބަލި ފަސޭހަވެފައިވާ ކަމަށް ރިޕޯޓްކޮށްފައި ވަނީ 28,837 މީހުންނެވެ.

އެމެރިކާގެ ސްޓޭޓް ތަކުގެ ތެރެއިން އެންމެ ހަލުވިމިނުގައި ވައިރަސް ފެތުރެމުންދަނީ ނިއު ޔޯކް ސިޓީގަ އެވެ. އަދި އެންމެ ގިނަ އަދަދަކަށް މީހުން މަރުވަމުން އަންނަނީ ވެސް ނިއު ޔޯކުންނެވެ. އެގޮތުން ނިއު ޔޯކުން އެކަނި 5,820 މީހުން ވަނީ ވައިރަސް ޖެހިގެން މަރުވެފަ އެވެ.

ނިއު ޔޯކު ގައި ވައިރަސް ޖެހިފައިވާ މީހުންގެ އަދަދު ދުނިޔޭ ގައި ހަލުވިމިނުގައި ވައިރަސް ފެތުރެމުންދާ ގައުމުތަކަށްވުރެ ގިނަ އެވެ. ނިއު ޔޯކް ސްޓޭޓު ގައި ވައިރަސް ޖެހިފައިވާ މީހުންގެ އަދަދު 174,481 އަށް އަރައެވެ. ދުނިޔޭގައި ދެވަނަ އަށް އެންމެ ގިނަ މީހުންނަށް ވައިރަސް ޖެހިފައިވާ ސްޕެއިންގައި ވައިރަސް ޖެހިގެން މިހާތަނަށް ރިޕޯޓްކޮށްފައިވަނީ 158,273 މީހުންނަށެވެ.

ޔުނިވަރސިޓީ އޮފް ވޮޝިންގޓަންގެ އިންސްޓިޓިއުޓް ފޯރ ހެލްތު މެޓްރިކްސް އެންޑް އެވަލުޔޭޝަނުން އަންދާޒާ ކުރާ ގޮތުގައި މި އަހަރުގެ އޮގަސްޓް މަސް ނިމޭއިރު އެމެރިކާއިން 60,415 މީހުން މަރުވާނެ އެވެ. އެމެރިކާގައި ހަލުވިކަމާއެކު ކޮވިޑް-19 ފެތުރެމުންދާތީ ސޯޝަލް ޑިސްޓޭންސް އާ ގުޅޭ އައު ގައިޑްލައިނެއް 30 ދުވަހުގެ މުއްދަތަށް އިއުލާންކޮށްފައިވާއިރު 30 ދުވަހަށް ފަހު، އެ ގައިޑް ލައިންގައި ހުރި ކަންތައްތަކަށް އަމަލުނުކޮށްފިނަމަ އިތުރަށް ވައިރަސް ފެތުރުމުގެ ފުރުސަތު އެބައޮތް ކަަމަށް އެމެރިކާ ގައި މިކަން ދިރާސާކުރާ ފަރާތްތަކުން އަންނަނީ ބުނަމުންނެވެ.

މިހާރު އަމަލުކުރަމުންދާ ސޯޝަލް ޑިސްޓެންސިން އާ ގުޅިގެން ވައިރަސް ފެތުރޭ މިންވަރު ކޮންމެވެސް ވަރަކަށް މަދުވެފައިވާ ކަމަށާއި އެހެންކަމުން އެގޮތަށް ކުރިޔަށް އޮތްތަނުގައި ވެސް އަމަލުކުރަން ޖެހޭކަމަށް އެމެރިކާގެ ކަމާބެހޭ ފަރާތްތަކުން އަންނަނީ ބުނަމުންނެވެ.