ކޮވިޑް-19: މެލޭޝިޔާ އިން ޕޮޒިޓިވްވި ދިވެހި މިހާ ބަލިން ފަސޭހަވެއްޖެ
10 އެޕްރީލު 2020 | ހުކުރު 16:46އެމީހާގެ ވަނަަވަރެއް ހާމައެއް ނުކުރޭ
ޑރ. ނަޒްލާ ނޫސްވެރިންގެ ބައްދަލުވުމެއްގައި ވާހަކަ ދައްކަވަނީ
މެލޭޝިޔާއިން ކޮވިޑް-19 އަށް ޕޮޒިޓިވްވި ދިވެހި މީހާ ބަލިން ފަސޭހަވެފައިވާ ކަމަށް ނެޝަނަލް އެމެޖެންސީ ރެސްޕޯންސް ސެންޓަރ (އެންއީއޯސީ) އިން ބުނެފިއެވެ.
ހުކުރު ދުވަހުގެ ރޭ އެންއީއޯސީން ބޭއްވި ނޫސްވެރިންގެ ބައްދަލުވުމުގައި، ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ މެޑިކަލް އޮފިސަރު ޑރ. ނަޒްލާ ރަފީޤު ވިދާޅުވީ، ފޮރިން މިނިސްޓްރީއާ ގުޅިގެން ހޯދި މައުލޫމާތުން މެލޭޝިޔާ އިން ޕޮޒިޓިވްވި މީހާ އަކީ ކާކުކަން ދެނެގަނެވިފައިވާ ކަމަށާއި، މިހާރު އެމީހާ ބަލިން ފަސޭހަވެ ހޮސްޕިޓަލުން ދޫކޮށްލާފައިވާ ކަމަށެވެ.
މެލޭޝިއާގައި ކޮވިޑް-19 އަށް ޕޮޒިޓިވްވި މީހުންގެ ތެރެއިން، އެ ޤައުމުން ބޭރު ރައްޔިތުންގެ ތެރެއިން ވައިރަސްއަށް ޕޮޒިޓިވްވި 416 މީހުންގެ ތެރޭގައި ދިވެއްސަކު ހިމެނޭ ކަމަށް އެ ޤައުމުގެ ސިއްހަތާބެހޭ ވުޒާރާއިން ވަނީ ބުރާސްފަތި ދުވަހު އިއުލާނު ކޮށްފައެވެ. މެލޭޝިޔާއިން މިހާތަނަށް ކޮވިޑް-19 އަށް 4،346 މީހަކު ޕޮޒިޓިވްވެ 70 މީހަކު ވަނީ މަރުވެފައެވެ.
ރާއްޖެއިން މިހާތަނަށް 19 މީހުން ކޮވިޑް 19 އަށް ޕޮޒިޓިވްވެފައިވާއިރު، އޭގެ ތެރެއިން 13 މީހުން ވަނީ ބަލިން ރަނގަޅުވެފައެވެ. އަދި 4 މީހަކަށް ފަރުވާދެމުންދާއިރު، ދެންތިބި 2 މީހުންނަކީ ރާއްޖެއިން ފުރައިގެން ދިޔަ ފަހުން ވައިރަސްއަށް ޕޮޒިޓިވްވި 2 މީހުންނެވެ.
