އާދިއްތަ ދުވަހުން ފެށިގެން ވާރކް ވިސާ އާ ކޮށްދެނީ
ވާރކް ވީޒާއާއި ގުޅުންހުރި ޚިދުމަތް ތަކަށް ހެނދުނު 09:00 އިން 13:00 އަށް އެދެވޭނެ
އިމިގްރޭޝަން
ރާއްޖޭގައި އުޅެމުންގެންދާ ގިނަ އަދަދެއްގެ ބިދޭސީންގެ ވީސާ އާއި ގުޅުންހުރި ކަންތައްތައް ފުރިހަމަ ކުރުމުގައި ދަތިވަމުންދާތީ އާދީއްތަ ދުވަހުން ފެށިގެން ވާރކް ވީސާ އަދި އެހެނިހެން ވީސާ ދޫކޮށްފައިވާ ފަރާތްތަކުގެ ވީސާ އައު ކޮށްދިނުމުގެ މަސައްކަތް ފަށާނެ ކަމަށް އިމިގްރޭޝަނުން ބުނެފިއެވެ.
އިމިގްރޭޝަނުން ނެރެފައިވާ ބަޔާނެއްގައި ބުނެފައި ވަނީ ވާރކް ވީސާ އަދި އެހެނިހެން ވީސާތަކުގައި ރާއްޖޭގައި އުޅެމުންދާ ފަރާތްތަކަށް ޚިދުމަތް ދިނުމާއިގުޅޭ ދިވެހިރާއްޖޭގައި ކޮވިޑް-19 ފެތުރުން ކޮންޓްރޯލްކޮށް، އާންމު ރައްޔިތުންގެ ސަލާމަތާއި ރައްކާތެރިކަމަށްޓަކައި އާދީއްތަ ދުވަހުން ފެށިގެން ސަރުކާރުގެ އިދާރާތައް ބަންދުކުރުމަށް ނިންމާފައިވުމާއެކު، އެ މުވައްސަސާއިން ދެމުންގެންދާ ބައެއް ޚިދުމަތްތައް މެދުކަނޑާލާފައިވާ ކަމަށެވެ.
އެހެންނަމަވެސް، ރާއްޖޭގައި އުޅެމުންގެންދާ ގިނަ އަދަދެއްގެ ބިދޭސީންގެ ވީސާ އާއި ގުޅުންހުރި ކަންތައްތައް ފުރިހަމަ ކުރުމުގައި ދަތިވަމުންދާތީވެ، އާދީއްތަ ދުވަހުން ފެށިގެން ވާރކް ވީސާ އަދި އެހެނިހެން ވީސާ ދޫކޮށްފައިވާ ފަރާތްތަކުގެ ވީސާ އައުކޮށްދިނުމުގެ މަސައްކަތް ކުރެވޭނެ ކަމަށެވެ.
އެގޮތުން ޚިދުމަތް ދިނުމަށް ހަމަޖެހިފައިވަނީ، ހެލްތް ޕްރޮޓެކްޝަން އޭޖެންސީއިން އާންމުކޮށްފައިވާ ގޮތުގެ މަތިން، އިޖްތިމާޢީ ގައިދުރުކަން ބަހައްޓައިގެން ކަމަށާއި ޚިދުމަތް ހޯދަން އަންނަ ފަރާތްތަކުން އެކަމަށް ޙާއްޞަ ސަމާލުކަމެއް ދިނުމަށް އިމިގްރޭޝަނުން ވަނީ އިލްތިމާސްކޮށްފައެވެ.
އިމިގްރޭޝަނުން ބުނީ އެކްސްޕެޓް އޮންލައިން ސިސްޓަމް މެދުވެރިކޮށް ވާރކް ވީސާ އާއި ގުޅުންހުރި ޚިދުމަތްތަކަށް ހެނދުނު 09:00 އިން 13:00 އަށް އެދެވޭނެ ކަމަށެވެ. އަދި ވީސާ ޖެހުމަށްފަހު ޕާސްޕޯޓް ދޫކުރެވޭނީ ހެނދުނު 09:00 އިން 12:00 އަށް ކަމަށެވެ. އިމިގްރޭޝަނުން ބުނީ ވީސާއަށް އެދި ޕާސްޕޯޓު ހުށަހެޅުމަށް އެޕޮއިންޓްމެންޓު ދޫކުރާނީ ހެނދުނު 09:00 އާއި 12:00 އާއި ދެމެދުގެ ގަޑިތަކުގައި ކަމަށެވެ.
އިމިގްރޭޝަނުން އިތުރަށް ބުނީ ޓޫރިސްޓު ވީސާ އަދި ބިޒްނަސް ވީސާގައި ރާއްޖެ އެތެރެވެފައިވާ ފަރާތްތަކުގެ ތެރެއިން، ރާއްޖެއިން ބޭރަށްކުރާ ދަތުރުތައް ގަވާއިދުން ފެށުމުން، ފުރައިގެން ދިއުމަށް އެދޭ ފަރާތްތައް ވީސާ އައުކުރުމަށް ހުށަހަޅާކަށް ނުޖެހޭނެކަމަށެވެ. އަދި މި ފަރާތްތަކުން، އެޕްލިކޭޝަން ފޮރ އިމަރޖެންސީ ޑިޕަރޗަރ ފުރިހަމަ ކުރުމަށްފަހު، ފުރަން އެއަރޕޯރޓަށް ދިއުމުން ފުރޭނެ އިންތިޒާމްހަމަޖެހިފައިވާނެ ކަމަށެވެ. ނަމަވެސް 19 މާރޗް 2020 ގެ ކުރީގެ ތާރީޚަކަށް ވީސާ ހަމަވެފައިވާ ފަރާތްތަކާއި، މިހާރު ދޫކުރެވިފައިވާ ވިސާގެ މުއްދަތު އިތުރުކުރުމަށް ބޭނުންވާ ފަރާތްތަކުން ވީސާ އައު ކުރުމަށް އެދި ހުށަހަޅާ ފޯމާއި އެހެނިހެން ލިޔެކިއުންތައްpermitvisa@immigration.gov.mvއަށް މެއިލްކުރުމަށް އިމިގްރޭޝަނުން ވަނީ އިލްތިމާސްކޮށްފައެވެ. މިގޮތަށް މެއިލް ކުރާ ފަރާތްތަކަށް ވީސާ ޖެހުމަށް ޕާސްޕޯޓް ހުށަހެޅުމަށް އެޕޮއިންޓްމަންޓެއް ހަމަޖެއްސުމަށްފަހު، އެ މަޢުލޫމާތު މެއިލް މެދުވެރިކޮށް ފޮނުވޭނެ ކަމަށް ވެސް އެ މުއައްސަސާ އިން ބުންޏެވެ.
