ކޮވިޑް-19: ފްރާންސް މަނަވަރުގެ 50 ފަޅުވެރިން ޕޮޒިޓިވް
10 އެޕްރީލު 2020 | ހުކުރު 12:10ތިން ފަޅުވެރިޔަކު ވަނީ ހޮސްޕިޓަލަށް ގެންގޮސްފައި
ފަަރަންސޭސިވިލާތުގެ މަނަވަރު ޝަލް ދި ގޯލް
ފަރަންސޭސިވިލާތުގެ އަސްކަރިއްޔާގެ މަތިންދާ ބޯޓު އުފުލާ މަނަވަރު ''ޝާލް ދި ގޯލް'' ގެ 50 ފަޅުވެރިއަކު ކޮވިޑް-19 އަށް ޕޮޒިޓިވްވެއްޖެ އެވެ.
މިނިސްޓްރީ އޮފް ދަ އާމްޑް ފޯސްއިން ނެރެފައިވާ ބަޔާނެއްގައި ބުނީ، މަނަވަރުގައި ތިބި ފަޅުވެރިންގެ ގައިން ކޮވިޑް-19 އަށް ޝައްކުވާ އަލާމާތްތަކެއް ފެނިގެން އެ މީހުންގެ ސާމްޕަލް ނަގައި ޓެސްޓުތައް ހެދުމަށް މެޑިކަލް ޓީމެއް އެ މަނަވަރަށް ގޮސްފައިވާ ކަމަށެވެ. އެގޮތުން ހެދި ޓެސްޓުތަކުން މިހާތަނަށް މަނަވަރުގައި ތިބި 50 ފަޅުވެރިޔަކު ކޮވިޑް-19 އަށް ޕޮޒިޓިވްވެފައިވާ ކަމަށް އެ މިނިސްޓްރީން ބުންޏެވެ. ޕޮޒިޓިވްވި އެންމެންގެ ހާލުވެސް ރަނގަޅެވެ.
އޭގެ ތެރެއިން މަތިންދާ ބޯޓުގައި ތިން ފަޅުވެރިއަކު ހޮސްޕިޓަލަށް ގެންގޮސްފައިވާ ކަމަށް އެ މިނިސްޓްރީން ބުންޏެވެ. އެ މަނަވަރު ވަނީ މިހާރު ޓުލޯން ސިޓީއަށް ދަތުރުކުރުމަށް މިސްރާބު ޖަހާފައެވެ. އެކަމަކު މަނަވަރުގައި ތިބި މީހުން ކަރަންޓީނު ކުރާނީ ކޮންތަނެއްގައި ކަމެއް އަދި މިހާތަނަށް ހާމަކޮށްފައެއް ނުވެއެވެ.
ފްރާންސްގެ މަނަވަރަކުން ކޮވިޑް-19 ގެ ކޭސްތަކެއް ފެނިފައިވާއިރު، އެމެރިކާގެ އަސްކަރީ މަނަވަރު ތިއޮޑޯ ރޫޒްވެލްޓްގައި ކޮވިޑް-19 ފެތުރި އެ މަނަވަރުގައި ތިބި 400 މީހަކު ވަނީ ޕޮޒިޓިވްވެފައެވެ.
