މެލޭޝިއާއިން ކޮވިޑް-19 އަށް ޕޮޒިޓިވްވި ދިވެހި މީހާގެ ހާލު ރަނގަޅު
މެލޭޝިއާއިން ވަނީ ކޮވިޑް-19 ޖެހިފައިވާ 4200 އަށް ވުރެ ގިނަ މީހުން ފެނިފައި
މެލޭޝިއާގެ ވެރިރަށް ކުއަލަ ލަމްޕޫރް
މެލޭޝިއާއިން ކޮވިޑް-19 އަށް ޕޮޒިޓިވްވި ދިވެހި މީހާގެ ހާލު ރަނގަޅު ކަމަށް މެލޭޝިއާގައި ހުންނަ ދިވެހިރާއްޖޭގެ ހައި ކޮމިޝަނުން ބުނެފި އެވެ.
ހައިކޮމިޝަނުން ބުނީ މެލޭޝިއާގެ ސިއްހަތާއި ބެހޭ ވުޒާރާއިން ބުރާސްފަތި ދުވަހު ނެރުނު ރިޕޯޓުގައި ދިވެއްސަކު ކޮވިޑް-19 އަށް ދިވެއްސަކު ޕޮޒިޓިވް ވެފައިވާކަމަށް އޮތުމުން ހައި ކޮމިޝަން އެކަން ބަލާފައިވާކަމަށެވެ. މެލޭޝިއާގެ ކަމާއި ބެހޭ އިދާރާ ތަކުން ވަނީ އެކަން ކަށަވަރުކޮށްދީފައިކަމަށެވެ.
މެލޭޝިއާއިން 4200 އަށްވުރެ ގިނަ މީހުން ވައިރަސްއަށް ޕޮޒިޓިވްވެފައިވާއިރު، އޭގެ ތެރެއިން 67 މީހަކު ވަނީ މަރުވެފައެވެ. މެލޭޝިއާއިން ޕޮޒިޓިވްވީ މީހުންގެ ތެރޭގައި އެހެން ގައުމުތަކަށް ނިސްބަތްވާ 416 މީހަކު ހިމެނެ އެވެ.
ވައިރަސް ފެތުރުން ކޮންޓްރޯލް ކުރުމުގެ ގޮތުން މެލޭޝިއާގައި ވަނީ މޫވްމަންޓް ކޮންޓްރޯލް އޯޑަރ އެއް ނެރިފައެވެ. އެ ގައުމުގެ ސަރުކާރުން ވަނީ އެޕްރިލް މަހުގެ 18 ވަނަ ދުވަހާ ހަމައަށް މި އޯޑަަރުގެ މުއްދަތު އިތުރުކޮށްފަ އެވެ.
